Myaka yabukubusi kanji-kanji inga myaka yakupona buumi buli kabotu alimwi bakubusi inga balijisi nguzu kapati. Nokuba boobo, kubakubusi bamwi tacili boobo akaambo kakuciswa-ciswa. Sena andinywe muli mubukkale buli boobu? Kuti kacili boobo, inga mwakulwaizyigwa anzyobakaamba ba V’loria, Justin, alimwi a Nisa​—boonse aaba Mbaakamboni ba Jehova. Amubone mbobacikonzya kuliyumya.

•  V’loria

•  Justin

•  Nisa

 Kuzwa ciindi nondakakkwanya myaka iili 14, ndali kuciswa bulwazi bupa milambi kucisa. (fibromyalgia) Nondakaba amyaka iili 20, ndakaciswa bulwazi bulya zifwuwa (arthritis), kufwumuka (lupus), alimwi abulwazi buboola akaambo kakulumwa nzengene (Lyme disease). Cilakatazya kucita zintu zyoonse nzyoyanda ikuti lyoonse ulimvwide kubula nguzu. Ziindi zimwi ndakali kulebuka mubili kuzwa mucibuno kuyakumaulu alimwi ndakali kweendela akacinga kabalema.

 Kunze lyakulimvwa bubi kapati akaambo kakuciswa kwangu, ndakali kukopana mumizeezo akaambo kakwaalilwa kucita tulimo tusyoonto-syoonto mbuli kulemba naa kujalula jaaki. Ndakali kubona bana basyoonto kabeenda, eeci cakali kundipenzya mumoyo nkaambo mebo cakali kundaalila kweenda. Ndakali kulimvwa kuti ndinyina mulimo pe.

 Mucoolwe ndakalijisi bantu ibakali kukonzya kundigwasya​—tabali buyo bamumukwasyi wangu pe, pele a Bakamboni ba Jehova mbondiyanzana limwi mumbungano mondizulilwa. Bunji bwaziindi, bantu bamumbungano bakali kundiswaya, eeci cakandigwasya kuti nditalendelelwi. Bamwi bakali kunditamba kumapobwe nokuba kuti tacili cuuba-uba kundigwisya akacinga kangu akundinjizya naa kundigwisya mumootokala.

 Bantu bapati bamumbungano bakali kundigwasya kapati nkaambo bakalizyi mbocili ciyumu kuciswa malwazi aali boobu. Bakandigwasya kubona kuti kuli zintu nzyondikonzya anzyonditakonzyi kucita, akutalipa mulandu akaambo kakwaalilwa kucita zintu nzyobacita bamwi. Ciindi nondili kumiswaangano yambungano alimwi amubukambausi, ndilakkomana kapati. (Bahebrayo 10:25) Ziindi zili boobu zilandigwasya kubona kuti tandiindeene kapati abantu bamwi nokuba kuti ndilaciswa.

 Tandilubi kuti Jehova ulatupa nzyotuyandika kutegwa tuliyumye. Mucikozyanyo, Bbaibbele lyaamba kuti “nokuba kuti buntu bwesu bwaanze buyaabunyonyooka, buntu bwesu bwamukati buyaabubukulusyigwa buzuba abuzuba.” (2 Bakorinto 4:​16) Masimpe, oobo mbombubo mbondilimvwa!

 Ncomweelede kuyeeya: Ikuti kamuciswa bulwazi bupati, ino nkaambo nzi ncociyandika kuba akati kabantu bamwi? Ikuti naa kamutaciswi, ino inga mwamugwasya buti muntu uuciswa?​—Tusimpi 17:17.

 Ndakawa ansi, pele ndakaalilwa kunyamuka. Ndakafwundilila alimwi tiindakali kukonzya kunyanyaala. Cakufwambaana bakanditola kucibbadela. Akusaanguna, bamadokota bakaalilwa kuzyiba cini cakalubide. Pele nondakawa kwaziindi zili mbozibede, bakabuzyiba bulwazi. Bakandijata abulwazi buboola akaambo kakulumwa nzengene. (Lyme disease)

 Bulwazi oobu bwakali kulwanina kapati kunsinga zyangu. Noliba lino buya, zimwi ziindi inga ndilazuzuma cakutajatika nokuba kuti kwainda myaka minji kuzwa nobakandijata abulwazi oobu. Kuli mazuba aamwi mubili wangu noucisa kapati alimwi minwe yangu noicisa kapati cakuti tandikonzyi kwiinyanyaasya. Cakali mbuli kuti manungo aangu akali aankalaya.

 Zimwi ziindi ndakali kuyeeya kuti ‘Ndicili mwana, tandeelede kuciswa boobu.’ Eeci cakali kundipa kunyema. Ndakali kumulilila Leza abuzuba akumwaambila kuti, “Ino nkaambo nzi ncondipengela boobu?” Mane buya ndakatalika kulimvwa kuti Leza wandilekelezya. Mpoonya ndakayeeya Jobu wamu Bbaibbele. Jobu tanaakali kukamvwisya kaambo ncaakacitikilwa mapenzi manji, pesi wakazumanana kusyomeka kuli Leza. Kuti naa Jobu wakacikonzya kuzumanana kuliyumya mumapenzi aatalivwulili, nkokuti andime inga ndacikonzya.

 Baalu bamumbungano mondizulilwa balandigwasya kapati. Balandiswaya lyoonse kutegwa babone naa ndilimvwide buti. Mwaalu umwi wakandaambila kuti inga ndamutumina fooni kufwumbwa ciindi kuti naa kuli ncondiyanda kwaamba. Ndilamulumba kapati Jehova abuzuba akaambo kakundipa balongwe mbuli baaba!​—Isaya 32:​1, 2.

 Zimwi ziindi notuciswa kapati, inga tulaluba kuti Jehova ulaabwene mapenzi aatucitikila. Bbaibbele lyaamba kuti: “Kowaala mukuli wako uuminya mumaanza aa Jehova, eelyo walo uyookulanganya.” (Intembauzyo 55:22) Eeci ncondicita abuzuba.

 Ncomweelede kuyeeya: Ino mbuti bantu mbomumvwana limwi mbobakonzya kumugwasya kuliyumya ciindi nomucisidwe?​—Tusimpi 24:10; 1 Batesalonika 5:​11.

 Nondakali amyaka yakuma 16, ndakajatwa abulwazi bwa Marfan syndrome​—oobu mbulwazi bwamumanungo ibupa kuti muntu abule nguzu. Bulwazi oobu bulakonzya kulwana moyo, meso, alimwi azizo zimwi ziyandika kapati. Talili lyoonse nondimvwa kucisa, pele kuti ndamvwa kucisa, inga cicisa ncobeni.

 Ciindi nobakandijata abulwazi oobu, ndakalila kapati. Ndakalilibilikide kuti tandinoocikonzyi kucita zintu zyoonse nzyondiyandisya kucita. Mucikozyanyo, ndilaciyanda kapati kuzyana, aboobo nondakaciyeeyela kuti buzuba bumwi cinooli ciyumu kucita boobo, alimwi akuti cinookatazya kweenda, eeco cakandipa kuyoowa kapati.

 Mupati wangu musimbi wakali kundigwasya kapati. Wakandiyumya-yumya kapati ciindi nondakali kulyeetezya akaambo kabulwazi bwangu. Wakandaambila kuti tiindakeelede kuyoowa pe, nkaambo eeco nocakandipa buyo kwiindila kuusa. Alimwi wakandikulwaizya kuti ndizumanane kupaila kuli Jehova nkaambo nguubuzyi kabotu bukkale bwangu.​—1 Petro 5:7.

 Lugwalo lumwi lundikulwaizya kapati ndugwalo lwa Intembauzyo 18:6 ilwaamba kuti: “Mumapenzi aangu ndakaita Jehova, ndakaluujisi kukwiilila Leza wangu kuti andigwasye. Mutempele lyakwe wakalimvwa ijwi lyangu, alimwi kukwiila kwangu kwakuti andigwasye kwakasika kumatwi aakwe.” Kapango aaka kakandigwasya kuzyiba kuti ciindi nondipaila kuli Jehova akumulomba kuti andigwasye kuliyumya, ulandimvwa akundigwasya. Alimwi lyoonse ulacita oobo.

 Ndaiya kuti tacilubide pe kuusa naa kutongooka akaambo kamapenzi aatucitikila lilikke kuti kulimvwa boobu kakutanyonganyi cilongwe cesu a Leza. Talinguwe uupa kuti katupenga, alimwi takatusiyi ikuti twamubikka mubusena bwakusaanguna mubuumi bwesu.​—Jakobo 4:8.

 Ncomweelede kuyeeya: Sena Leza weelede kupegwa mulandu akaambo kakupenga nkotupenga?​—Jakobo 1:​13.