Bbaibbele lyakasinsima kuti “cisi ciyoobukila cisinyina” alimwi kuyooba ntenda ‘kumamanino aabweende bwazintu.’ (Matayo 24:3, 7) Twakabona majwi aaya aabusinsimi kaazuzikizigwa mumwaka wamulimo wa 2023. a Pele nokuba kuti kwakali nkondo antenda zilicitikila mumasena aatandila ku 100, Bakamboni ba Jehova bakamwiiya Jehova mukutondezya luyando. Mubuti?

 Mumwaka wamulimo wa 2023, bakwesu abacizyi bakajatikizyigwa antenda zilicitikila naa eezyo ziletwa abantu ziinda ku 200. Mbunga zizumizyidwe amulawo zibelesyegwa a Bakamboni ba Jehova, zyakabelesya mali aayinda kumadola b aali 10 miliyoni kuzwa kumali aakasangwa kumulimo wanyika yoonse kugwasya bakwesu bakacitikilwa ntenda. Aaya mali ayungizyidwe kuli yaayo bakwesu abacizyi banji ngobakabelesya kugwasya baabo bakali kuyandika lugwasyo mucilawo cabo. Amubone zyakusanga zyanu mbozyakabelesyegwa kugwasya baabo bakajatikizyigwa muntenda zyobilo buyo akati kantenda zinji izyakabajatikizya bakwesu.

 Masena aamwi aaku Nigeria kanji-kanji inga alajatikizyigwa akupaya kwamaanzi. Nokuba boobo, kupaya kwamaanzi ikwakacitika mu October 2022 kwakali kubyaabi kapati kutanacitikide mumyaka iili 10. Busena bulampa mahekeli aayinda ku 676,000 bwakanyonyoonwa, alimwi bantu bainda ku 2 miliyoni bakasiya maanda aabo. Cakufwambaana bamutabi waku Nigeria bakasala Makkomiti Aagwasyilizya Nokwacitika Ntenda kuti bape lugwasyo luyandika kumubili akumuuya.

•   Basikumwaya bali 7,505 bakasiya maanda aabo

•   Maanda aali 860 akanyonyooka asyoonto naa kunyonyookela limwi

•   Maanda aa Bwami aali 90 alimwi a Ŋanda Yakucitila Miswaangano Mipati yomwe zyakazula maanzi

 Kwakabelesyegwa mali aayinda kumadola aali 250,000 kugwasya babo bakacitikilwa ntenda. Nzyeezi zimwi zyakacitwa amali aaya:

•   Kuula zyakulya mbuli laisi, nyabo, ama noodles

•   Kuula zyakubelesya mumaanda mbuli mamatilesi atunsabwe twamansenya

•   Kubambulula naa kuyakulula maanda aakanyonyooka

 Ino mbuti bakwesu mbobakasinizya kuti mali aasangwa abelesyegwa kabotu? Nzila imwi nkwiinda mukulanga-langa mayake amwi aamwi akubona naa akali kuyandika kubambululwa. Ikuti kwajanika kuti mayake akali kuyandika kuyakululwa, akali kuyakwa munzila nguba-uba kweelana amayake aadumide kubusena ooko.

 Bakwesu abacizyi ibakapegwa lugwasyo bakalumba kapati. Mucizyi umwi wakati: “Kupaya kwamaanzi kwakanyonganya maumi eesu nkaambo myuunda yesu yakanyonyooka alimwi twakanyina maanda aakukkala. Twakakkomana kapati ciindi bakwesu abacizyi nobakaboola buzuba mbweena oobo kutugwasya akutupa masena aakwabilidwe aakukkala. Lugwasyo lupati lwakaboola ciindi notwakatambula zyakulya kuzwa kuofesi yamutabi. Cakatubula cakwaamba ikulibonena ameso eesu kuzuzikizyigwa kwa Johane 13:34, 35 mubuumi bwesu. . . . Luyando lwini-lwini ncobeni nkoluli. Mebo amukwasyi wangu woonse, kuzwa ansi aamyoyo yesu, tulabalumba kapati bakwesu akaambo kakuboola kutugwasya muciindi ceelede.”

 Ibamwi mucilawo bakalubona lugwasyo lwakapegwa. Mwami wamu cilawo caku Sabagreia, ku Bayelsa State wakaamba kuti: “Kuli mbunga naa zikombelo zinji munyika, pele Bakamboni ba Jehova balikke mbabacita cintu cili boobu. . . . Mbunga [yanu] ili akati kambunga ziinda kugwasya munyika.”

 Mu February 2023, mililo iinda ku 400 yakanyonyoona kapati ku Chile. Busena bulampa mahekeli aayinda ku 430,000, amayake aamwi aayandika ku Chile, akanyonyoonwa. Bantu babalilwa ku 8,000 bakalonzyegwa. Tiilyakalampa kuzwa noyakacitika ntenda, baku ofesi yamutabi bakatalika kubikka bubambe bwakugwasya bakwesu bakacitikilwa ntenda.

•   Basikumwaya bali 222 bakalonzyegwa

•   Maanda aali 20 akanyonyooka

 Kwakabelesyegwa mali aayinda kumadola aali 200,000 kugwasya babo bakacitikilwa ntenda. Nzyeezi zimwi zyakacitwa amali aaya:

•   Kuula zyakulya amaanzi

•   Kuula mungwimba, zibelesyo zyakusalazyila, alimwi amisamu

•   Kuyakulula maanda aakanyonyooka

 Mukwasyi umwi wakausa kapati nowakajana kuti zintu zyoonse nzyobakajisi zyakanyonyooka, kubikkilizya aŋanda yabo alimwi amakwebo. Eeci cakapa kuti mukwasyi ubule mali aakuula zintu ziyandika. Mumazuba aakusaanguna masyoonto, cakali kubacisa kapati kubona munzi wabo mbowakaba matongo. Pele nobakabona ŋanda yabo kaiyakululwa, bakatalika kuyaabulimvwa kabotu. Kubona luyando lupati ndobakatondezyegwa abasikulisungula kwakabagwasya kuliyumya. Mukwasyi ooyu wakakulwaizyigwa kapati cakuti bakasangana basikulisungula kugwasyilizya kuyakulula ŋanda yamukwesu umwi.

 Bunji bwabakwesu alimwi abacizyi bakakkomana kapati akaambo kalugwasyo ndobakapegwa. Mukwesu umwi wakati: “Bubambe bwa Jehova bwama Kkomiti Aagwasyilizya Nokwacitika Ntenda mbubotu kapati. Buzuba bwakatobela kuzwa ntenda noyakacitika, bakwesu aaba bakali kale abusena mpoyakacitikila ntenda kutegwa bape lugwasyo. Cilakulwaizya kapati kubala kujatikizya lugwasyo lupegwa ciindi nokwacitika ntenda mumasena amwi aamunyika. Pele kuti naa yakucitikila, inga ciliindene kapati. Mulailumba mbunga kapati; mulabona bakwesu abacizyi mbobaiya bube bwa Jehova; alimwi akubona mbobabikkila maano kwiinda mukuba masimpe kuti tulijisi nzyotuyandika kumubili, kumuuya alimwi amumizeezo. Tulalibonena ameso eesu luyando lwa Jehova.”

 Mbotuyaabuswena kumamanino aabweende bwazintu oobu, tulazumanana kubona ntenda kaziyaabuyaambele. (Luka 21:10, 11) Nokuba boobo, kwiinda mumbungano ya Bunakristo, tulabona kuti Mwami wesu siluyando Jesu Kristo, ulaandiswe “kusikila kumamanino aabweende bwazintu.” (Matayo 28:20) Bwaabi bwanu kwiinda mukusanga kumulimo wanyika yoonse, a donate.pr418.com alimwi anzila zimwi buyo, kubikkilizya akwaaba ciindi canu anguzu, kutondezya kuti mulabugwasyilizya Bwami a Mwami wambubo siluyando. Tulamulumba kapati akaambo kabwaabi bwanu.