Nyimbo ncipego cibotu kapati kuzwa kuli Jehova. Zilakonzya kucinca mbotuyeeya, mbotulimvwa alimwi akutukulwaizya. Oobu mbozibede nyimbo zyesu zimbi. Mubwini, nyimbo eezyi zilakonzya kutujatikizya munzila zinji kwiinda waawa: zilakonzya kutupa kuswena munsi a Jehova.

 Kuzwa mu 2014, kwamwaigwa nyimbo zimbi iziinda ku 70, alimwi cilakkomanisya kuti nyimbo yomwe akati kazyeezyi ilajanika mumyaambo yiinda ku 500! Pele ambweni kuli nomwakalibuzyide kuti, ‘Ino mbaani babelekela anyimbo eezyi, alimwi ino zipangwa buti?’

 Nyimbi zimbi zilapangwa atiimu yabakwesu abacizyi ibabelekela kucibeela canyimbo mudipatimenti yiitwa kuti Audio/Video Services, yalo iisololelwa a Kkomiti Iilanganya Ziyiisyigwa ya Kabunga Keendelezya. Mutiimu iilemba nyimbo kuli bakwesu abacizyi bali 13. Bakwesu aaba bapanga tulimba-limba, kweendelezya bubambe boonse bwanyimbo, abamwi ibacita milimo iimwi kugwasyilizya bubambe oobu. Kuyungizya waawo, bamu Kkomiti Iilanganya Ziyiisyigwa bazumizya basikulisungula ibakonzya kubelekela kubusena nkobabede kuti bagwasyilizye mumulimo ooyu. Aaba babikkilizya basikulemba nyimbo, basikulizya ziimbyo, alimwi abaimbi. Bakwesu abacizyi aaba babelesya zipego nzyobajisi alimwi tabaliyandawidi mpuwo.

 Ino nyimbo ipangwa buti? Cakusaanguna, bamu Kkomiti Iilanganya Ziyiisyigwa balasala magwalo mpolunooyeeme lwiimbo alimwi ambolweelede kubapa kulimvwa baswiilizi. Mpoonya bamu tiimu yanyimbo balayandaula bakonzya kupanga akulemba lwiimbo oolo. Kumane balalekkooda kabeela kasyoonto buyo. Bamu Kkomiti Iilanganya Ziyiisyigwa balakalanga-langa kabeela aako akupa mizeezo. Bamana, bamu tiimu yanyimbo balabambulula muyandika mpoonya akululekkooda lwiimbo loonse. Nyimbo eezyi zilekkoodelwa mumasena aaindene-indene, nkokuti kumitabi naa kumaanda buya.

 Kutegwa bapange nyimbo akuzilekkooda, bakwesu babelesya makkompyuta, pulogilamu yaaintaneti iijisi nyimbo zyamanooti, malaibbulali aakkompyuta, azintu zimwi buyo. Kuyungizya waawo, mulimo ooyu uyandika zibelesyo mbuli ziimbyo, zilimba, ma amplifier, masipika alimwi amamaikkulofooni. Maikkulofooni yomwe ilakonzya kuulwa $100 naa kwiindilila a $1,000 (U.S.). Mu 2020, twakabelesya mali aasika ku $116,000 (U.S.) kuula zibelesyo ziyandika kunyimbo.

 Ino ncinzi ncobacita bakwesu kutegwa bayobole mali aasangwa? Muciindi cakuba atiimu mpati yabaimbi ku Beteli, ibanji babelesyegwa mbaasikulisungula babelekela kubusena nkobakkala. Kuyungizya waawo, muciindi cakwiita baimbi banji kuti bazoolekkoode abusena bomwe, bakwesu balaimba aumwi kubusena nkwabede, mpoonya nzyobaimba bazibikka antoomwe kubelesya pulogilamu yaakkompyuta.

 Bakwesu abacizyi balazikkomanina nyimbo zimbi. Ba Tara, ibakkala ku Germany, bakaamba kuti: “Nyimbo eezyi zilandigwasya ciindi nondilibilikide. Kuziswiilila mumwaambo wangu kundipa kulimvwa mbuli kuti Jehova wandikumbata.” Mukwesu umwi waku Kazakhstan, wazina lya Dmitry wakaamba kuti: “Ndilakkomana kuswiilila nyimbo eezyi kanditalibiliki kuti inga zyandipa kucita zintu zitaluzi. Alimwi buya, zindipa kubikkila maano kuzintu zyakumuuya.”

 Ba Delia baku South Africa bakaamba mbobalimvwa kujatikizya nyimbo eezyi, bakati: “Zindipa kuyumya lusyomo lwangu. Ciindi nonduuside naa nondijisi buyumuyumu, lyoonse inga kuli nyimbo iikonzya kundigwasya mubukkale oobo. Kanji-kanji, mbozilila buyo, zindipa kucinca mbondilimvwa!”

 Muntu umwi aumwi kuli nyimbo njakkomanina kapati. Ba Lerato, abalo baku South Africa, bakaamba kuti: “Lwiimbo lwakuti ‘Nyika Mpya Ilaafwaafwi’ alwakuti ‘Amweezyeezye Kuti Muli mu Paradaiso,’ oonse alandigwasya kweezyeezya ciindi nondiyoobatambula bamaama baakubusyigwa. Lyoonse nondiswiilila nyimbo eezyi, ndilababona bamaama kabandizuzila kutegwa bandikumbate.”

 Mukubusi uumwi waku Sri Lanka kuli mbwaakagwasyigwa kapati alwiimbo lumwi. Wakaamba kuti: “Bayi bangu basayaansi bakandisampaula kumbele lyabasicikoloma akaambo buyo kakuti ndili Kamboni wa Jehova. Ndakayoowa alimwi tiindakazyi cakucita. Nondakasika kuŋanda, bamaama bakandikulwaizya kuswiilila lwiimbo lwamu Cikuwa lwakuti ‘Study Makes You Strong.’ Lwakandigwasya kubona mbociyandika kuvwuntauzya akulibambila bwiinguzi. Buzuba bwakatobela, ndakaakubandika abayi bangu. Bakandiswiilila alimwi akwaamba kuti lino balazimvwisya nzyobasyoma Bakamboni ba Jehova. Ndilailumba kapati mbunga ya Jehova kutupa nyimbo eezyi zikulwaizya.”

 Ino mali aabelesyegwa kupanga nyimbo eezyi azwa kuli? Azwa kumali aasangwa kugwasyilizya mulimo wanyika yoonse, alimwi bunji bwamali aaya alasangwa kwiinda mukubelesya nzila imwi iili a donate.pr418.com. Tulamulumba kapati ikusanga nkomucita camoyo woonse.