Kweelana abuvwuntauzi bwakacitwa, 80 pesenti yabakubusi mu America balapaila, pele ncisela buyo cabakubusi ibacita oobo abuzuba. Tacizumbauzigwi kuti bamwi balalibuzya kuti: ‘Sena mupailo ncintu cipa buyo kulimvwa kabotu, naa ncintu ciyandika?’

•  Ino mupailo ncinzi?

•  Sena Leza ulaswiilila?

•  Ncinzi ncondikonzya kupailila?

•  Nzyobaamba beenzinyoko

 Mupailo nkubandika cakulikwaya a Mulengi wazintu zyoonse. Amuciyeeyele buyo eeci! Jehova kunyina ngwayelene limwi, nokuba boobo “tali kulamfwu kuli umwi aumwi wesu.” (Milimo 17:27) Alimwi buya, Ibbaibbele lijisi majwi aakutamba aakuti: “Amuswene kuli Leza, eelyo awalo ulaswena kulindinywe.”​—Jakobo 4:8.

 Mbuti mbomukonzya kuswena kuli Leza?

•   Nzila imwi nkwiinda mumupailo, ndendilyo nomubandika a Leza.

•   Nzila imwi nkubala Bbaibbele, nenzila njabelesya Leza “kubandika” andinywe.

 Kubandika munzila iili boobo, kupaila akubala Bbaibbele, kuyoomugwasya kuyumya cilongwe canu a Leza.

 “Kubandika a Jehova, Mupatikampatila, ncoolwe cipati ncobajisi bantu.”​—Jeremy.

 “Kumwaambila mbondilimvwa Jehova kwiinda mumupailo ciyumya cilongwe cangu anguwe.”​—Miranda.

 Nokuba kuti ulasyoma muli Leza, alimwi akuti wapaila kulinguwe, cilakatazya kuuzumina muzeezo wakuti ulaswiilila. Nokuba boobo, Ibbaibbele lyaamba Jehova kuti ‘ngusikuswiilila mipailo.’ (Intembauzyo 65:2) Alimwi lyaamba kuti “kumwi kamuwaala makatazyo aanu oonse.” Nkaambo nzi? “Nkaambo ulamubikkila maano.”​—1 Petro 5:7.

 Ncomweelede kuyeeya: Sena mulajana ciindi cakubandika abeenzinyoko ciindi aciindi? Mulakonzya kucita mbubwenya oobo akuli Leza. Kamubandika anguwe lyoonse mumupailo, alimwi akubelesya zina lyakwe, lyakuti Jehova. (Intembauzyo 86:​5-7; 88:9) Inzya, Bbaibbele limukulwaizya ‘kupaila cakutaleka.’​—1 Batesalonika 5:​17.

 “Ndilabandika a Taata wakujulu kwiinda mumupailo, akumwaambila zyoonse zili kumoyo wangu.”​—Moises.

 “Ndilamwaambila Jehova zyoonse zili kumoyo, mbubwenya mbondikonzya kwaambila bamaama naa mweenzuma.”​—Karen.

 Ibbaibbele lyaamba kuti: “Muzintu zyoonse, kwiinda mumupailo akukombelezya antoomwe akulumba, amumuzyibye Leza nzyomulomba.”​—Bafilipi 4:6.

 Sena eeci caamba kuti cili buyo kabotu kupailila mapenzi aanu? Inzya! Tee Bbaibbele lyaamba: “Kowaala mukuli wako uuminya mumaanza aa Jehova, eelyo walo uyookulanganya.”​—Intembauzyo 55:22.

 Nokuba boobo, nomupaila kuli Leza, tamweelede kwaamba buyo mapenzi aanu. Mukubusi wazina lya Chantelle wakaamba kuti: “Inga tiicabota kuti lyoonse kandilomba buyo lugwasyo kuli Jehova. Ndeelede kusaanguna kulumba, alimwi zintu nzyondeelede kulumba zyeelede kuvwula.”

 Ncomweelede kuyeeya: Nzintu nzi zyakamucitikila mubuumi bwanu nzyomweelede kulumba? Amuyeeye zintu zyotatwe nzyomweelede kumulumba Jehova buzuba bwasunu.

 “Nokaba kantu kasyoonto buyo, mbuli kukkomanina duba libotu, kulakonzya kutupa kupaila kuli Jehova akumulumba.”​—Anita.

 “Kamuzinzibala kuyeeya cilenge cili coonse ncomukkomanina naa kapango kamu Bbaibbele kamusika amoyo, mpoonya amumulumbe Jehova.”​—Brian.