“Muzintu zyoonse ndilijisi nguzu kwiinda muli yooyo uundipa nguzu.”—Bafilipi 4:13, Bbaibbele lya Busanduluzi Bwanyika Mpya.

 “Zintu zyoonse buyo ndazikonzya nkaambo kanguzu nzimpedwe kuli-Kristo.”—Bafilipi 4:13, The Bible in Tonga Lyamu 1963.

 Majwi aaya, aakalembwa amwaapostolo Paulo, asyomezya baabo bakomba Leza kuti bayootambula nguzu kutegwa bazuzikizye kuyanda kwakwe.

 Busanduluzi bumwi bwama Bbaibbele bwaamba kuti Kristo ngonguwe wakapa Paulo nguzu. Nokuba boobo, bbala lyakuti “Kristo” taliko pe mukapango aaka mumalembe aakaindi a Chigiriki. Aboobo, mu Bbaibbele lya Busanduluzi Bwanyika Mpya kulembedwe kuti “muli yooyo uundipa nguzu.” Ino Paulo wakali kwaamba ni?

 Twaambo tweengelede mulugwalo oolu tutondezya kuti Paulo wakali kwaamba Leza. (Bafilipi 4:6, 7, 10) Mulugwalo ndomunya oolu kumatalikilo, Paulo wakalembela Bafilipi kuti: “Leza ngonguwe uumupa nguzu, . . . anguzu zyakucita zintu.” (Bafilipi 2:13) Alimwi kulugwalo lwa 2 Bakorinto 4:7, wakalemba kuti ngu Leza wakamupa nguzu zyakuzuzikizya mulimo wakwe. (Amweezyanisye a 2 Timoteyo 1:8.) Aboobo, kuli twaambo tumvwika twakapa Paulo kwaamba Leza kuti nguumupa nguzu.

 Ino ncinzi Paulo ncaakali kupandulula ciindi naakalemba kuti wakali kuyootambula nguzu “muzintu zyoonse”? Zintu nzyaakaamba kweelede kuti zyakaliindene-indene kweelana abukkale mwaakali kulijana ciindi naakali kucita kuyanda kwa Leza. Tacikwe makani naa wakalijisi zintu nzyaakali kuyandika naa pe, wakali kusyoma Leza kuti unoomulanganya lyoonse. Aboobo Paulo wakaiya kukkutila mubukkale buli boonse mwaakabede.—2 Bakorinto 11:23-27; Bafilipi 4:11.

 Majwi aa Paulo alakonzya kubayumya bakombi ba Leza mazuba aano. Leza uyoobapa nguzu nzyobayandika kutegwa baliyumye mumasunko alimwi akucita kuyanda kwakwe. Ulakonzya kubayumya kwiinda mumuuya wakwe uusalala, naa nguzu nzyabelesya, mubakombi bakwe alimwi amu Jwi lyakwe Bbaibbele.—Luka 11:13; Milimo 14:21, 22; Bahebrayo 4:12.

 Majwi aaya ncibeela camamanino calugwalo lwa Paulo ku Banakristo baku Filipi. Wakalemba lugwalo oolu cakuma 60-61 C.E., naakaangwa ciindi cakusaanguna ku Roma. Kwaciindi citazyibidwe kabotu, Banakristo baku Filipi tiibakali kumulanganya munzila yakumubili mwaapostolo Paulo. Nokuba boobo, lino bakamutumina zipego kutegwa zimugwasye muzintu nzyaakali kuyandika.—Bafilipi 4:10, 14.

 Paulo wakabalumba Banakristo baku Filipi akaambo kabwaabi bwabo alimwi akubaambila kuti lino wakaba azintu nzyaakali kuyandika. (Bafilipi 4:18) Alimwi wakabelesya coolwe eeci kubaambila kasimpe kayandika kujatikizya buumi bwa Bunakristo: Banakristo boonse, kufwumbwa naa mbavwubi naa pe, balakonzya kukkutila ikuti kabasyoma Leza kutegwa abagwasye.—Bafilipi 4:12.