“Amukondwe akaambo kabulangizi. Amuliyumye mumapenzi. Amujatisye kupaila.”—Baroma 12:12, Bbaibbele lya Busanduluzi Bwanyika Mpya.

 “Amube abulangizi cakukondwa, alimwi amukakatile nikuba kuciindi camapenzi, akujatisya kukomba.”—Baroma 12:12, The Bible in Tonga Lyamu 1963.

 Mukapango aaka, mwaapostolo Paulo wakakulwaizya Banakristo baku Roma kucita zintu zyotatwe zyalo zyakali kuyoobagwasya kuzumanana kusyomeka nokuba kuti bakali kupenzyegwa alimwi akujana mapenzi aamwi.

 “Amukondwe akaambo kabulangizi.” Banakristo bajisi bulangizi bubotu bwabuumi butamani, bamwi baunka kujulu eelyo banabunji banooli mu Paradaiso aano anyika. (Intembauzyo 37:29; Johane 3:16; Ciyubunuzyo 14:1-4; 21:3, 4) Bulangizi oobu bulabikkilizya akubona Bwami bwa Leza a kabugusya mapenzi oonse aapa bantu kuti kabapenga. (Daniele 2:44; Matayo 6:10) Bakombi ba Leza balakonzya kukkomana nokuba kuti balimukuliyumya mumapenzi, akuti nzyobalangila ziyoocitika ikuti bazumanana kuliyumya. Akaambo kaceeci, Leza uyoobakkomanina.—Matayo 5:11, 12; Baroma 5:3-5.

 “Amuliyumye mumapenzi.” Mu Bbaibbele, bbala lya Chigiriki ilyakasandululwa kuti “kuliyumya,” kanji-kanji lilabelesyegwa kwaamba “kukakatila ikutali kutija; kujatisya; kutazungaana.” Basikutobela Kristo ‘tabali banyika,’ b aboobo balizyi kuti bayoopenzyegwa. Nkakaambo kaako ncobayandika kuliyumya. (Johane 15:18-20; 2 Timoteyo 3:12) Ikuti Munakristo wazumanana kubelekela Leza cakusyomeka nokuba kuti caamba kupenga, lusyomo lwakwe lwakuti Leza uyoomulumbula lulayuma. (Matayo 24:13) Akaambo kaceeci, lusyomo oolu luyoomupa kuliyumya cakukkazika moyo alimwi akukondwa.—Bakolose 1:11.

 “Amujatisye kupaila.” Kutegwa Banakristo bazumanane kusyomeka, cakwiinduluka-induluka bakulwaizigwa kuzumanana kupaila kuli Leza. (Luka 11:9; 18:1) Lyoonse bayandika kusololelwa anguwe alimwi akumusyoma muzintu zyoonse nzyobacita. (Bakolose 4:2; 1 Batesalonika 5:17) Balisinizyide kuti Leza ulayiingula mipailo yabo nkaambo balaitobela milawo yakwe alimwi balasolekesya kucita zintu zimukkomanisya. (1 Johane 3:22; 5:14) Alimwi balizyi kuti, ikuti naa bazumanana kupaila, Leza uyoobapa nguzu nzyobayandika kutegwa bazumanane kusyomeka tacikwe makani amapenzi ngobakonzya kujana.—Bafilipi 4:13.

 Paulo wakalemba lugwalo lwakwe ku Banakristo bakali kukkala ku Roma cakuma 56 C.E. Mucaandaano 12 calugwalo oolu, wakabapa lulayo lubotu lujatikizya mbobakonzya kutondezya bube bwa Bunakristo, mbobakonzya kweendelezya Banakristonyina abantu bamwi, alimwi ambobakonzya kucita zintu munzila yaluumuno ciindi nobapenzyegwa. (Baroma 12:9-21) Oolu lwakali lulayo lwakasikide aciindi ceelede ku Banakristo baku Roma, nkaambo kwakaceede buyo asyoonto kuti batalike kukazyigwa.

 Nokwakainda myaka misyoonto, mu 64 C.E., kwakabbuka mulilo mupati wakanyonyoona dolopo lya Roma. Bantu banji bakaamba kuti Mweendelezi wazina lya Nero nguwakautalisya mulilo ooyu. Kweelana asyaazibwene mumakani aakaindi muna Roma wazina lya Tacitus, Nero wakasola kulikwabilila kwiinda mukupa Banakristo mulandu ooyu. Eeci ncecakapa kuti Banakristo batalike kupenzyegwa. Lulayo lwa Paulo lujatikizya mbobakonzya kuliyumya ciindi nobapenzyegwa lwakabagwasya kuzumanana kusyomeka kabajisi lusyomo alimwi abulemu. (1 Batesalonika 5:15; 1 Petro 3:9) Babelesi ba Leza bamazuba aano balakonzya kwiiya zinji kuzwa kuzikozyanyo zyabo.

 Amweebelele kavidiyo aaka mubone mubufwaafwi izili mubbuku lya Baroma.