Mwaka amwaka babelesi baciindi coonse baalubazu kuzwa muzisi ziindene-indene balatambwa ku Cikolo ca Gileadi cicitilwa ku Patterson, New York. a Cikolo eeci cigwasya basicikolo mbobakonzya kwiicita kabotu milimo iindene-indene njobajisi mumbunga ya Jehova. Lwiiyo oolu lugwasya kuyumya akukkazikizya mulimo wamumuunda alimwi amulimo uucitwa mumitabi.

 Cikolo ca Gileadi ncikolo cabantu bazwa muzisi zyoonse. Mucikozyanyo, kkilasi namba 147 iyakacitwa mu 2019, yakajisi basicikolo ibali 56 kuzwa muzisi zili 29. Basicikolo baitwa kucikolo eeci mbabelesi baciindi coonse baalubazu mbuli baabo ibabelekela amutabi, balangizi bamabazu, bamisyinali naa bapainiya baalubazu.

 Kulibambila kulatalika kakucili kooko basicikolo kabatanatalika kwiiya. Mucikozyanyo, badipatimenti iilanganya makani aabweende kumaofesi mapati (WHQ Travel), balaula matiketi aabaabo ibatambwa kucikolo. Kujatikizya kkilasi namba 147, mweelwe waakati-kati wamali aakabelesyegwa kutegwa sicikolo omwe aunke alimwi akupiluka akali kusika ku $1,075 (U.S.). Basicikolo bazwa ku Solomon Islands bakatanta ndeke zili 4 kutegwa baunke ku Patterson, mpoonya akupiluka, bakatanta zyotatwe, antoomwe bakeenda makkilomita aayinda ku 35,400! Nkokuti sicikolo umwi aumwi wakabbadela mali aasika ku $2,300 (U.S.). Kutegwa batabelesyi mali manji, bamudipatimenti iilanganya makani aabweende, babelesya kkompyuta nobabbukiŋa kutegwa bajane kuccipide. Alimwi nokuba kuti bajatilila kale tiketi, pulogilamu eeyi yaakkompyuta ilabagwasya kubona naa myuulo yajoka-joka mumvwiki naa myezi iitobela. Kunze lyaboobo, dipatimenti eeyi ilaula matiketi kubelesya mapointi aazwa kumatiketi aakaindi aakabelesyegwa kale.

 Basicikolo banji bayandika ma visa kutegwa baunke ku United States. Kutegwa bacikonzye kubweza ma visa, badipatimenti iilanganya milawo balagwasyilizya. Mali aabelesyegwa kubbadelela ma visa alimwi azyakulembesya-lembesya alasika ku $510 (U.S.) sicikolo umwi aumwi.

 Ino tugwasyigwa buti alwiiyo ndobatambula basicikolo aaba? Ba Hendra Gunawan ibaalu ku Southeast Asia alimwi ibali mumbungano yomwe abanabukwetene bamwi ibakamana cikolo ca Gileadi, bakaamba kuti: “Kaindi, mumbungano yesu kwakanyina bapainiya baciindi coonse. Pele nobakaboola banabukwetene aaba, muuya wabo wakulyaaba abusungu wakabagwasya bamwi kutalika bupainiya abalo. Mukuya kwaciindi, mucizyi umwi mumbungano yesu mane wakanjila Cikolo Cabakambausi ba Bwami!”

 Ba Sergio Panjaitan, babeleka antoomwe abasikumanizya cikolo ca Gileadi amutabi umwi ku Southeast Asia. Bakaamba kuti: “Lwiiyo ndobakatambula tacili buyo cilongezyo kuli mbabo balikke, pele ncilongezyo akulindiswe. Bakaiya zinji kapati! Alimwi muciindi cakulibonesya kuti mbabayiide, babelesya luzyibo oolu kugwasya bamwi. Eeci cilatukulwaizya, aboobo andiswe tukulwaizya bamwi.”

 Ino mali aabelesyegwa kugwasyilizya cikolo eeci azwa kuli? Azwa kumali aasangwa kugwasyilizya mulimo wanyika yoonse, alimwi bunji bwamali aaya alasangwa kwiinda mukubelesya nzila imwi iili a donate.pr418.com. Tulalumba kapati ikusanga nkomucita camoyo woonse, kwalo ikugwasyilizya cikolo eeci.