“Luzyalo lwangu lulizulide kulinduwe, nkaambo nguzu zyangu zilalondolwa mukubula nguzu kwako.”—2 Bakorinto 12:9, Bbaibbele lya Busanduluzi Bwanyika Mpya.

 “Lulakuzulila luzyalo lwangu, nkaambo inguzu zyangu zilaswiililika loko mukati kabukompami.”—2 Bakorinto 12:9, The Bible in Tonga Lyamu 1963.

 Leza wakasyomezya kupa mwaapostolo Paulo nguzu nzyaakali kuyandika kuti aliyumye kumapenzi alimwi akuzwidilila.

 “Luzyalo lwangu lulizulide kulinduwe.” Bwiinguzi bwa Leza kumipailo ya Paulo njaakapaila cakwiinduluka-induluka alimwi bulakonzya kwaambwa kuti “uyandika buyo luzyalo lwangu.” Munzila iimwi, Paulo wakali kuyandika luzyalo lwa Leza kutegwa aliyumye mumapenzi. Mubuti? Bbala lyakasandululwa kuti “luzyalo,” lipandulula cipego muntu ncaapegwa buyo a Leza. Malembe aa Paulo atondezya kuti wakagwasyigwa kapati aluzyalo lwa Leza. Nokuba kuti Paulo wakali kubapenzya Banakristo, Leza wakamupa nguzu nzyaakali kuyandika kutegwa acince bukkale bwakwe alimwi akugwasya bamwi kuba Banakristo. (1 Bakorinto 15:9, 10; 1 Timoteyo 1:12-14) Paulo wakali kusyoma Leza kuti amugwasye kuzunda buyumuyumu naa mapenzi ngaakali kukonzya kujana.

 “Nkaambo nguzu zyangu zilalondolwa mukubula nguzu kwako.” Mwami Jehova a wakayeezya Paulo kuti nguzu zyakwe zilalibonya ciindi nozibeleka kubantu banyina nguzu naa ibatalondokede. (2 Bakorinto 4:7; 12:8) Ciindi Banakristo nobabona kulezya kwabo akulanga kuli Jehova kuti abagwasye, bazumizya nguzu zya Leza kuti zibeleke mulimbabo. (Baefeso 3:16; Bafilipi 4:13) Munzila eeyo, nguzu zya Leza zilalibonya mubantu batajisi nguzu.

 Paulo wakalemba lugwalo ku Banakristo baku Korinto cakuma 55 C.E. Kumamanino aalugwalo oolo, wakapandulula kuti ulijisi nguzu zyakuba mwaapostolo. Wakalimvwa kuti wakeelede kucita oobo akaambo kabantu bamwi bakali kulyaamba kuti mbamayi ibakali kumufwubaazya, alimwi buya andiza akumubeteka akaambo kambwaakali kulibonya naa kwaambaula.—2 Bakorinto 10:7-10; 11:5, 6, 13; 12:11.

 Kutegwa alikwabilile, Paulo wakapandulula kuti naatakacikonzya munguzu zyakwe kuzuzikizya mulimo wakwe alimwi akuliyumya kumapenzi manji. (2 Bakorinto 6:4; 11:23-27; 12:12) Mucaandaano 12, wakaamba camaambilambali naakaamba ‘zyamumvwa mumubili,’ andiza penzi lyakali kumupa kumvwa kucisa mubili naa mizeezo. (2 Bakorinto 12:7) Nokuba kuti Paulo tanaakaamba penzi ndyaakajisi, wakalikanzide kuliyumya kwiinda mukugwasyigwa a Leza.

 Banakristo mazuba aano balakonzya kujana buyumuyumu alimwi akupenzyegwa. Balaumbulizyigwa kuzyiba kuti nguzu zya Leza zilakonzya kubagwasya kuliyumya mumapenzi aali woonse ngobakonzya kujana. Mbuli Paulo, calusyomo balakonzya kwaamba kuti: “Nonditajisi nguzu, ndendilyo nondijisi nguzu kapati.”—2 Bakorinto 12:10.

 Amweebelele kavidiyo aaka kutegwa mubone twaambo tupati-pati ituli mubbuku lya 2 Bakorinto.