Ino Inga Ndacita Buti Kuti Kandijisi Cilengwa Cakweebelela Zyintu Ziletela Muzeezo Wakoonana

AMULIZYE

Ncomukonzya kucita

Amuzyibe ncocaamba kweebelela zyintu ziletela muzeezo wakoonana. Zyintu ziletela muzeezo wakoonana ninzila yakusola kutalemeka cintu Leza ncaakalenga kuti kacilemekwa. Kumvwisya ncocaamba kweebelela zyintu ziletela muzeezo wakoonana munzila eeyi kuyoomugwasya ‘kusula bubi.’—Intembauzyo 97:10.

Amuyeeye mapenzi aakonzya kuboola. Zyintu ziletela muzeezo wakoonana zibapa kubula bulemu aabo beebelelwa alimwi abaabo bazyeebelela. Kuli kaambo kabotu Bbaibbele ncolyaambila kuti: “Muntu uucenjede, abona mapenzi, ulayuba.”—Tusimpi 22:3.

Amusyomezye. Mwaalumi uusyomeka Jobu, wakaamba kuti: “Ndabika lukasyo ameso aangu, elyo awalo musimbi teendakamulanga.” (Jobu 31:1) Mulakonzya kusyomezya zyintu zitobela:

Tandikabelesyi Intaneti ciindi nendili ndelikke.
Ndiyooizima cakufwambaana website iili yoonse iitondezya micito yakoonana.
Ikuti naa ndainduluka kweebelela zyintu ziletela muzeezo wakoonana ndiyooambila mweenzuma uusimide.

Kweebelela zyintu ziletela muzeezo wakoonana kupa kuti lyoonse kamuyanda kuzyeebelela—kuti kamuvwula kuzyeebelela, cilakatazya kapati kuleka

Amwaapailile makani aaya. Sintembauzyo wakalomba Jehova Leza kuti: “Gwisya meso aangu kukulangilila zyabuyo.” (Intembauzyo 119:37) Leza uyanda kuti muzwidilile, alimwi kuti naa mwapaila kulinguwe ulakonzya kumupa nguzu zyakucita cintu ciluzi!—Bafilipi 4:13.

Amubandike amuntu umwi. Kusala mulongwe ngomukonzya kusyoma kanji-kanji nintaamu iiyandika kapati ciindi notuyanda kuleka cilengwa citali kabotu.—Tusimpi 17:17.

Kamuyeeya kuti: Kufwumbwa ciindi nomulikasya kweebelela zyintu zileta muzeezo wakoonana, mwazunda nkondo mpati. Amumwaambile Jehova kujatikizya kuzunda ooko, alimwi akumulumba akaambo kanguzu nzyaamupa. Kwiinda mukulikasya kweebelela zyintu ziletela muzeezo wakoonana, mukkomanisya moyo wakwe!—Tusimpi 27:11.