“Nkaambo Leza tanaakatupa muuya wabukandu pe, pele wakatupa muuya wanguzu aluyando alimwi akuyeeya kabotu.”—2 Timoteyo 1:7, Bbaibbele lya Busanduluzi Bwanyika Mpya.

 “Nkaambo Leza takatupede muuya wabukandu, pe, wakatupa muuya wanguzu awakuyandana awakulibamba.”—2 Timoteyo 1:7, The Bible in Tonga Lyamu 1963.

 Leza ulakonzya kupa muntu busicamba bwakuti acite cintu ciluzi. Tayandi kuti muntu uuli woonse abe ‘abukandu,’ nkokuti buyoofwu ibukonzya kumulesya kucita zintu izimukkomanisya Leza.

 Atulange-lange bube botatwe ibuzwa kuli Leza bwaambidwe mukapango ibukonzya kutugwasya kuzunda buyoofwu naa bukandu.

 “Nguzu.” Banakristo balamubelekela Leza cabusicamba noliba leelyo nobajisi basinkondo banji bayoosya alimwi anobali mubukkale bwiindene-indene. Tiibapiluka cifwuteesule akaambo kakuyoowa. (2 Bakorinto 11:23-27) Ino bacikonzya buti kucita oobo? Mwaapostolo Paulo wakaamba boobu: “Muzintu zyoonse ndilijisi nguzu kwiinda muli yooyo uundipa nguzu.” (Bafilipi 4:13) Leza ulakonzya kupa bakombi bakwe “nguzu zigambya iziinda zyabantu” kutegwa bacikonzye kuzunda buyumu-yumu buli boonse.—2 Bakorinto 4:7.

 “Luyando.” Kuyanda Leza kulakonzya kugwasya Munakristo kwiiminina cintu ciluzi. Ncimwi buyo, luyando Munakristo ndwajisi kubantu bamwi lulakonzya kumugwasya kubikka nzyobayandika mubusena bwakusaanguna muciindi cakubikka nzyayandika walo, nociba ciindi nali mukukazyigwa naa muntenda.—Johane 13:34; 15:13.

 “Kuyeeya kabotu.” Mu Bbaibbele, kuyeeya kabotu kanji-kanji kwaamba Munakristo uucikonzya kupanga zyakusala zili kabotu iziyeeme ancolyaamba Bbaibbele. Muntu uuyeeya kabotu ulazumanana kucita zintu cabusongo alimwi munzila iili kabotu noliba leelyo nali mumapenzi. Ulapanga zyakusala izitondezya kuti ubona zintu mbwazibona Leza, kazyi kuti cilongwe cakwe a Leza cilayandika kapati kwiinda zintu nzyobaamba bamwi.

 Bbuku lyamu Bbaibbele lya 2 Timoteyo lyakalembwa amwaapostolo Paulo kaluli lugwalo kuli Timoteyo, mulongwe ngwaakali kuyandisya alimwi similimonyina. Mulugwalo oolu, Paulo wakakulwaizya mukubusi Timoteyo kuzumanana kubeleka canguzu mubukambausi. (2 Timoteyo 1:1, 2) Ambweni Timoteyo wakali ansoni, calo cakali kukonzya kumulesya kucita zyoonse zyaakali kukonzya kucita mumbungano ya Bunakristo. (1 Timoteyo 4:12) Nokuba boobo, Paulo wakayeezya Timoteyo kuti wakatambula cipego, nkokuti mulimo waalubazu mumbungano. Wakamukulwaizya kuzibelesya nguzu nzyaakapedwe kali mulangizi mumbungano, kukambauka makani mabotu alimwi akuliyumya mukupenzyegwa akaambo kalusyomo lwakwe.—2 Timoteyo 1:​6-8.

 Nokuba kuti Timoteyo nguwakalembelwa majwi aaya, alabeleka amazuba aano nkaambo asyomezya boonse aabo ibayanda kubelekela Leza kuti uyoobapa lugwasyo ndobayandika kutegwa bazwidilile tacikwe makani abuyumu-yumu mbobakonzya kujana.