Munsondo, November 20, 2022, muswaangano wa COP27 United Nations Climate Change Conference wakamana. Beendelezi alimwi abasyaazibwene ibakajanika amuswaangano ooyu, bakamvwana kupa mali kuzisi zitavwubide kutegwa kaabagwasya kubamba zintu ciindi nokwacitika ntenda. Pele bantu banji baamba kuti eeci tacikonzyi kulimana penzi lyakunyonyooka kwanyika.

•   Mu November 19, 2022 ba António Guterres ba secretary-general ba United Nations bakaamba kuti “Ndilikkomene kapati kuti twasala kubikka mali ambali aakugwasya baabo bapenga akaambo kakucinca kwambowuunga muwo. Pele tulizyi kuti mali aaya taakonzyi kulimana penzi eeli . . . Nkaambo nyika yesu ili mubukkale butali kabotu naaceya.”

•   Mu November 20, 2022 ba Mary Robinson ibakali baleli bacisi ca Ireland alimwi ibakali ba UN High Commissioner for Human Rights, bakaamba kuti “ino-ino nyika ilakonzya kucinca kapati cakuti toonse tulakonzya kujatikizyigwa.

 Bakubusi kwaambisya, balalibilika kujatikizya nyika mboiyooba kumbele. Nokuba boobo, sena zisi zilakonzya kubeleka antoomwe kutegwa zizuzikizye makanze aakweendelezya mbowuunga muwo kutegwa nyika itanyonyooki? Ino Bbaibbele lyaamba nzi?

 Bbaibbele lyaamba kuti nokuba kuti mfwulumende kuli ncozikonzya kucita kutegwa kube kucinca, inga penzi tiilyamana cakumaninina. Amubone twaambo tobilo ncocili boobu:

•   “Eeco cigogomene tacikonzyi koololwa pe.”—Mukambausi 1:15.

   Bupanduluzi: Mfwulumende inga tiizyakonzya kucita zyoonse ncoziyanda nkaambo bantu tiibakalengwa kuti kabalyeendelezya. (Jeremiya 10:23) Nokuba kuti zisi zyasoleka buti kukamantana, inga tiizyakonzya kwaamana mapenzi aali munyika.

•   “Nkaambo bantu bayooba basikuliyanda, bayandisya mali, . . . batanyoneki.”—2 Timoteyo 3:2, 3.

   Bupanduluzi: Bbaibbele lyakaambila limwi kuti bantu banji mumazuba eesu banooliyanda alimwi akutayanda kubelekela antoomwe kugwasya bamwi.

 Nokuba boobo, mfwulumende zyabantu tazikonzyi kucinca mboiyooba nyika kumbele. Leza watupa Muleli wanyika iweelela, Jesu Kristo. Kujatikizya nguwe Bbaibbele lyaamba kuti:

•   “Bweendelezi buyooba agwezyo lyakwe. Izina ndyanakwiitwa ndyakuti Sikulaya Uugambya, Leza Singuzu, Taata Walyoonse Alyoonse, Mwami Waluumuno.”—Isaya 9:6.

 Jesu Mwami wa Bwami bwa Leza, naa mfwulumende yakujulu. (Matayo 6:10) Ulijisi nguzu abusongo, alimwi uliyandide kwiilanganya nyika abaabo bakkala aalindilyo. (Intembauzyo 72:12, 16) Mubweendelezi bwakwe, mfwulumende yakujulu iyoonyonyoona baabo “banyonyoona nyika” akupa kuti nyika ibote.—Ciyubunuzyo 11:18; Isaya 35:1, 7.

 Kutegwa mwiiye zinji kujatikizya cini ciyoopa kuti nyika itanyonyoonwi, amubale cibalo camu Cikuwa cakuti “Climate Change and Our Future—What the Bible Says.”