Mumwaka wamulimo wa 2021, a bantu bakazumanana kupenga akaambo kabulwazi bwa COVID-19. Kweelana ambocitondezya cibalo cakuti “Kugwasya Bakwesu Nyika Yoonse Lyabulwazi bwa Covid-19,” twakabelesya mamiliyoni aama dollar b kupa lugwasyo alimwi kwakapangwa ma Kkomiti Aagwasyilizya Nokwacitika Ntenda aainda ku 950.

 Nokuba kuti bulwazi oobu bwakapa bantu kupenga kapati, kwakali ntenda azimbi zilicitikila alimwi azipangwa aabantu izyakabajatikizya bakwesu abacizyi nyika yoonse. Mukugwasyilizya kuntenda eezyi ziinda ku 200, Kkomiti Yabeendelezi ya Kabunga Keendelezya yakazumizya kuti kubelesyegwe mali aasika ku $8 miliyoni kuyungizya amali aakabelesyegwa kugwasyilizya lyabulwazi bwa COVID-19. Amubone zyakusanga zyanu mbozyakabelesyegwa kugwasyilizya baabo ibakajatikizyigwa muntenda zyobilo zyakacitika caino-ino.

 Mu May 22, 2021, Cilundu ca Nyiragongo, icili mu Democratic Republic of the Congo cakaanduka akutalika kugwisya mulilo. Mulilo ooyu wakanyonyoona maanda, zikolo, alimwi abusena bwakuyobweda maanzi. Pele mulilo ooyu tiiyakali ntenda ilikke yakaliko. Nokwakainda mazuba aali 4 kuzwa cilundu nocakaanduka, kwakaba lusuko lubyaabi mudolopo lya Goma ilwakazwa kucilundu alimwi kwakacitika amizuzumo yanyika iili mbwiibede yatakajisi nguzu kapati. Bunji bwabantu bakalaililwa kuzwa mudolopo. Bantu banji kapati bakazwa, bamwi bakaunka kucisi ca Rwanda.

 Akati kabaabo bakazwa kwakali Bakamboni ba Jehova batandila ku 5,000. Kwaanduka kwacilundu kwakapa kuti bamwi basweekelwe maanda aabo; mpoonya bamwi bakabbidwa zintu nobakazwa mumaanda aabo. Makkomiti aagwasyilizya nokwacitika ntenda aamu Rwanda alimwi amu Democratic Republic of the Congo akabelekela antoomwe kupa lugwasyo. Kujatikizya kkomiti imwi iigwasyilizya nokwacitika ntenda, mutabi waku Congo (Kinshasa) wakapa lipooti yakuti: “Nokuba kuti zintu zyakalinyongene mudolopo alimwi malailile aakuzwa mumaanda tanaakalinapegwa aciindi aawa, kkomiti yakalitalikide kale kupa zyakulya, meenda, ngubo alimwi azisani.” Mudolopo imwi mwalo bakwesu bainda ku 2,000 mobakakkede, kkomiti yakababikkila matente, kubapa ma mask, alimwi akubapandulwida mbobakali kukonzya kweeleba kuyambukilwa bulwazi bwa COVID-19 a cholera.

 Mumyezi buyo yotatwe kuzwa noyakacitika ntenda, bakwesu bakaabila mupunga uulema ma kg aainda ku 6000, busu bwamapopwe bwiinda ku 6000 kg, malita aa saladi aainda ku 8000, alimwi amalita aameenda aainda ku 8000. Kutegwa kutabelesyegwi mali manji, mutabi wakabikka bubambe bwakuti kuulwe zyakulya zinji mucisi momunya muciindi cakuula zyakulya zidula kapati kunze aacisi.

 Mucizyi umwi iwakanyonyweedwa ŋanda yakwe mpya wakaamba kuti, “Twakalityompedwe kapati alimwi myoyo yakali kucisa.” Pele banamukwasyi wakwe bakazootambula lugwasyo lwakumubili alimwi alwakumuuya. Lino mucizyi waamba kuti: “Kwiinda mukugwasyigwa a Jehova, tucijisi zintu nzyotuyandika. Twalibonena kuti Jehova ulainyamuna mikuli yesu alimwi upa kuti cuubaube kulindiswe kwiinyamuna.”

 Kwamyaka minji cisi ca Venezuela cili mupenzi lyakubula mali. Bakwesu bamucisi eeci balaliyumya mubukkale bukatazya, kubula zyakulya, alimwi akuyungizyika kwabugwebenga. Nokuba boobo, mbunga ya Jehova kunyina noyabalekelezya pe.

 Mumwaka wamulimo wainda, mali aainda ku $1.5 miliyoni akabelesyegwa kuula alimwi akunyamuna zyakulya ansipa kutola kumikwasyi yakali kuyandika lugwasyo. Mutabi wa Venezuela wakapa lipooti yakuti: “Tacili cuubauba kutola zyakulya zilema ma kg aali 130000 mumasena oonse amucisi mwezi amwezi, mpoonya akuba masimpe kuti bakwesu bayandika lugwasyo bazitambula.” Kutegwa zyakulya kazitanyongani, kanji-kanji bakwesu inga baula zikonzya kukkala kwaciindi cilamfwu. Lipooti yakazumanana kuti: “Tuula zyakulya mubunji alimwi amuziindi myuulo noili ansi. Mpoonya tulazituma kubelesya nzila iitaduli kapati.”

 Ba Leonel, ibamu Kkomiti Iigwasyilizya Nokwacitika Ntenda ku Venezuela, balaukkomanina mulimo wabo. Bakaamba kuti, “Mulimo wakugwasyilizya nokwacitika ntenda ulilibedelede. Mulimo ooyu wandiyumya kapati kuzwa ciindi bakaintu bangu nobakafwa akaambo kabulwazi bwa COVID-19. Ndijisi bubi kugwasya bakwesu ibayandika lugwasyo. Ndalibonena cantongolameso Jehova mbwazuzikizya cisyomezyo cakwe cakutabalekelezya bantu bakwe.”

 Umwi mukwesu iwakagwasyigwa, wakali kubelekela mukkomiti iigwasyilizya nokwacitika ntenda kaindi. Wakaamba kuti, “lino ndime ndakali kuyandika lugwasyo, alimwi tiitwakatambula buyo lugwasyo lwakumubili pe. Kuyungizya waawo, bakwesu bakatugwasya mebo abakaintu bangu kukkalwa moyo. Bakatubikkila maano, kutuumbulizya alimwi akutukulwaizya.”

 Ntenda zimwi zilacitika kakunyina kuzibisyigwa. Nokuba boobo, akaambo kazyakusanga zyanu kumulimo wanyika yoonse, mbunga ya Jehova kanji-kanji ilacikonzya kugwasyilizya cakufwambaana. Nzila zimwi zyakusanga zilitondezyedwe a donate.pr418.com. Tulamulumba kapati akaambo kabwaabi bwanu.