Bakamboni ba Jehova balababikkila maano kapati bakombinyina. (1 Petro 2:17) Tobanabunji tulimvwa mbuli mbwalimvwa mucizyi Tannis waku Kenya. Wakaamba kuti, “ndilayandisya kapati kuzyiba cili mukubacitikila bakwesu abacizyi nyika yoonse.” Ino mucizyi Tannis, kubikkilizya amamiliyoni aa Bakamboni bamwi bazyiba buti zili mukucitika? Kuzwa mu 2013, eeci cali kukonzyeka kwiinda mukulanga acibeela ca Nyuuzi icili awebbusaiti yesu ya jw.org.

 Cibeela ca Nyuuzi cijisi malipooti aaluzi aamba makani aindene-indene aajatikizya Bakamboni ba Jehova, mbuli kumwaigwa kwama Bbaibbele mapya, mulimo wakugwasya nokwacitika ntenda, milimo yamayake, azintu zimbi ziyandika kapati. Cilatuzyibya zyabakwesu abacizyi baangidwe akaambo kalusyomo lwabo. Kuyungizya waawo, cilijisi azyakuluula zikulwaizya kujatikizya milimo yakukambauka yaalubazu alimwi a Ciibalusyo. Ino mbaani bavwuntauzya makani aamuzibalo eezyi alimwi ino zilembwa buti?

 Bakwesu ibabelekela mudipatimenti yiitwa kuti Office of Public Information (OPI) mbabalanganya cibeela ca Nyuuzi. Dipatimenti eeyi ili kumaofesi mapati alimwi ilasololelwa a Kkomiti Yabeendelezi ya Kabunga Keendelezya. Kulajanika bakwesu abacizyi ibainda ku 100. Bunji bwabo mbaasikulisungula ibabelekela mumaanda aabo mbuli balembi, basikuvwuntauzya, basikuzekaula alimwi abasanduluzi. Bamwi mulimo wabo nkubandika abalupati-pati bamfwulumende, basyaazibwene, bamayi alimwi abasimubweza twaambo. Dipatimenti ya OPI ilagwasyilizyigwa ama Public Information Desks (PID) aainda ku 80 aajanika mumitabi yesu nyika yoonse.

 Nobalibambila kumwaya cibalo, bamu OPI babelekela antoomwe abakwesu babelekela muma PID. Ciindi bakwesu nobabona makani aamwi ayelela kumwaigwa, balavwuntauzya kujatikizya makani aayo alimwi akubunganya twaambo twamasimpe. Zimwi ziindi, eeci cilakonzya kubikkilizya akubuzya-buzya alimwi akubandika abasyaazibwene. Bamanizya kubunganya twaambo toonse, cibalo ncobayanda kumwaya cilalembwa, camana cilalangwa-langwa, kubikkwa zifwanikiso kumane cilatumwa kutegwa bamu Kkomiti Yabeendelezi bakacizumizye.

 Ino bakombima balimvwa buti kujatikizya cibeela ca Nyuuzi? Mucizyi Cheryl, uukkala ku Philippines, wakaamba kuti, “Ndilakkomana kutalika buzuba bupya kwiinda mukubala nyuuzi iijatikizya mbunga ya Jehova alimwi abantu bakwe.”

 Babali banji balaamba kujatikizya lwiindano luliko akati kanyuuzi yaa jw.org ayakunyika. Mucizyi Tatiana, waku Kazakhstan, wakaamba kuti: “Ndilalumba kapati akaambo kakuzyiba kuti nyuuzi yaa jw.org ilasyomeka. Yaamba twaambo twamasimpe alimwi kunyina lusalululo.” Mucizyi Alma uukkala ku Mexico wakaamba kuti: “Mukwiimpana azintu zibyaabi nzyotumvwa anyuuzi iimbi buyo, cibeela ca Nyuuzi cijisi nyuuzi iikulwaizya.”

 Cibeela ca Nyuuzi tacijisi buyo makani aaluzi pele alimwi ciyumya lusyomo. Mukwesu Bernard, waku Kenya, wakaamba kuti: “Cibeela eeci candigwasya kubona kuti tuli mukwasyi omwe abakwesu abacizyi nyika yoonse, tacikwe makani abusena nkobabede. Ndilacikonzya kubikkilizya mazina aabo alimwi abukkale bugaminide mobabede mumipailo yangu.” Mucizyi Bybron, awalo uukkala ku Kenya, wakaamba kuti: “Lyoonse ndilakkomana ndabona cibalo caamba kujatikizya kumwaigwa kwa Bbaibbele mumwaambo uumbi! Zibalo izili boobu zindiyeezya kuti Jehova tasalululi.”

 Noiba nyuuzi yaamba kujatikizya bakwesu ibali mukupenzyegwa ilakonzya kutukulwaizya. Mucizyi Jackline waku Kenya wakaamba kuti: “Kuzinzibala kuyeeya busicamba bwabo kwaluyumya kapati lusyomo lwangu. Lyoonse ndilasolekesya kubona cibagwasya kuliyumya. Ndaiya kuti zintu bantu bamwi nzyobabona kuti ‘taziyandiki kapati’ mbuli kupaila, kubala Bbaibbele, alimwi buya akwiimba nzenzizyo zibagwasya kapati bakwesu kutegwa bazumanane kuyuma.”

 Mucizyi Beatriz uukkala ku Costa Rica ulalumba kapati kujatikizya nyuuzi yaamba ntenda zilicitikila. Wakaamba kuti: “Cibeela ca Nyuuzi candipa coolwe cakubona mbunga yesu mboipa lugwasyo ndobayandika bakwesu cakufwambaana alimwi munzila yaluyando. Eeci cindipa kusinizya kuti masimpe eeyi nimbunga ya Jehova.”

 Eelo kaka tulalumba kapati akaambo kanyuuzi yaamba zintu zili mukucitikila bakwesu nyika yoonse! Kusanga nkomucita kumulimo wanyika yoonse kwaambisya kwiinda mukubelesya nzila ya donate.pr418.com nkokupa kuti eeci cikonzyeke. Tulamulumba kapati akaambo kazyakusanga zyanu zizwa ansi aamoyo.