Mumwaka wa 2020, kwakacitika ntenda zilicitikila zinji alimwi kwakabbuka abulwazi bwa COVID-19 nyika yoonse. Ino mbuti Bakamboni ba Jehova mbobakabagwasya aabo ibakajatikizyigwa?

 Mumwaka wamulimo wa 2020, a Kkomiti Yabeendelezi ya Kabunga Keendelezya yakazumizya kubelesya mali aasika ku $28 miliyoni b kukugwasyilizya muntenda zyakacitika. Mali aaya akabagwasya bantu bakacitikilwa ntenda ziinda ku 200 kubikkilizya abulwazi bwa COVID-19, maguwo manji, kupaya kwamaanzi ku Africa, nzala ku Venezuela, alimwi acilanga ku Zimbabwe. Aboobo akabeleka kuula zyakulya, maanzi, zisani, misamu alimwi azintu zyakubelesya kusalazya, kupanga akuyakulula maanda. Nzyeezyi zikozyanyo zisyoonto zyalugwasyo lwakapegwa.

 COVID-19. Bulwazi oobu bwakabajatikizya kapati bakwesu abacizyi munyika yoonse. Bamwi bakaciswa, kupenga mumizeezo alimwi akubula mali aakuligwasya. Kutegwa bagwasyigwe, kwakabambwa makkomiti aagwasyilizya nokwacitika ntenda ainda ku 800 nyika yoonse. Makkomiti aaya akali kulanga-langa nzyobakali kuyandika bakwesu akutuma malipooti cakufwambaana, calo cakali kugwasya bamu Kkomiti Yabeendelezi kuzyiba nzila mbotu yakubagwasyilizya.

 Mumwaka woonse, makkomiti aaya akabagwasya banji kujana cakulya, maanzi, izintu zyakubelesya mukusalazya alimwi amisamu iiyandika. Mpoonya mumasena aamwi, makkomiti aaya akali kubelekela antoomwe abaalu bakubusena oobo kugwasya bakwesu kutambula lugwasyo kuzwa kumfwulumende.

 Bantu batali Bakamboni bakakubona kusolekesya kwesu mukupa lugwasyo. Mucikozyanyo, ba Field Simwinga, babeleka mulimo wabu district commissioner ku Nakonde, Zambia, bakaambila bakwesu kuti: “Twamulumba kapati akaambo kalugwasyo oolu lwasika aciindi ceelede ndomwapa mikwasyi iijatikizyidwe.”

 Nzala ku Angola. Bulwazi bwa COVID-19 bwakapa kuti kubule zyakulya ku Angola alimwi akupa kuti zintu zidule kapati. Bakwesu abacizyi banji cakabayumina kapati kuula zyakulya.

 Mutabi waku Brazil wakalombwa kuti ugwasyilizye kwiinda mukutuma zyakulya kubakwesu baku Angola. Kutegwa mali aasangwa abelesyegwe kabotu, bakwesu bakavwuntauzya cakulomya kujatikizya zyakulya anzila mbotu yakuzitumya, mpoonya bakaula zinji aciindi comwe. Aboobo, mweelwe wamali wakuula akutumya bbokesi yomwe yazyakulya wakali kutandila ku $22, mpoonya yakali kulema makilogilamu aatandila ku 20. Mubbokesi imwi aimwi mwakali mupunga, nyabo asaladi. Kusika lino, mabbokesi aali 33,544 aalema makilogilamu aali 654,000 akatumwa. Kusanganya azyakajanwa mucisi mweena, zyakulya eezyo zyakagwasya kusanina bantu bainda ku 50,000!

 Ino bakwesu balimvwa buti kujatikizya lugwasyo oolu? Ba Alexandre, ibakkala muminzi ku Angola bakaamba kuti: “Oobu mbumboni bwakuti Jehova ulandiyanda akuti tandili ndelikke pe. Ndilayandwa kapati ambunga ya Jehova!” Ba Mariza, muzyali uuli alikke, bakati: “Jehova wakakumvwa kulila kwangu. Ndilamulumba walo alimwi ambunga yakwe!”

 Lugwasyo Kucilanga Cakacitika ku Zimbabwe. Mumwaka wamulimo wa 2020, kwakali cilanga mu Zimbabwe, calo cakapa kuti mamiliyoni aabantu babe anzala mpati. Bakamboni banji kapati mucisi eeci tiibakajisi cakulya cikkwene.

 Kwakabambwa makkomiti aagwasyilizya nokwacitika ntenda aali 5 kutegwa agwasye kujanina bakwesu zyakulya. Basikumwaya banji bakagwasyilizya kuzibikka antoomwe zyakulya, alimwi akupa myoota yabo kuti ibelesyegwe. c Mumwaka wamulimo wainda, mali aasika ku $691,561 akabelesyegwa kuula zyakulya zyakagwasya bakwesu bainda ku 22,700!

 Zimwi ziindi, kwakali kujanwa kuti ciindi nolwakali kusika lugwasyo oolu, zyakulya zyabakwesu zyakalimanide kaindi. Nobakali kuzitambula zyakulya, bakwesu bakamutembaula Jehova. Mane buya bamwi bakatalika kwiimba nyimbo zya Bwami.

 Kubusena bumwi, Bakamboni bobilo bamukabafwu bakajanika kumuswaangano wamumunzi iwakali kwaamba kujatikizya lugwasyo lwacakulya cakali kuyoopegwa akabunga kamwi katali kamfwulumende. Pele muswaangano ooyo wakatalika kutozya kumapolitikisi, aboobo bamacizyi aaba tiibakazumina ncobakaambilwa kucita kutegwa bapegwe cakulya. Nobakali kuzwa, beenzinyina bakabafwubaazya akubaambila kuti, “Mutakabooli kulomba cakulya kulindiswe!” Nokuba boobo, kwakainda buyo nsondo zyobilo, bakwesu bakasika kubusena oobo akubapa cakulya bamacizyi aaba kacitanasika akusika cakulya cakali kuzwa kukabunga katali kamfwulumende!

 Kugwasyilizya kuntenda yakacitika ku Zimbabwe kwakapa abumboni bubotu kubantu. Mucikozyanyo, amumvwe cakuluula caba Prisca, ibakkala mukanzi kamwi. Nokuba kuti cilanga cakaleta mapenzi aataambiki, nsondo ansondo muli Bwatatu amuli Bwasanu, ba Prisca bakali kuunka mubukambausi nomuba muciindi camainza. Bantu mumunzi bakali kubasampaula akubaambila kuti: “Uyoojazya mukwasyi wako anzala akaambo kabukambausi bwako oobo.” Ba Prisca bakali kubaingula kuti: “Jehova kunyina nabalekelezya babelesi bakwe.” Tiilyakalampa, bakatambula lugwasyo lwacakulya kuzwa kumbunga yesu. Eeci cakabagambya basimukobonyina bamwi akwaambila ba Prisca kuti: “Leza kunyina naakamulekelezyede, aboobo tuyanda kwiiya zinji kujatikizya nguwe.” Basimukobonyina bali 7 lino balaswiilila miswaangano yambungano iimwaigwa awailesi.

 Mbotuyaabuswena kumazuba aamamanino, ntenda zilicitikila zilazumanana. (Matayo 24:3, 7) Bwaabi mbomutondezya muzyakusanga zyanu kubelesya nzila zisiyene-siyene izili a donate.pr418.com zilalumbwa kapati. Zilapa lugwasyo lweelela alimwi aaciindi ceelede.