Masimpe naa Nkubeja

1.   Kuti kojisi balongwe banji, kunyina noyoolendelelwa pe.

2.   Kuti kojisi balongwe aa Intaneti, kunyina noyoolendelelwa pe.

3.   Kuti kotuma-tuma tugwalo twaafooni, kunyina noyoolendelelwa pe.

4.   Kuti kocitila bamwi zintu, kunyina noyoolendelelwa pe.

 Ino nkaambo nzi?

•   Kuba abalongwe banji tacaambi kuti kunyina nomuyoolendelelwa pe.

   “Ndilababikkila maano balongwe bangu, pele zimwi ziindi ndibona kuti balo tabandibikkili maano.” Cipa kulimvwa kulendelelwa kapati kuti kojisi balongwe batatondezyi kuti balakuyanda nokuba kuti yebo ulabayanda.”​—Anne.

•   Kuba abalongwe aa intaneti tacaambi kuti kunyina noyoolendelelwa pe.

   “Bantu bamwi inga balijanina balongwe banji mbubwenya bamwi mbobasala kuba azidooli zinji. Pele kuba abalongwe munzila iili boobu, kunyina nokupa muntu kulimvwa kuti ulayandwa. Kuti kotajisi balongwe beni-beni, balongwe baa intaneti bali buyo mbuli zintu zitaponi, mbuli zidooli.”​—Elaine.

•   Kutuma-tuma tugwalo twaafooni tacaambi kuti kunyina noyoolendelelwa pe.

   “Zimwi ziindi kuti walendelelwa, cipa kuzumanana kulanga-langa afooni kutegwa ubone naa kuli mulongwe wakutumina kagwalo. Alimwi kuti kolendeledwe kale mpoonya wabona kuti kunyina muntu wakutumina kagwalo, eeci inga cipa kuti ubijilwe kapati!”​—Serena.

•   Kucitila bamwi zintu tacaambi kuti kunyina noyoolendelelwa pe.

   “Lyoonse balongwe bangu inga ndibacitila zintu zitondezya kuti ndilimwaabi, pele ndibona kuti balo tabandicitili oobo. Nokuba kuti eeci tacindipi kuusa, pele inga cilagambya kubona kuti balo tabandicitili zintu nzyondibacitila.”​—Richard.

 Masimpe ngakuti: Kulendelelwa ncintu cijatikizya mizeezo. Mukaintu uucili mwana-mwana wazina lya Jeanette wakaamba kuti: “Kulendelelwa ncintu cijatikizya mbwalimvwa muntu mumoyo, ikutali mbwalibonya.”

 Ino ncinzi ncomukonzya kucita ikuti kamutajisi balongwe alimwi akulimvwa kulendelelwa?

Mutanoolitengi.

 “Muntu ulakonzya kulimvwa kulendelelwa akaambo kakulibilika. Cilakatazya kuba abalongwe alimwi akwaanguluka kuti kolimvwa kuti balo inga tiibakubikkila maano.”​—Jeanette .

 Bbaibbele lyaamba kuti: “Weelede kuyanda simukobonyoko mbubonya mbuli mboliyanda omwini.” (Bagalatiya 5:14) Kutegwa katukkomana kuba abalongwe babotu, tweelede kulibona kuti andiswe tuli bantu​—pele ikutali munzila yakuti twatalika kulisumpula.​—Bagalatiya 6:3, 4.

Mutanoolyeetezyi.

 “Kulendelelwa kuli mbuli ntimba. Kuti wazumanana kweenda muntimba nkokuti inga cakatazya kuzwa. Kuti wazumanana kulyeetezya, bambi inga tiibayanda kuba anduwe calo cikonzya kupa kuti ciindile kulimvwa kulendelelwa.”​—Erin.

 Bbaibbele lyaamba kuti: “Luyando . . . talulibikkili buyo maano lwini.” (1 Bakolinto 13:​4, 5) Masimpe ngakuti, kuti twabikkila kapati maano lwesu tobeni, inga catupa kutabamvwida luse bamwi calo cikonzya kupa kuti tutabi abalongwe. (2 Bakolinto 12:15) Cakutainda mumbali inga twaamba kuti: Ikuti kuzwidilila kwanu kuyeeme azintu nzyobacita bamwi, nkokuti muyakwaalilwa! Ncobeni, majwi mbuli aakuti “Kunyina muntu uunditumina fooni” alimwi aakuti “kunyina muntu uunditamba” abikka lukkomano lwanu mumaanza aabamwi. Ino ooku inga tiikwaba kubapa nguzu kapati?

Mutasali muntu uuli woonse kuba mulongwe wanu.

 “Bantu balendeledwe bayanda muntu wakubandika limwi, alimwi balakonzya kulimvwa kuti tacikwe makani amuntu uukonzya kubandika ambabo. Bayanda buyo kulimvwa kuti balayandwa. Pele bantu bamwi balakonzya kutondezya kuti balamuyanda mpoonya akumweendelezya. Eeci inga cipa kulimvwa kulendelelwa kwiinda mbowakabede kaindi.”​—Brianne.

 Bbaibbele lyaamba kuti: “Uuenda abasongo ulasongwaala, pele muzwalani wabafubafuba ulabisizigwa.” (Tusimpi 13:20) Muntu uufwide nzala ulalangilwa kulya cakulya cili coonse. Mbubwenya buyo, bantu batajisi balongwe balakonzya kuyandaula balongwe munzila iili yoonse. Balakonzya kuba muntenda yakweendelezyegwa abantu bambi munzila iitali kabotu, kumwi kabayeeya kuti zilongwe zili boobo zili buyo kabotu alimwi akuti taaku ciinda waawo.

 Aboobo inga twaamba kuti: Muntu uuli woonse inga ulalendelelwa zimwi ziindi, nkuti buyo bamwi inga balilendeledwe kapati kwiinda bambi. Alimwi nokuba kuti kulendelelwa inga kupa muntu kutalimvwa kabotu, pele kumamanino caamba buyo kuti oobo mbwalimvwa muntu. Kanji-kanji inga tusaanguna kuyeeya katutanatondezya mbotulimvwa, aboobo tulakonzya kweendelezya mbotuyeeya.

 Amuzilange munzila yeelede zintu nzyomulangila kuli bamwi. Jeanette, waambidwe kale mucibalo cino wakaamba kuti: “Tali muntu uuli woonse uyooba mulongwe wanu wancobeni lyoonse, pele muyoojana bantu bamubikkila maano. Alimwi kubikkilwa maano ncecintu ciyandika. Ncecigwasya muntu kutalimvwa kulendelelwa.”

 Sena mulayanda lugwasyo alumbi? Amubale makani aakuti “ Kulwana Penzi Lyakulibilika Kuboola Kujatikizya Kuba Abalongwe.” Alimwi amukkope PDF iijisi makani aakuti “Kulwana Penzi Lyakulendelelwa.”