BAKUBUSI BALABUZYA
Ino Mbuti Kuti Kanditayandi Kuunka Kucikolo?
Ikuti mwaamba kuti tamuciyandi cikolo, ako nkaambo kalimvwisya nkaambo kuli bamayi bakatazya, kuyungwa abalongwe, misunko iikatazya alimwi akuvwula kwahomuweki. Mukubusi wazina lya Rachel a wakaamba kuti:
“Inga cabota kuti ndaunka kubusena bumwi buyo kwiinda kuunka kucikolo. Alimwi inga cabota kuunka kubbiicci naa kuba abalongwe naa kugwasya bazyali bangu kujika alimwi akusalazya!”
Ikuti naa andinywe mulimvwa mbuli Rachel, ciindi nomuli kucikolo inga kamulimvwa mbuli kuti muli muntolongo yalo njomweelede kuliyumya kusikila mukaangununwe ciindi mwaakumanizya. Sena kuli nzila mbotu mbomukonzya kucibona ciindi nomuli kucikolo?
Sena mulizyi? Ikuti mwatalika kucilanga munzila yeelede cikolo, mulakonzya kubweendelezya kabotu bukkale bwanu alimwi cikolo inga tiimwacibona kuba cintu cimwi ncomweelede kuliyumya. Muciindi caboobo, cikolo muyoocibona mbuli cibelesyo cikonzya kumugwasya kuyungizya luzyibo ndomuyooyandika mwaakukomena.
Kutegwa mucilange munzila yeelede cikolo, amubikkile maano kutwaambo tutobela:
Cikolo. Ciindi nomuyaabwiiya zinji, muyoocikonzya kulwana mapenzi ngomuyoojana kumbele kumulimo alimwi amubukkale bumwi bwamubuumi muciindi cakusyoma bamwi lyoonse. Amulibuzye kuti,‘Nokuba kuti kuli zintu zimwi nzyonditakkomanini kujatikizya cikolo, ino nimpindu nzi nzyondijana kucikolo?’
Njiisyo yamu Bbaibbele: “Kobambilila busongo bugwasya alimwi akuyeeya kabotu.”—Tusimpi 3:21.
Kutegwa muzyibe zinji, amubone cibalo cakuti: “Ino Mbuti Kuti Kandifeela Kucikolo?”
Zilengwa zyanu. Zintu zicitwa kucikolo zilakonzya kumugwasya kuceendelezya kabotu ciindi, kulilesya alimwi akuba muntu uubeleka canguzu—bube mbomuyooyandika mwaakukomena. Amulibuzye kuti: ‘Muunzila nzi zintu zicitwa kucikolo mbozindigwasya kuba muntu uulilesya alimwi mubelesi mubotu? Ino nkuyaambele kuli buti nkondikonzya kucita mumbazu eezyi?’
Njiisyo yamu Bbaibbele: “Mulimo uuli woonse uubelekwa canguzu ujanya mpindu.”—Tusimpi 14:23.
Kutegwa muzyibe zinji, amubone cibalo cakuti: “Ino Mbuti Mbondikonzya Kucibelesya Kabotu Ciindi?”
Mbomumvwana abamwi. Kuyanzana abasikolonyoko nomuli kucikolo kulakonzya kumugwasya kuba basilweetelelo alimwi akuba abulemu kubantu bamwi. Mukubusi musankwa ulaazina lyakuti Joshua wakaamba kuti: “Kwiiya mbomukonzya kubandika abantu cilayandika kapati mbubwenya mbociyandika kwiiya ciiyo ca history alimwi aca science. Bube oobu muyoobubelesya mubuumi bwanu boonse.”Amulibuzye kuti, ‘Ino nziiyo nzi nzyodaiya kucikolo kujatikizya mbondikonzya kuyanzana abamwi—nobaba baabo bazwa kumbi naa basyoma zintu ziindene anzyondisyoma?’
Njiisyo yamu Bbaibbele: “Amusungwaale kuyandaula luumuno abantu boonse.”—Bahebrayo 12:14.
Kutegwa muzyibe zinji, amubone cibalo cakuti “Mbuti Mbondikonzya Kunoobandika Kabotu Abamwi?”
Buumi bwanu bwakumbele. Cikolo cilakonzya kumugwasya kuzyiba zintu nzyomukonzya kucita alimwi akulibikkila mbaakani zyeendelana azintu eezyo. Mukubusi uumwi musimbi ulaazina lyakuti Brooke wakaamba kuti: “Mulakonzya kuyiisyigwa mulimo uugaminide, mbuli mbondakacita, kutegwa mwaakumanizya mukajane mulimo.” Amulibuzye kuti: ‘Mbuti mbondinoojana mali ndaakumanizya cikolo? Mbuti mbondikonzya kuba masimpe kuti nzyodiiya lino ziyoondigwasya kujana mulimo kumbele?’
Njiisyo yamu Bbaibbele: “Kobotya nzila imwiinda maulu aako.”—Tusimpi 4:26.
a Mazina aamwi acincwa.
Andiza Inga Mwaakkomanina Ayaaya
BAKUBUSI BALABUZYA
Ino Inga Ndacikonzya Buti Kulemba Homuweki?
Ikuti kamujisi penzi lyakulemba homuweki, nzila iikonzya kugwasya nkuba buyo amulongo uuli kabotu.
BAKUBUSI BALABUZYA
Ino Inga Tweendelana Buti Abayi Bangu?
Ikuti mujisi bayi bakatazya, tamweelede kulekela mapenzi aakucikolo kumupa kucileka cikolo. Amusole kutobela mizeezo eeyi.
