Kwamyaka iinda ku 10, tukkocci twakubikkila mabbuku twali cibeela camulimo wesu wakukambauka twalo itukwelelezya bantu. Munyika yoonse, bantu balatubona tukkocci ootu alimwi balizyi kuti ntwabani. Tukkocci ootu tulibonya kabotu alimwi ntuuba-uba kubelesya. Mulakonzya kuzumina ancobakaamba ba Asenata, mucizyi waku Poland, iwakati: “Nokuba kuti kapangidwe munzila nguba-uba pele kalibonya kabotu. Ntuuba-uba kubelesya alimwi akweenzya.”

 Sena kuli nomwakalibuzyide kujatikizya nzila mbotwakapangwa tukkocci ootu?

 Mu 2001, bamu Kabunga Keendelezya, bakazumizya bakwesu alimwi abacizyi baku France kusola nzila zisiyene-siyene zyabukambausi bwakubuleya, kubikkilizya akubelesya tukkocci. Bakasola kutupanga munzila zisiyene-siyene. Mucikozyanyo, bakatupanga munzila iilibonya mbuli tukkocci ntobanyamwida zibbeeke naa zintu mucintoolo kutegwa kabaambilizya akuyobweda mabbuku. Mukuya kwaciindi, bakumutabi wa France bakasala kutupanga munzila yomwe, alimwi basikumwaya balikutubelesya kwamyaka minji.

 Bakwesu baku France bakakkomana kapati akaambo kakuzwidilila mumulimo ooyu wakukambaukila kubuleya. Aboobo mu 2011, bamu Kabunga Keendelezya bakazumizya pulogilamu yakusola kukambaukila kubuleya mu New York City, ku U.S.A., kubelesya tukkocci alimwi amatebulu. Bapainiya ibakatola lubazu mupulogilamu eeyi bakabona kuti tukkocci tulaabubotu bunji, kubikkilizya akuti tatukatazyi kukuba. Bapainiya alimwi bakapa mizeezo iigwasya kujatikizya mbobakonzya kusumpula mbotupangidwe tukkocci. Ntobakapangide kusaanguna twakali kulema nkaambo twakali twakubeza, aboobo cakali kupa kuti kacikatazya kunyamuna kutola mujulu naa ansi mumasiteepu. Aboobo bakatubambulula kutegwa katutalemi kunyamuna, pele kutali tuuba maningi cakuti inga twawa amuwo. Kuyungizya waawo, ootu twakapangwa munzila mpya tujisi mavwili mapati alimwi mayumu, calo cipa kuti kacitakatazyi kutukuba mumugwagwa uutali kabotu. Kunze lyaboobo, tukkocci ootu tujisi kankomo kakubikkila mamagazini aamwi.

 Pulogilamu eeyi yakusola yakazwidilila! Aboobo mu 2012, bamu Kabunga Keendelezya bakazumizya kubelesyegwa kwatukkocci munyika yoonse. Bakwesu bakajana sikupanga walo wakali kukonzya kupanga tukkocci tunji kubelesya zibelesyo zyuuba-uba pele zikonzya kukkala kwaciindi cilamfwu.

 Mukwiinda kwamyaka, kwakaba kubambulula kusyoonto. Mucikozyanyo, mu 2015 bakatupangila mapulasitiki kutegwa katutateti nokwaboola mvwula. Ba Dina, bakkala kucisi ca Georgia, bakalumba akaambo kakusumpuka ooku. Bakaamba kuti, “Kakkocci lino kalijisi ‘raincoat’ yankako kukwabilila mabbuku.” Mu 2017, kwakapangwa zikwankwani zijisi mamagineti zyamumyaambo iimwi. Mukwesu Tomasz waku Poland, wakati: “Wakali mulimo mupati kucinca zikwankwani zyakanamatikidwe. Aboobo muzeezo wazikwankwani zijisi mamagineti mubotu.” Mu 2019, kwakaba kucinca kumwi kujatikizya zibelesyo zyakali kubelesyegwa kutupanga kutegwa katukonzya kukkala ciindi cilamfwu kapati.

 Tukkocci twakubikkila mabbuku tulapangwa akkampani yomwe alimwi akutumwa kumbungano zyoonse munyika. Calino, kakkocci komwe kaulwa mali aasika ku $43 U.S., kutabikkilizya amali aa transport alimwi azimwi. Kusikila lino, mali aainda ku $16 miliyoni U.S. akabelesyegwa kuula tukkocci. Alimwi tukkocci twiinda ku 420,000 twakatumwa kumbungano nyika yoonse.

 Kutegwa mali aasangwa abelesyegwe kabotu, tukkocci ootu tulaulwa mubunji. Kuyungizya waawo, mbungano lino inga zyooda tubeela tumwi twatukkocci muciindi cakooda tukkocci tupya.

 Basikumwaya munyika yoonse balakkomana kubelesya tukkocci. Ba Martina, bakkala ku Ghana, bakati: “Mumasena munji motukambaukila, ndiswe tweendela bantu. Pele cindikkomanisya kapati kujatikizya kubelesya tukkocci ncakuti bantu mbabatusikila. Nobaba basimweenda nzila balakonzya kukambaukilwa.”

 Mucisi cimwi camu Africa, mwaalumi uumwi wakasika akakkocci akubweza mabbuku aamumwaambo wakwe. Nokwakainda nsondo yomwe wakaboola alimwi akwaamba kuti: “Ndakaabala mabbuku oonse. Mulumbe uuli mumo ulayandika kapati. Ndiyoobaambila bamukwasyi wangu ndaakujoka kumunzi,” kwalo kwakali kulampa makkilomita aasika ku 500 (311 mi) kuzwa mudolopo. Nokwakainda myezi yobilo, wakajokela akwaamba kuti: “Bantu bakumunzi nkondizwa bakaabala mabbuku oonse, alimwi bakaukkomanina mulumbe uuli mumo. Bayanda kuba Bakamboni ba Jehova. Pele bajisi mibuzyo. Mucikozyanyo balamvwisya kuti, kutegwa muntu abbapatizyigwe weelede kubbila mumeenda. Pele, kumunzi nkotuzwa kunyina mulonga afwaafwi. Sena tweelede kusika kuno kutegwa tuzoobbapatizyigwe?” Basikumwaya bakapa mwaalumi ooyu fooni namba yamukwesu mupainiya waambaula mwaambo wakwe. Kuzwa leelyo, mwaalumi ooyu wakatalika kwiiya Bbaibbele cakusitikila.

 Cilakkomanisya kubona tukkocci mbotubelesyegwa kukambauka “munyika yoonse kuti bukabe bumboni kumasi oonse.” (Matayo 24:14) Ino mali aakuula tukkocci ootu azwa kuli? Azwa kumali aasangwa kumulimo wanyika yoonse, ibunji bwangawo alasangwa kwiinda mukubelesya donate.pr418.com. Twamulumba akaambo kabwaabi bwanu.