Kuvwula kwabantu babbapatizyigwa mwaka amwaka, kwapa kuti kuyandike mayake manji aakubelesya mubukombi bwa Jehova. Akaambo kaceeci, ba Local Design/Construction Department nyika yoonse bakabikka makanze aakuyaka naa kubambulula masena aakukombela aayinda ku 2,700 mumwaka wamulimo wa 2020. a

 Mukubula coolwe, makanze aaya akanyonganizyigwa akaambo kakubbuka kwabulwazi bwa COVID-19. Kutegwa bakwabilile bakwesu abacizyi alimwi akutobela malailile aamfwulumende, ba Kkomiti Iilanganya Zimwaigwa ya Kabunga Keendelezya bakaimika mayake manji nyika yoonse. Nokuba boobo, mumwaka wamulimo wa 2020, masena aakukombela aayinda ku 1,700 akayakwa alimwi akubambululwa kabutanabbuka bulwazi. Kuyungizya waawo, mayake mapati aajatikizya mitabi aayinda ku 100 akamana. Amubone mayake obilo aakamana mbwaabagwasya bakwesu.

 Mutabi waku Cameroon. Mutabi wakaindi iwakali ku Douala, wakali musyoonto kapati alimwi wakali kuyandika kubambululwa. Bamu Kkomiti Iilanganya Zimwaigwa bakayeeya kuti baubambulule mutabi ooyu, pele cakali kuyoodula kapati kulanga mbowakabede. Kunze lyaboobo, bakayeeya kuti bayake mupya abusena bumbi naa kuula mayake aayakidwe kale mpoonya akwaabambulula, pele nzila zyoonse eezyi tiizyakazwidilila.

 Aciindi eeci, bakwesu bakamvwa kuti Douala nkoyakali kunyika, bamfwulumende bakajisi makanze aakupanga mugwagwa wakali kwiinda afwaafwi abusena bumwi bwakucitila miswaangano mipati. Akaambo kamugwagwa ooyu, cakali kuyakuuba-uba kujana zimwi ziyandika mbuli malaiti, maanzi azimwi buyo. Bakumutabi ncobakali kuyanda eeci. Aboobo bamu Kabunga Keendelezya bakazumizya kuti kuyakwe mutabi mupya mpoonya abusena bucitilwa miswaangano mipati.

 Bakamboni alimwi ama contractor bakubbadela buya bakabelekela antoomwe amulimo ooyu, calo cakapa kuti mulimo ufwambaane kumana akuti kubelesyegwe mali masyoonto. Kwakayobolwa mali aayinda ku K40 miliyoni! Bamukwasyi wa Beteli bakalongela kumutabi mupya ciindi cisyoonto kabutanabbuka bulwazi bwa COVID-19.

 Bamukwasyi wa Beteli baku Cameroon bagwasyigwa kapati akaambo kakuti lino bakkala abusena bubotu, alimwi akubelekela abusena bubotu, mane buya mutabi mupya baubona kuti ncipego kuzwa kuli Jehova. Banabukwetene bamwi bakaamba kuti, “Ncotuyanda buyo nkubeleka canguzu akutondezya kuti tulacilumba cipego eeci citaliboteli.”

 Ofesi Yabasanduluzi (RTO) Yaku Tojolabal, Mexico. Kwamyaka minji, bakwesu basandulula mwaambo waci Tojolabal bakali kubelekela amutabi waku Central America, uuli afwaafwi a Mexico City. Pele mwaambo waci Tojolabal ubelesyegwa kapati ku Altamirano aku Las Margaritas—makkilomita aatandila ku 1,000 kuzwa ku Mexico City! Akaambo kaceeci, basanduluzi bakajisi buyumuyumu kuzyiba mabala ngobakali kubelesya bantu akaambo kakuti mwaambo ulacinca. Abalo bamutabi bakajisi buyumuyumu kujana bakwesu abacizyi afwaafwi ibakonzya kugwasyilizya mukusandulula akupanga zyakalekkoodwa.

 Akaambo katwaambo ootu, ba Kkomiti Iilanganya Zilembwa bamu Kabunga Keendelezya bakayanda kuti basanduluzi aaba balonge akuunka kubusena bantu nkobabelesya mwaambo waci Tojolabal. Kutegwa cikonzyeke, bamutabi bakaula mayake amwi akwaabambulula. Aboobo bakabelesya mali masyoonto kwiinda ngobakali kukonzya kubelesya nibakayaka maofesi mapya naa kulentiŋa buya.

 Musanduluzi umwi wakaamba mbwaakagwasyigwa: “Mumyaka iili 10 njondakabeleka mulimo wabusanduluzi amutabi, kunyina nondakaswaanganya muntu naba omwe waambaula mwaambo wangu. Lino maofesi eesu ali kubusena nkoubelesyegwa mwaambo waci Tojolabal. Ndilayanzana abantu baambaula ci Tojolabal buzuba abuzuba. Eeci candigwasya kwiiya mabala manji mapya aboobo mulimo wangu wasumpuka kapati.”

 Kujatikizya mwaka wamulimo wa 2021, ikuti bukkale buzumizye, kuli makanze aakuyaka ma RTO aali 75 alimwi amasena aakucitila zikolo zya Bbaibbele. Mulimo uujatikizya mayake aali 8 aamitabi ulazumanana, kubikkilizya amulimo mupya kumaofesi mapati waku Ramapo, New York, alimwi akulonzyegwa kwamitabi yaku Argentina a Italy. Kuyungizya waawo, kuyandika Maanda aa Bwami mapya aayinda ku 1,000. Kumane masena aakuswaanganina aayinda ku 6,000 aaliko lino taali kabotu aboobo ayandika kuyakululwa. Alimwi Maanda aa Bwami aali 4,000 ayandika kubambululwa.

 Ino mbuti mulimo woonse ooyu wakuyaka akubambulula mbougwasyilizyigwa? Mukwesu Lázaro González, wamu Kkomiti Yamutabi Waku Central America, wakawiingula mubuzyo ooyu naakali kwaamba zya RTO yaba Tojolabal. “Mucilawo cesu camutabi, tujisi zibelesyo zisyoonto. Aboobo, kakunyina lugwasyo lwabakwesu nyika yoonse, inga tiitwacikonzya kuyaka maofesi aabasanduluzi besu. Mali ngobasanga bakwesu nyika yoonse apa kuti cikonzyeke kubayakila maofesi basanduluzi kubusena buli afwaafwi ankoubelesyegwa mwaambo wabo. Tulabalumba kuzwa ansi aamoyo bakwesu nyika yoonse akaambo kabwaabi bwabo.” Inzya, milimo eeyi yamayake yakonzyeka akaambo kazyakusanga zyamulimo wanyika yoonse, ibunji bwanzizyo zitumwa kubelesya donate.pr418.com.