“Kaindi, tiicakali kuyeeyelwa kuti naa inga twatambula cakulya cakumuuya kubelesya fooni naa tabbuleti.” Sena mulaazuminizya majwi aaya? Akali cibeela camakani ngaakapa Mukwesu Geoffrey Jackson mu Lipooti ya Kabunga Keendelezya #6 2020. Kumane wakazumanana kwaamba kuti: “Amweezyeezye buyo ibukkale mbobwali kunooba lyabulwazi oobu notwatalijisi zibelesyo mbuli JW Library App. Kwamyaka yoonse eeyi Jehova walikutugwasya kulibambila ibukkale mbuli boobu motubede.”

 Ino mbuti Jehova mbwatugwasya kulibambila? Ino mulimo nzi iwakacitwa mukupanga aapu ya JW Library, alimwi ncinzi ciyandika kutegwa kaibambwa kabotu akusumpulwa?

 Mu May 2013, bamu Kabunga Keendelezya bakalomba ba MEPS Programming, nkokuti dipatimenti iili kumaofesi mapati, kupanga aapu iijisi Bbaibbele lya Busanduluzi Bwanyika Mpya lyakalembululwa. Ba Paul Willies, ibabelekela ku MEPS Programming bakaamba kuti: “Kusikila leelyo, tiitwakalinamwaya kale aapu iili yoonse ku app stores. Aboobo, twakapanga tiimu, kucileka milimo iimwi, mpoonya akubelekela antoomwe amadipatimenti aambi kutegwa tupange aapu eeyi azili mumo. Twakapaila cakutaleka, alimwi kwiinda mukugwasyigwa a Jehova, aapu eeyi yakamwaigwa amuswaangano waamwaka myezi yosanwe buyo kuzwa noyakatalika kupangwa!”

 Lino buyumuyumu bwakatobela bwakali bwakupanga aapu eeyi kuba laibbulali yancobeni, iijisi zyakumwaya zinji, kutali buyo Bbaibbele, mpoonya kazili mumyaambo minji. Kuzoosika mu January 2015, bunji bwazyakumwaya izyakamwaigwa caino-ino zyakabikkwa mu aapu, kumane myezi iili 6 yakatobela, basikwiibelesya aapu bakali kukonzya kudauniloda zyakumwaya eezyo amumyaambo iimbi minji.

 Kuzwa leelyo, bakwesu baisumpula aapu eeyi munzila zinji. Babikka mavidiyo, kubikka zyoonse zyakumwaya zibelesyegwa lyamiswaangano yambungano mucibeela comwe, alimwi akupa kuti malifalensi aali mu Bbuku Ligwasya Kuvwuntauzya kaajanika cacigaminina mutupango twamu Bbaibbele.

 Aapu ya JW Library ilajalulwa atuncini tuli 8 miliyoni abuzuba, mpoonya mumwezi, atuncini twiinda ku 15 miliyoni! Ncinzi ciyandika kutegwa aapu eeyi kaibeleka kabotu atuncini ooto? Mukwesu Willies wakapandulula kuti: “Kupanga aapu takumani pe. Tulimukubeleka lyoonse kuyungizya zibeela zipya alimwi akwiibotya kutegwa kacuuba-uba kwiibelesya. Mbwaanga ma operating system aatuncini alacitwa apudeeti lyoonse, tuyandika kwiisumpula aapu yesu ciindi aciindi kutegwa kayeendelana ama operating system mapya. Mboziyaabuvwula zyakumwaya azyakalekkoodwa a JW Library, ayalo software yamukati iyandika kwiilanga-langa akwiisumpula.” Calino kuli zyakumwaya zibalilwa ku 200,000 alimwi azyakalekkoodwa ziinda ku 600,000 mumyaambo yoonse iiliko mu aapu.

 Kutegwa aapu izumanane kubeleka, kuyandika zintu zinji kunze buyo lyamakkompyuta. Kulayandika amapulogilamu aamu kkompyuta alo aaulwa buya. Pulogilamu yomwe buyo iikonzya kubelesyegwa mwaka omwe yuulwa $1,500 (U.S.). Kuyungizya waawo, ba MEPS Programming babelesya mali aasika ku $10,000 (U.S.) amwaka kuula tuncini kuzwa kuli basikupanga baindene-indene kutegwa babe masimpe kuti aapu ilabeleka amakkompyuta mapya, matabbuleti, alimwi aamafooni.

 Akaambo ka JW Library, mali aabelesyegwa kusimba zyakumwaya, kuzipanga alimwi akuzitola nkozyeelede kuunka acesyegwa kapati. Mucikozyanyo, atulange-lange kabbuku ka Kulingaula Magwalo Abuzuba. Twakasimba tubbuku tubalilwa ku 12 miliyoni twa Kulingaula Magwalo Abuzuba—2013. Pele kujatikizya twamu 2020, twakasimba buyo tubalilwa ku 5 miliyoni, nokuba kuti kwakali basikumwaya abamwi babalilwa ku 700,000 nyika yoonse. Nkaambo nzi ncokwakali kucinca ooku? Bakwesu abacizyi banji lino balubalila a JW Library a lugwalo lwabuzuba.

 Kuyungizya waawo, JW Library ilabagwasya munzila zinji basikwiibelesya. Ba Geneviève, ibakkala ku Canada, balimvwa kuti aapu eeyi yabagwasya kuba aciiyo cabo beni cisitikide. Bakaamba kuti: “Kwaamba masimpe, nikwali kuti lyoonse mafwumofwumo ndeelede kubungika mabbuku oonse ngondeelede kubelesya lyaciiyo, nindatali kucikonzya kucita oobo. Pele mbwaanga kuli aapu, ndibweza buyo tabbuleti yangu mpoonya ndilazijana zyoonse nzyondiyandika.” Kubala lyoonse kwandigwasya kuyumya lusyomo acilongwe cangu a Jehova.”

 Aapu eeyi yagwasya kapati kwaambisya muciindi ecino cabulwazi bwa COVID-19. Ba Charlyn, baku United States, bakapandulula kuti: “Mbwaanga kuli bulwazi bwa COVID-19 nyika yoonse, kunyina notwatambula zyakumwaya zipya zisimbidwe kwiinda amwaka omwe lino. Pele JW Library yapa kuti katujisi cakulya cakumuuya, alimwi ndilamulumba Jehova kucibelesyo eeci cibotu.”

 Bantu banji balimvwa mbuli ba Faye, ibakkala ku Philippines. Bakaamba kuti: “Ndibelesya aapu eeyi mbotu kuzumanana kubamba cilongwe cangu a Jehova. Njondibelesya kubala mafwumofwumo kanditanacita cintu cili coonse. Njondibelesya kuswiilila zyakalekkoodwa ciindi nondibeleka milimo yaaŋanda. Njondibelesya kulibambila miswaangano. Njondibelesya kulibambila kusololela ziiyo zya Bbaibbele. Ndileebelela mavidiyo aalinjiyo nonditajisi zyakucita. Ndilabala zibalo naa Bbaibbele nondilindila kucita cintu cimwi. Masimpe ncibelesyo cilibedelede.”

 Alimwi aapu eeyi yagwasya kapati mumulimo wamumuunda. Mucikozyanyo, naakali kukambauka, mucizyi umwi ku Cameroon wakali kuyanda kubelesya lugwalo ndwaakabona mucizyi umwi kabelesya nsondo zyainda. Pele, wakaluba mpolujanika lugwalo oolo. Wakaamba kuti: “Mucoolwe, ndakayeeya bbala lyomwe lili mukapango aako. Ndakaijalula aapu, akuunka ku Bbaibbele, mpoonya akuliyandaula bbala eelyo. Mpoonya-mpoonya ndakalujana lugwalo. Kwiinda mukubelesya aapu, ndilacikonzya kujana tupango tunji ntondilaakuluba.”

 Zyakusanga zyanu kubelesya nzila ziindene-indene zili a donate.pr418.com zyatugwasya kupanga, kubamba kabotu, akusumpula aapu ya JW Library kutegwa bakwesu abacizyi nyika yoonse kabaibelesya. Tulamulumba kapati kumuuya wanu wabwaabi.

1. October 2013—Aapu iijisi Bbaibbele lya Busanduluzi Bwanyika Mpya ilyakalembululwa yakamwaigwa

2. January 2015—Zyakumwaya zimbi zyakabikkwa mu Cikuwa, kumane kwakabikkwa azili mumyaambo iimbi minji

3. November 2015—Kwakabikkwa cibeela cipenta mabala

4. May 2016—Kwakabikkwa cibeela camiswaangano

5. May 2017—Kwakabikkwa cibeela cakulemba manooti

6. December 2017—Kwakabikkwa Bbaibbele lyamu Cikuwa litegwa Study Bible

7. March 2019—Basikubelesya aapu bakatalika kudauniloda zyakalekkoodwa, kweebelela mavidiyo aatacitidwe daunilodi, alimwi akujalula malifalensi aamu Bbuku Ligwasya Kuvwuntauzya.

8. January 2021—Kwakabikkwa zibeela zisumpukide zyabbuku lya Amupone Kukabe Kutamani!