Mumwezi wa July 2022, kudubula kugambya kwakacitika nyika yoonse:

•   “Kudubulwa kwasimapolitikisi umwi waku Japan uuzyibidwe kapati [iwakali Mweendelezi Wabili wazina lya Shinzo Abe] kwakanyonganya mizeezo yabantu bamucisi alimwi kwakagambya bantu nyika yoonse, kwaambisya akaambo kakuti cisi ca Japan tacijisi zigwebenga zinji alimwi akuti milawo yamucisi eeci miyumu kujatikizya makani aakubelesya ntobolo.”—July 10, 2022, The Japan Times.

•   “Bantu baku Denmark bakagambwa ciindi sintobolo naakajaya bantu botatwe kucintoolo cipati caku Copenhagen.”—July 4, 2022, Reuters.

•   “Ku South Africa: bantu bali 15 bakafwa ciindi basintobolo nobakatalika kudubula bantu mobanywida bukoko ku Soweto.”—July 10, 2022, The Guardian.

•   “Bantu bainda ku 220 bakadubulwa akufwa ku U.S, ciindi nokwakali holide mu July 4.”—July 5, 2022, CBS News.

 Sena kuli bulangizi buliko bwakuti bugwebenga buli boobu buyoomana? Ino Bbaibbele lyaamba nzi?

 Bbaibbele lyaamba ciindi eeci ncotupona kuti ‘mazuba aamamanino,’ ciindi bantu nobanooli bakali, basilunya alimwi bayandisya nkondo. (2 Timoteyo 3:1, 3) Micito eeyi yabugwebenga ipa bantu kuyoowa kapati. (Luka 21:11) Nokuba boobo, Bbaibbele lisyomezya ciindi nkondo noiyoomana alimwi akuti ‘bantu bayookkala mubusena bwaluumuno, mumakkalilo aakwabilidwe alimwi amumasena aakulyookezyela aaluumuno.’ (Isaya 32:18) Ino bugwebenga buyoomana buti?

 Leza uyoogusya bantu babi alimwi akunyonyoona zilwanyo zyoonse.

•   “Babi bayoonyonyoonwa munyika.”—Tusimpi 2:22.

•   “[Leza] ulamanizya nkondo munyika yoonse mboizulwa. Ibuta ulabutyolaula alyalo sumo ulalipwayaula; inkalaki zyankondo ulazyuumpa amulilo.”—Intembauzyo 46:9.

 Leza uyakuyiisya bantu kupona muluumuno kwiinda mukugusya zintu zibapa kuba alunya.

•   “Tabakaciti cintu cili coonse cibi naa kunyonyoona mucilundu cangu cisalala coonse, nkaambo masimpe nyika iyoozula luzyibo lwa Jehova mbubonya maanzi mbwaazuzya lwizi.”—Isaya 11:9.

•   Noliba lino, Leza uyiisya bantu kuti baleke nkondo akubelesya zilwanyo zyankondo akuti ‘bafwule mapanga aabo kuba maamba aakulimya amasumo aabo kuba zyakukwezuzya zisamu.’—Mika 4:3.

 Kutegwa mwiiye zinji kujatikizya zisyomezyo zyamu Bbaibbele zyaamba nyika imunoonyina kuyoowa, amubale cibalo camu Cikuwa cakuti “Freedom From Fear—Is It Possible?”

 Kutegwa mwiiye zinji kujatikizya ciyoolimana penzi lyankondo, amubale cibalo camu Cikuwa cakuti “Peace on Earth at Last!”