Jesu wakaambila basikwiiya bakwe kuti: “Muyooba bakamboni bangu . . . mane kusikila kumasena aakulamfwu kapati aanyika.” (Milimo 1:8) Mazuba aano, Bakamboni ba Jehova bali mukuuzuzikizya mulimo ooyu cabusungu. Pele, kumasena aambi aanyika, kubikkilizya akumasena kuli mweelwe munji kapati wabantu, bumboni tabunasika. Alimwi kumasi aambi kuli Bakamboni basyoonto. (Matayo 9:37, 38) Ino ncinzi ncotuli mukucita kutegwa tusikile bantu banji kapati?

 Kutegwa bagwasyilizye kuzuzikizya mulawo wa Jesu, bamu Kkomiti Yamulimo ya Kabunga Keendelezya ka Bakamboni ba Jehova balatuma bamisyinali kumasena aabulide munyika yoonse. Calino, kuli bamisyinali basika ku 3,090 nyika yoonse. a Ibanji bakatambula lwiiyo kucikolo ca Bbaibbele, mbuli Cikolo Cabakambausi ba Bwami. Bamisyinali balalyaaba kusiya maanda aabo akuunka kubusena bupya. Akaambo kakusima, ilwiiyo ndobatambula, alimwi aluzyibo, bamisyinali aaba basyomeka balagwasya kumwaya makani mabotu akupa citondezyo cibotu kuli basikwiiya bapya.

 Kuofesi yamutabi imwi aimwi, bamu Desiki Yababelesi Bamumuunda ya Dipatimenti Yamulimo babelekela antoomwe abamu Kkomiti Yamutabi kulanganya nzyobayandika bamisyinali, mbuli kwakukkala, busilisi, alimwi amali masyoonto aakubagwasyilizya. Mumwaka wamulimo wa 2020, Bakamboni ba Jehova bakabelesya mali aatandila ku $27 million (U.S.) kulanganya bamisyinali. Akaambo kazintu eezyi, bamisyinali balakonzya kubikkila maano kumulimo wakukambauka, alimwi akuyumya bakwesu mumbungano.

 Ino bamisyinali baugwasyilizya buti mulimo wakukambauka? Ba Frank Madsen, ibali mu Kkomiti Yamutabi waku Malawi, bakaamba kuti: “Akaambo kabusicamba bwabo aluzyibo, bamisyinali bagwasyilizya mbungano kutalika kubelekela muzilawo zikatazya, mbuli mumaanda aakwabilidwe alimwi amumasena mobabelesya mwaambo wakuzisi zimbi. Kuyungizya waawo, kubeleka kwabo canguzu kwiiya mwaambo wakubusena nkobatumwa ncikozyanyo cibotu kuli bamwi, alimwi balabagwasya kapati bana caboola kumulimo waciindi coonse. Tulamulumba kapati Jehova akaambo kabamisyinali.”

 Mukwesu wamu Kkomiti Yamutabi wakucisi cimwi wakaamba kuti: “Bamisyinali balatondezya kuti bantu ba Jehova balikamantene nyika yoonse. Nobaba baabo batali Bakamboni balabona kuti zilengwa tazitwaandaanyi, pele njiisyo zyamu Bbaibbele zyatugwasya kukamantana abunyina boonse.”

 Ino bamisyinali babagwasya buti bakwesu kubusena nkobatumwa? Ba Paulo, bakkala ku Timor-Leste, balabalumbaizya bamisyinali ibali mumbungano yabo. Bakaamba kuti: “Okuno nkotukkala kulapya citaambiki. Pele nokuba kuti bamisyinali bazwa kumasena aatontola, tabaleki kukambauka akaambo buyo kakuti kulapya. Lyoonse mafwumofwumo balajanika kumiswaangano yakulibambila kuunka mubukambausi. Ndilababona kabacita nyendo zyakupilukila syikati nokupide kapati, alimwi akumangolezya. Bagwasya bantu banji kwiiya kasimpe, kubikkilizya andime. Cabusungu, babelesya buumi bwabo kubelekela Jehova, alimwi eeci cilabakulwaizya boonse mumbungano kuzumanana kumubelekela Jehova.”

 Ba Ketti, bapainiya baciindi coonse ku Malawi, bakaamba banabukwetene bamwi bamisyinali mbobakaugwasyilizya mukwasyi wabo: “Ciindi bamisyinali aaba nobakatumwa kumbungano yesu, ndakali buyo Kamboni endikke mumukwasyi. Pele banabukwetene aaba bakandigwasyilizya, alimwi bakali kumvwana kapati amukwasyi wangu. Cikozyanyo cabo cibotu cakagwasya bana bangu kubona kubelekela Jehova mbokusololela kubuumi bukkomanisya. Ndilabalumba bamisyinali aaba nkaambo bakagwasya bana bangu botatwe kutalika bupainiya bwaciindi coonse, alimwi balumi bangu bakatalika kujanika kumiswaangano.”

 Ino mali aakubagwasyilizya bamisyinali azwa kuli? Azwa kumali aasangwa kumulimo wanyika yoonse, alimwi bunji bwamali aaya alasangwa kubelesya nzila ya donate.pr418.com. Tulamulumba kapati akaambo kazyakusanga eezyi zizwa ansi aamoyo.