Jehova Leza uyanda kuti bantu boonse baiye kujatikizya nguwe alimwi a Bwami bwakwe bwakujulu, tacikwe makani abukkale bwabo. (1 Timoteyo 2:3, 4) Akaambo kaceeci, Bakamboni ba Jehova balamwaya ma Bbaibbele amabbuku aagwasya kwiiya Bbaibbele mumyaambo minji, kubikkilizya amumwaambo wabasyaataambi. Mane buya, mbunga yesu yamwaya mavidiyo a manji kapati mumyaambo yakutambaika yiinda ku 100! Ino mbuti mbotwaapanga akwaamwaya mavidiyo aaya? Alimwi ino nkusumpuka nzi ikwaba kusikila lino?

 Mavidiyo aamumwaambo wakutambaika alamwaigwa abasanduluzi nyika yoonse. Musanduluzi umwi aumwi ulailanga-langa vidiyo yamu Cikuwa yeelede kusandululwa. Kumane, balalanga mbobakonzya kuusandulula mumwaambo wakutambaika mulumbe uuli mumo. Bamana kucita oobo, balalekkooda akupanga vidiyo. Calino, matiimu aali 60 alasandulula mavidiyo oonse aamba zyamu Bbaibbele mumwaambo wakutambaika, kumane matiimu aambi aali 40 asandulula buyo muziindi.

 Kaindi, cakali kudula kumwaya mavidiyo aamumwaambo wakutambaika. Makkamela aakkopa mavidiyo azibelesyo zimwi zyakali kudula kapati kwiinda mbocibede mazuba aano. Kuyungizya waawo, mavidiyo akali kupangilwa mumasitudiyo, alo ngotwakali kuliyakila, naa kubambulula mayake aakaliko kale. Mali woonse aakali kuyandika kutegwa tiimu yabasanduluzi bamumwaambo wakutambaika icikonzye kubeleka akali kwiinda a $30,000 b.

 Kutegwa mali aasangwa abelesyegwe kabotu, mbunga yesu yabeleka canguzu kujana nzila yakusumpula alimwi akuubya-ubya nzila zibelesyegwa mubusanduluzi. Aboobo tubelesya zibelesyo zyamazuba aano zyalo izibeleka kabotu alimwi zitaduli. Muciindi cakubelesya situdiyo, basanduluzi balalipangila situdiyo kwiinda mukubikka cisani canyanzabili kubwaanda mumaofesi aabo, mpoonya balapanga mavidiyo. Ciindi nokwayandika basikutambaika banji, bakwesu abacizyi balalekkooda zibeela zyabo kabali kuofesi naa kuŋanda, nkaambo situdiyo ilakonzya kupangwa kuli koonse.

 Twakapanga pulogilamu yamukkompyuta inoogwasyilizya basikutambaika ciindi nobabeleka mulimo wabo. Kusumpuka ooku kwagwasya kucesya ciindi ncobapanga vidiyo yamumwaambo wakutambaika. Bakwesu balalumba akaambo kakusumpuka ooku. Mukwesu Alexander wakaamba kuti: “Mavidiyo aamumwaambo wakutambaika alamwaigwa ziindi zinji kwiinda kaindi. Ndilikkomene kujatikizya ceeci. Ndileebelela mavidiyo aaya abuzuba.”

 Mazuba aano, tubelesya buyo mali aatasiki ku $5,000 kuula zintu nzyobayandika basanduluzi. Akaambo kaceeci, tulapanga mavidiyo manji aamumwaambo wakutambaika mumisyobo minji.

 Ciindi tiimu noyamana kupanga vidiyo yamumwaambo wakutambaika, mavidiyo ayelede kumwaigwa kubantu. Kaindi, twakali kupanga ma videocassette alimwi ama DVD, pele eeci cakali kudula, kutola ciindi, alimwi wakali mulimo mupati. Mavidiyo aaya akali kutolwa kukkampani iipanga mavidiyo kutegwa bakapange makkopi. Kuzwa waawo, ma videocassette aaya ama DVD akali kutumwa kumbungano. Mu 2013 mulikke, twakabelesya mali aayinda ku $2,000,000 kupanga ma DVD aamumwaambo wakutambaika.

 Basyaataambi bakalumba kapati akaambo kabubambe oobu. Nokuba boobo, mavidiyo aaya tanaakali mauba-uba kwaabelesya, kwaambisya akaambo kakuti akali kuyaabuvwula. Muziindi zimwi, kwakali kuyandika ma DVD manji kutegwa kupangwe buyo bbuku lyomwe lyamu Bbaibbele. Mukwesu umwi waku Brazil wazina lya Gilnei wakati: “Kufwumbwa notwakali kuyanda kubala lugwalo, twakeelede kujana videocassette yeelede mpoonya alimwi akujana lugwalo. Tiicakali cuuba-uba.” Mucizyi wazina lya Rafayane, iwakali kubelesya ma DVD amumwaambo wakutambaika, wakati: “Cakali kukatazya kucita ciiyo cako omwini. Twakali kutola ciindi cinji kuyandaula lugwalo naa malifalensi.” Alimwi ciindi bakwesu abacizyi nobakali kuunka mubukambausi, bakali kunyamunizya ama DVD naa videocassettes, aalo ngobakali kweebeleda a TV yamuntu uujisi luyandisisyo. Bakwesu bamwi bakali kunyamunizya atuncini tubelesya ma DVD. Pele, tiilyakalampa tuncini tubelesya ma DVD aajisi kasikkilini akatalika kupangwa, alimwi bakwesu banji bakatalika kwaabelesya. Ba Bobby, ibakkala ku United States, bakati: “Ciindi notwamana kutondezya lugwalo lumwi twakeelede kucinca akubikka DVD iimbi kutegwa tutondezye lugwalo lumbi. Eeci cakali kutola ciindi alimwi cakali kupa kuti kacikatazya kubelesya Bbaibbele mumibandi.”

 Mu 2013, mbunga ya Jehova yakapanga aapu ya JW Library Sign Language, yalo iizumizya bakwesu alimwi abacizyi kudauniloda alimwi akweebelela mavidiyo amumwaambo wakutambaika mumafooni naa mumatabbuleti. Kusaanguna aapu eeyi yakali buyo mumwaambo wakutambaika waku America. Mpoonya mu 2017, yakasumpulwa akuba amyaambo yoonse yakutambaika. Bakwesu alimwi abacizyi nyika yoonse bakakkomana kapati. Ba Juscelino, mukwesu waku Brazil, bakaamba kuti: “Tiindakasyoma pe! Ndakali kuyeeya kubona bamu Kabunga Keendelezya mbobatondezya luyando kulindiswe tobasyaataambi alimwi ambobayanda kuti tuzumanane kuyaambele kumuuya mbubonya mbuli baabo baambaula buya. Ndakakkomana kapati, alimwi aapu eeyi yakandikulwaizya kulibala Bbaibbele ziindi zinji.”

 Mazuba aano tulapanga mavidiyo mumyaambo yoonse yakutambaika mpoonya akwaamwaya awebbusaiti yesu alimwi amu aapu ya JW Library Sign Language. Akaambo kaceeci, mabbuku amumwaambo wakutambaika alakonzya kusandululwa, kulekkoodwa, alimwi akumwaigwa mumazuba buyo masyoonto kutali myezi naa myaka. Alimwi buya, izyakumwaya zyamumwaambo wakutambaika, zilamwaigwa aciindi comwe azyabaabo baambaula.

 Amubone nzyobakaamba bakwesu abacizyi basyaataambi. Mucizyi wazina lya Klízia wakaamba kuti: “Ino nimbunga nzi iikonzya kulanganya basyaataambi alimwi iilibambilide kupa cakulya cakumuuya munzila iilimvwisya alimwi nguuba-uba? Kunyina mbunga munyika iikonzya kweelanisyigwa azintu nzyoyatucitila mbunga ya Jehova.” Ba Vladimir bakaamba kuti: “Mavidiyo andiyiisya kuti Jehova ulababikkila maano basyaataambi mbubonya mbwacita kuli baabo baambaula buya.”

 Mavidiyo aaya inga alembedwe kuti: “Vidiyo eeyi taili yakusambala pe. Ilamwaigwa kaili cibeela camulimo wakuyiisya Bbaibbele iwanyika yoonse uugwasyilizyigwa akusanga kwakuliyandila.” Twamulumba kapati akaambo kazyakusanga zyanu, zyalo zyakacitwa kwiinda mukubelesya donate.pr418.com. Zyakusanga eezyi zyatugwasya kupanga ma Bbaibbele alimwi amabbuku aambi aabelesyegwa kwiiya Bbaibbele abantu boonse, kubikilizya abaabo babelesya mwaambo wakutambaika.