Muzisobano zya Summer Olympic izinooli mu 2024, kuyeeyelwa kuti bantu babalilwa ku 5 bbiliyoni bayakweebelela basizisobano bazwa mumasi aali 206. Ba Thomas Bach beendelezi ba International Olympic Committee bakaamba kuti: “Tuli cibeela cazisobano ziyooleta luumuno akukamantanya bantu munyika. Aboobo, atuulemeke muzeezo waba Olympic wakuti bantu boonse beelede kupona muluumuno alimwi akukamantana tacikwe makani ankobazwa.”

 Sena zisobano zya Olympic zilakonzya kwaazuzikizya makanze aali boobu? Sena kuli bulangizi buliko bwaluumuno lwini-lwini alukamantano?

 Zisobano zya Olympic zyamwaka uuno, zyapa bantu kuyeeya zintu zimbi kunze buyo lyazisobano. Kuyungizya waawo, zyatondezya kucinca kwabukkale alimwi atwaambo twacisi mbozyandaanya bantu. Zintu eezyi zibikkilizya lwaanguluko lwabantu, kusalana mubala, lusalululo muzikombelo alimwi akuteelana.

 Zisobano zyamasi aaindene-indene mbuli zya Olympic ziletela bantu lukkomano. Nokuba boobo, zilayubununa mbobayeeya bantu alimwi ambobacita zintu munzila ibaandaanya, alimwi zikulwaizya bantu kuzumanana kuyeeya akucita zintu munzila eeyi, muciindi cakuti zibaletele luumuno alimwi alukamantano lwini-lwini.

 Bbaibbele lyakasinsima kuti bantu bayooba abube bupa kuti kacikatazya kukamantana munyika. (2 Timoteyo 3:1-5) Kutegwa mwiiye zinji kujatikizya businsimi oobu bwamu Bbaibbele, amubale cibalo cakuti “Sena Bbaibbele Lyakaambilalimwi Bantu Mbobanikuyeeya Akucita Zintu Mazuba Aano?”

 Bbaibbele lilaamba zyabulangizi bwini-bwini bwaluumuno alukamantano anyika. Lisyomezya kuti bantu boonse anyika banookamantane mubweendelezi bwa mfwulumende yakujulu yiitwa kuti “Bwami bwa Leza.”​—Luka 4:43; Matayo 6:10.

 Mwami wa Bwami oobu, Jesu Kristo, uyooleta luumuno munyika yoonse. Bbaibbele lyaamba kuti:

•   “Balulami bayoozwidilila, alwalo luumuno luyoovwula.”​—Intembauzyo 72:7.

•   “Uyoovwuna mucete uukwiilila lugwasyo . . . Kukudyaamininwa akunkondo.”​—Intembauzyo 72:12, 14.

 Naaba mazuba aano, njiisyo zya Jesu zyakamantanya bantu banji mumasi aasika ku 239. Mbuli Banakristo, Bakamboni ba Jehova munyika yoonse bayiiya kuba basiluumuno. Kutegwa muzyibe zinji amubale Ngazi Yamulindizi iijisi mutwe wakuti “Kumana Penzi Lyakusulaikana.”