Kabunga Keendelezya kaliyandide kapati kutuyakila Maanda aa Bwami alimwi amasena aamwi aakukombela kutegwa atugwasye kuzuzikizya mulimo wakukambauka Bwami. Mucikozyanyo, mumwaka wamulimo wa 2023, mbunga zizumizyidwe amulawo zibelesyegwa amaofesi aamitabi aa Bakamboni ba Jehova zyakabelesya mali aayinda ku $500 miliyoni kuula, kuyaka, alimwi akubambulula Maanda aa Bwami Amasena Aakucitila Miswaangano Mipati nyika yoonse. a Mali aaya taanjili mumali aakabelesyegwa ambungano zili munyika yoonse kulanganya Maanda aabo aa Bwami.

Kuyungizya waawo, mali aaya aasangwa alabelesyegwa kuyaka akulanganya mitabi, yalo iigwasyilizya mukulanganya mulimo wakukambauka nyika yoonse. Twakaubya-ubya milimo iicitwa mumitabi kutegwa mali amwi kaabelesyegwa kuyaka akubambulula Maanda aa Bwami alimwi a Masena Aakucitila Miswaangano Mipati. Nokuba boobo, kucibelesyegwa mali manji kubambulula, kuyakulula, naa kulonzya mitabi. Nkaambo nzi milimo eeyi ncoiyandika kapati? Ino mitabi ili mukuugwasyilizya buti mulimo uuyandika kapati wakukambauka? Atubone.

Maofesi aamitabi manji akkala kwamyaka yiinda ku 30 naa 40. Mukwesu Nicholas wamu Worldwide Design/Construction Department, wakaamba kuti: “Naaba mayake aabambwa kabotu alanyonyooka myaka mboiyabuvwula. Ikwaabambulula kupa kuti acikonzye kukkala myaka minji.”

Ma Bbeteli alacincwa naa kubambululwa kutegwa milimo iili mukucitwa yeendelane aziyandika aciindi eeco mumbunga. Mweelwe wabasikumwaya nyika yoonse wayungizyika kapati kuzwa ciindi maofesi aamitabi manji naakayakwa. Kutegwa bacikonzye kuulanganya mweelwe ooyu mupati wabasikumwaya, kuyandika basikulisungula banji ibabelekela kumaofesi aayo. Akaambo kaceeci, maanda aa Bbeteli aakali kukkwana kabotu lino akaceya!

Kunze lyaboobo, bukwabilizi bwabantu abwalo ncintu ciyandika kubikkilwa maano. Akaambo kakuti tupona mumazuba aamamanino, ntenda zilicitikila izijaya ziyaabuvwula. (Luka 21:11) Kwiinda mukubelesya nzila zipya zyakuyaka ciindi nokubambululwa busena bumwi, tupa kuti bantu babelekela abusena oobo kabakwabilidwe. Ikwaayaka munzila zipya inga kwapa kuti, kwacitika ntenda masena aayo atanyonyooki, aboobo bakwesu balaabelesya kupa lugwasyo kuli baabo ibali muntenda.

Kwiinda mukuzumizyigwa a Kabunga Keendelezya, bakwesu bakatalika kubambulula maofesi aamitabi aali 43 mumwaka wamulimo wa 2023. Eeci caamba kuti mweelwe uutandila acisela camayake aa Bbeteli nyika yoonse akabambululwa munzila imwi. Amubone zikozyanyo zimwi zitondezya mbouyandika mulimo ooyu.

Angola. Ba Matt, bamu Kkomiti Yamutabi Waku Angola bakaamba kuti: “Tulaacoolwe cakubona businsimi bulembedwe ku Hagai 2:7 kabuzuzikizyigwa munzila yaalubazu. Mumyaka buyo iili 10, mweelwe wabasikumwaya wakayungizyigwa a 60 pesenti! Kutegwa tubalanganye basikumwaya aaba, mukwasyi wa Bbeteli wakeelede kuyungizyigwa ziindi zyotatwe. Pele akaambo kakuceya kwamayake tiitwakali kukonzya kutamba bantu banji. Eeci cakapa kuti bamukwasyi wa Bbeteli banji kabajisi mulimo munji alimwi akubeleka mawoola manji kwiinda ngobakeelede kubeleka.”

Bakwesu bakapegwa mulimo wakulanga-langa mbobakonzya kuukomezya mutabi. Kusaanguna, bakwesu aaba bakayeeya kuti cikonzya kugwasya akucitwa muciindi cisyoonto nkubambulula mutabi wakaliko kale. Pele nibakaavwuntauzya cakulomya makani aaya, bakajana kuti kubambulula tonookali muzeezo mubotu. Muciindi caboobo, bakapa muzeezo wakuti kuulwe bbyuudiŋi yakali buyo afwaafwi akwiibambulula. Ba Matt bakaamba kuti: “Muzeezo wakuula alimwi akubambulula bbyuudiŋi yakaliko kale nowakatolwa ku Kkomiti ya Mutabi ciindi cakusaanguna, twakalibilika kuti andiza bbyuudiŋi eeyi tiikonzyi kubota mbuli yakuliyakila. Pele lino twabona kuti kubambulula bbyuudiŋi njotwakaula kuleendelana anzyotwakali kuyanda. Jehova wakakulongezya kapati kusala nkotwakacita.”

Mutabi waku Angola inga waakuyandika kuyungizya kumbele. Nokuba boobo, bbyuudiŋi mpya, antoomwe atwaanda twakukwela naa tulonzyegwa buya (caravans) ituli amutabi, alimwi amaanda aakubbadelela aatali amutabi, apa kuti kube busena bukkwene bwabasikulisungula bayandika kulanganya basikumwaya bayaabuvwula.

Japan. Mayake aakusaanguna aamutabi akayakwa myaka iitandila ku 40 yainda alimwi inga abambululwa buyo muzibeela zisyoonto. Pele nokuba kuti bakwesu bakabeleka canguzu kwaabamba kabotu, mabbyuudiŋi aaya abeleka kwaciindi cilamfwu. Akaambo kaceeci, lino kuli mulimo mupati wakubambulula.

Buumi bwaa Bbeteli abwalo bwacinca kapati myaka mboiyabuyaambele. Kautanasika mwaka wa 2015, bamukwasyi wa Bbeteli bakali kujikilwa zyakulya zyoonse. Aboobo, maluumu nkobakali kukkala bamukwasyi akajisi buyo kancikini kasyoonto. Lino, bamukwasyi wa Bbeteli balalijikila zyakulya zinji. Aboobo, mumaluumu mapya ngobakayakilwa, ncikini bakaikomezya kutegwa kacibaubila kujika. Ba Kumiko, mucizyi uubelekela amutabi waku Japan wakaamba kuti, “Ndilalikwaya kapati muncikini iiliko lino, alimwi indipa kubugwasyilizya bubambe bupya ibuliko a Bbeteli.”

Mulimo uucitwa kumutabi waku Japan ncibeela ciyandika kapati camulimo wanyika yoonse. (Matayo 28:19, 20) Mutabi waku Japan ngumwi wamitabi yobilo iisimba Bbaibbele likkwene. Aboobo mulimo umwi iwazumanana kucitwa ngwakubikka muncini uutendaula mapepa akubwezelela lusuko luzwa kumapepa aayo ikukwabilila babelesi boonse. Kwakabelesyegwa mali aatandila ku $1 miliyoni ikuula akuubikka muncini ooyu, akuba masimpe kuti wazumanana kubeleka kabotu kutegwa mulimo wakusimba akutola mabbuku, kwaambisya ma Bbaibbele wazumanana.

Bakwesu bakabikkila maano kuti mulimo wakusimba ma Bbaibbele wazumanana ciindi nokwakali mayake. Ba Trey, umwi wamu Kkomiti ya Mutabi Waku Japan wakaamba kuti: “Ciindi camayake, mbunga yesu yakazumanana kumwaya ma Bbaibbele, alimwi bantu ibakali kuyanda ma Bbaibbele nyika yoonse bakali kuyaabuvwula. Madipatimenti manji alimwi abantu bakeelede kubelekela antoomwe kutegwa babikke madeeti aanotwakeelede kubikka muncini ooyu mupya alimwi anotwakeelede kusimba mabbuku.” Nokuba kuti kwakali buyumuyumu oobu, ma Bbaibbele aatandila ku 220,000 akali kusimbwa mwezi amwezi akati ka March a August 2023​—ciindi mulimo wakubikka muncini nowakabbebbede. Mulimo woonse ooyu wakacitwa kakunyina kuyungizya mali aakali kuyandika.

Mulimo wakubambulula uuli mukucitwa ulabikkilizya ambwaakonzya kubelesyegwa kabotu malaiti. Kulabikkwa ma solar panel mapya, alo aatiigwasye kuyobola mali aabalilwa ku $120,000 mwaka amwaka. Kuyungizya waawo, kulabikkwa mawindo aajisi magilazi otatwe, calo citiitugwasye kuyobola mali aabalilwa ku $10,000 mumwaka. Nokuba kuti zintu eezyi ziladula kapati, pele zilangilwa kuyobola mali aayinda ku $3.5 miliyoni ciindi coonse ncotunoozibelesya. Kunze lyaboobo zilacesya mbocinyonyooka cilawo.

Mayake obilo aaya aamutabi atondezya mulimo uuciyandika kucitwa kutegwa mitabi yesu kaitugwasya kuba anzyotuyandika. Aboobo mulimo nkoucili. Ba Aaron, ibabelekela mudipatimenti ya Worldwide Design/Construction bakaamba kuti: “Mulimo iwabelekwa munji kapati pele kucili zinji ziciyandika kucitwa.” Ino mulimo ooyu ulacitwa buti? Bakazumanana kwaamba kuti: “Kunze aamali aakasangwa cabwaabi, alo aakagwasyilizya mumayake aaya aayandika kapati, alimwi tulalumba kapati kumuuya wakulyaaba ngobakatondezya boonse bakalisungula kaindi abaabo ibali mukucinca bukkale bwabo kutegwa bakacite oobo kumbele. Kulisungula kwabakwesu amali ngobakasanga ncitondezyo cakuti Jehova ulaulongezya mulimo ooyu.”​—Intembauzyo 110:3.

Mulimo wesu wakuyaka akubambulula ulagwasilizigwa azyakusanga zicitwa cakuliyandila kwiinda mukubelesya donate.pr418.com. Tulamulumba kapati akaambo kabwaabi bwanu.