Jehova ulakuyanda kuyiisya bantu bakwe. Akaambo kaceeci, mbunga yakwe yakatalisya zikolo zinji zyalo ziyiisya basicikolo kwiibeleka kabotu milimo njobapegwa mumulimo wa Jehova. Cikolo cimwi akati kazyeezyo ciitwa kuti Cikolo Cabakambausi ba Bwami (SKE). Mumyaka yainda, mbunga ya Leza yabikkila maano kutali buyo kuzintu ziyiigwa pele alimwi akumasena akuyiila. Mbaakani mpati njakusumpula masena akuyiila kutegwa kacibaubila bamayi alimwi abasicikolo. Ino zyakusanga zyanu zigwasyilizya buti kuzuzikizya mbaakani eeyi?

 Kwamyaka minji, zikolo zyabwami zyakali kucitilwa Mumaanda aa Bwami alimwi amu Maanda Aakucitila Miswaangano Mipati. Pele ino nkaambo nzi ncotuyakila naa kuyakulula masena alo aabelesyegwa buyo kuzikolo zya Bwami? Amubone twaambo totatwe.

 Zintu ziyandika kapati. Mukwesu Christopher Mavor sikugwasilizya mu Kkomiti ya Mulimo ya Kabunga Keendelezya wakaamba kuti: “Mitabi minji yakatuma malipooti kuti bayanda bakwesu abacizyi banji kutegwa kabagwasyilizya milimo. Mucikozyanyo mu 2019, ofesi yamutabi yaku Brazil yakali kuyanda basikumanizya cikolo ca SKE babalilwa ku 7,600 kutegwa balanganye milimo yamucilawo camutabi wabo.” Mutabi waku United States wakapa lipooti kuti bayanda bapainiya beelela ibakonzya kuyiisya bamwi bukambausi bwaalubazu bwakukambaukila kubuleya, kucito, alimwi akuntolongo. Alimwi kuyandika bakwesu bakonzya kubeleka mumulimo wa LDC alimwi amuma Kkomiti aa Hospital Liaison. Basikumanizya cikolo ca SKE balakonzya kugwasilizya kucita milimo eeyi.

 Kuyungizyika kwabasikulembela. Mitabi minji yakatambula mapepa aabasikulembela banji kwiinda namba yabantu ibakali kuyandika aciindi eeco. Mucikozyanyo, mutabi waku Brazil wakatambula mapepa aabaabo bayanda kunjila cikolo ca SKE aali 2,500 mumwaka omwe buyo. Pele akaambo kakuti tiibakajisi masena aakkwene aakucitila cikolo, bakacikonzya buyo kunjizya basicikolo ibali 950.

 Masena mabotu aakukkala. Ciindi basicikolo nobacitila cikolo mu Ŋanda ya Bwami naa mu Ŋanda Yakucitila Miswaangano Mipati, bunji bwaziindi inga basikila mumaanda aabakwesu abacizyi. Bubambe oobu bubeleka kabotu mumasena mucitwa zikolo buyo zisyoonto amwaka. Pele mumasena mucitwa zikolo zinji amwaka, inga tiicakonzyeka kubasikumwaya kutambula basicikolo kwamyezi minji. Aboobo, kulabambwa masena aabasicikolo aali aafwaafwi amakkilasi akuyiila.

 Busena ibujisi kkilasi yomwe, maanda aabamayi alimwi aabasicikolo basika ku 30, amasena amwi aakucitila milimo iimwi bulakonzya kutola mali manji kapati kweelana ankobubede naa twaambo tumwi.

 Zikolo zibambilwa mumasena mutakwe coongo, kulamfwu adolopo pele kufwaafwi akwiinda myootokala. Aboobo nobayandaula masena, basaanguna mumasena muli basikumwaya banji bakonzya kugwasyilizya mumilimo iiyandika kutegwa zikolo zyeende kabotu.

 Masena aaya alijisi malaibbulali, masena aakubalila, makkompyuta, mapulinta, alimwi azibelesyo zimwi. Bunji bwaziindi, inga kuli busena mwalo basicikolo alimwi abamayi mobalida antoomwe. Kuyungizya waawo, kuli masena nkobaunka kuyoonyanyaansya mubili akulikkomanisya.

 Makkilasi aalo alabambwa kabotu. Mukwesu Troy, uubeleka mu Worldwide Design/Construction Department ku Warwick, New York wakaamba kuti: “Twakalomba bamu Dipatimenti ya Zikolo Zyeendelezyegwa a Leza kuti batugwasye kuzyiba mbotukonzya kupanga makkilasi mabotu aakuyiila. Bakatupandulwida mbwaakeelede kukomena, kudekoletwa, malaiti aakali kuyandika alimwi azibelesyo zya audio-video izyakali kuyandika.” Kujatikizya kubikka zyaambawido, mwiiyi umwi wacikolo ca SKE wazina lya Zoltán uukala ku Hungary wakaamba kuti: “Kumatalikilo, tiitwakajisi zyaambawido, aboobo kanji-kanji twakali kubayeezya basicikolo kutola jwi mujulu ciindi nobapa bwiinguzi. Pele lino mbwaanga kuli caambawido atebulu limwi alimwi, penzi lyakamana!”

 Mbubotu nzi mbobajana bamayi alimwi abasicikolo? Mucizyi Angela wakajanika kucikolo ca SKE ku Palm Coast, Florida, U.S.A wakaamba kuti: “Busena mbubotu kapati. Zyoonse zibambidwe kabotu kubikkilizya amakkilasi, alimwi amaluumu eesu kutegwa katubikkila maano kukubala alimwi akwiiya.” Mukwesu Csaba, mwiiyi wacikolo ca SKE ku Hungary wakacikkomanina coolwe cakulida antoomwe abasicikolo. Eelyo wakaamba kuti aciindi eeci, “basicikolo balaanguluka kutwaambila zyakuluula zyabo alimwi eeci citupa coolwe cakuzyibana kabotu. Akaambo kaceeci, tubayiisya zintu zikonzya kubagwasya.”

 Basicikolo alimwi abamayi babona masena aaya kuba cilongezyo kuzwa kuli “Mwiiyi wesu Mupati,” Jehova. (Isaya 30:20, 21) Mucizyi wakucisi ca Philippines iwakajanika kucikolo ca SKE wakati: “Mbobubambidwe busena oobu cakatuyeezya kuti tatuli buyo basicikolo pele tuli beenzu baalubazu ba Jehova. Uyanda kuti katukkomana ciindi notubala Jwi lyakwe cakulomya.”

 Zikolo zilakonzya kuyakwa, kubambululwa, alimwi akulanganizyigwa akaambo kazyakusanga zyanu, bunji bwanzinzyo izicitwa kwiinda mukubelesya donate.pr418.com. Twamulumba kapati akaambo kabwaabi bwanu.