“Ndali kulilangila kwamyaka iili 19 lino!” Ncinzi ncaakali kulangila musyomima ooyu? Bbaibbele lya Busanduluzi bwa Nyika Mpya bwa Magwalo aa Bunakristo aa Chigiriki mumwaambo wakwe waci Bengali. Ibanji mbobaamba oobu ciindi nolyamwaigwa Bbaibbele lya Busanduluzi Bwanyika Mpya mumwaambo wabo. Pele sena kuli nomwakalibuzyide zijatikizyidwe mukumwaya ma Bbaibbele aaya?

 Kusaanguna, basanduluzi balapegwa mulimo ooyu abamu Kkomiti Iilanganya Zilembwa ya Kabunga Keendelezya. Ino cibatolela ciindi cilamfwu buti basanduluzi kusandulula Bbaibbele? Ba Nicholas Ahladis, ibabelekela ku Translation Services ku Warwick, New York, bakaamba kuti: “Nzinji zibikkilizyidwe, mbuli mweelwe wabasanduluzi, mboukatazya mwaambo, basikubala mbobamvwisya ibuumi mbobwakabede nolyakasaanguna kulembwa Bbaibbele, alimwi akuti naa mwaambo ooyo ulaindana kweelana acooko nkowaambaulwa. Aboobo kanji-kanji inga catola mwaka omwe kusikila kumyaka yotatwe kusandulula Magwalo aa Banakristo aa Chigiriki, mpoonya myaka yone naa kwiinda waawo kusandulula Bbaibbele lyoonse. Pele mumyaambo yakutambaika cilatola ciindi cilamfwu kwiinda waawa.”

 Kunze aabasanduluzi, kulayandika abamwi basikugwasyilizya kutegwa Bbaibbele lisandululwe. Basikubala batali basanduluzi ibazwa mubukkale bwiindene-indene, zimwi ziindi mumasi aaindene-indene, balabulanga-langa busanduluzi, kucita oobo kakunyina kubbadelwa. Mizeezo njobapa ilabagwasya basanduluzi kumwaya Bbaibbele liluzi, litakatazyi kumvwa alimwi libotu kapati. Kayi, kweelana ambwaakaamba sikuyiisya basanduluzi ba Bbaibbele umwi kuti, “basanduluzi balimvwa kuba amukuli mupati kuli Jehova akubantu balibala Jwi lyakwe.”

 Amana kusandululwa ma Bbaibbele, alapulintwa akubikkwa antoomwe. Kutegwa cikonzyeke eeci, kumasena nkobapulintila kubelesyegwa zibelesyo zili 10: mapepa, inki, pepa ndyobabelesya kucivwumbyo, guluu, cover liners, silver leaf, malibboni, headbands, spine stiffeners, alimwi a capping material kutegwa Bbaibbele lijatane. Mu 2019, kwakabelesyegwa mali aainda kumadola aali 20 miliyoni kuula buyo zintu eezyi. Ibabelesi babelekela kumasena nkobapulintila bakabeleka mawoola aainda ku 300,000 mumwaka ooyu kutegwa bapange akumwaya ma Bbaibbele.

 Nkaambo nzi ncotubelesya mali manji boobu aciindi kumulimo ooyu? Ba Joel Blue baku International Printing Department bakaamba kuti: “Bbaibbele ndebbuku liyandika kapati kumabbuku oonse ngotumwaya. Aboobo tuyanda kuti mbolilibonya kalimulemeka Leza ngotukomba alimwi amulumbe ngotukambauka.”

 Kunze lyakupanga ma Bbaibbele aaya ngotubona lyoonse, tulamwaya ama Bbaibbele aabasikubala balema. Mucikozyanyo, Bbaibbele lya Busanduluzi Bwanyika Mpya lyaboofwu nkolili mumyaambo iili 10. Bbaibbele lyomwe buyo lyaboofwu lilakonzya kutola mawoola aali 8 kupanga, alimwi akaambo kakuvwula kwamapeeji, liyandika busena busika kumamita aali 2.3. Kuyungizya waawo, tulamwaya a Bbaibbele lyaalubazu lyabaange bali muntolongo nkobazumizya buyo mabbuku aajisi civwumbyo camapepa.

 Bbaibbele lya Busanduluzi Bwanyika Mpya lilabagwasya kapati aabo balibala. Amubone mbungano iibelesya mwaambo waci Kiluba ku Tombe, Democratic Republic of the Congo. Tombe mbusena bulampa makkilomita aali 1,700 kuzwa mudolopo mpati. Bakamboni bakubusena oobu bakajisi buyo Bbaibbele lyomwe, alyalo lyakali mumwaambo wakaindi waci Kiluba. Bakwesu bakali kucincana Bbaibbele eeli kutegwa balibambile zibeela zyamiswaangano. Pele kuzwa mu August 2018, boonse mumbungano eeyi balijisi Bbaibbele lya Busanduluzi Bwanyika Mpya likkwene alimwi ilili mumwaambo waambaulwa mazuba aano.

 Mucizyi umwi waambaula ci German wakaamba boobu kujatikizya Bbaibbele eeli mumwaambo wakwe: “Tandicaambi kuti ndeelede kulibala Bbaibbele. Muciindi caboobo, ndaamba kuti, ‘Ino ndiyoolibala lili?’” Mwaange umwi wakalemba kuti: “Ndakapegwa Bbaibbele lya Busanduluzi Bwanyika Mpya, alimwi lili mukucinca buumi bwangu. Tiindakalinalimvwisya Bbaibbele kusikila nondakabala busanduluzi oobu. Ndiliyandide kuzyiba zinji kujatikizya Bakamboni ba Jehova alimwi ambondikonzya kuba umwi wabo.”

 Babali boonse ba Bbaibbele lya Busanduluzi Bwanyika Mpya balikkomene kapati akaambo kazyakusanga zicitwa kutegwa Bbaibbele eeli limwaigwe. Zyakusanga eezyi zyamulimo wanyika yoonse zilacitwa kubelesya nzila zili a donate.pr418.com. Tulamulumba kapati akaambo kabwaabi bwanu.