“Pele aabo balangila Jehova bayooba anguzu alimwi. Bayakuuluka kuya mujulu amababa mbuli basikwaze. Bayoobalika kakunyina kuwizuka; bayakweenda kakunyina kukatala.”—Isaya 40:31, Bbaibbele lya Busanduluzi Bwanyika Mpya.

 “Pele abo babikide myoyo yabo kuli-Jehova balabukulusya inguzu zyabo, balaya butanta amababa mbuli basikwaze, balazuzaana akutakataala, balaya bweenda cakutawizuka.”—Isaya 40:31, The Bible in Tonga Lyamu 1963.

 Jehova a Leza usyomezya bakombi bakwe kuti uyoobapa nguzu ziyandika kutegwa bazunde naa kuliyumya kupenzi lili lyoonse ndyobakonzya kujana.

 “Aabo balangila Jehova bayooba anguzu alimwi.” Aabo balangila, naa kusyoma nguzu zya Leza balakonzya kuba masimpe kuti ulakonzya kubagwasya. (Tusimpi 3:5, 6) Nzila imwi Leza mwakonzya kubapa nguzu aabo bamukomba nkwiinda mumuuya wakwe uusalala, naa nguzu nzyabelesya.—Luka 11:13.

 “Bayakuuluka kuya mujulu amababa mbuli basikwaze.” Majwi aaya atondezya nguzu zya Leza mbozikonzya kumugwasya muntu. Sikwaze ubelesya muya uukasaala uuya mujulu kuzwa ansi kutegwa acikonzye kuuluka kabotu. Kufwumbwa kuti sikwaze wazyiba kuli muya uupya, ulavwungulula mababa aakwe akuzinguluka waawo aali muya akuyaabuya mujulu kapati. Nacita oobo, ulakonzya kuuluka kwamawoola manji alimwi tafwambaani kulema.

 “Bayoobalika kakunyina kuwizuka.” Mapenzi aamubuumi alakonzya kututolwaazya kumubili alimwi amumizeezo, pele tulakonzya kuliyumya kwiinda munguzu zya Leza nzyatupa. Nguzu eezyi zilakonzya kutupa kucita ciluzi nokuba kuti tuli mubukkale bukatazya. Mwaapostolo Paulo, iwakaliyumya kumasunko aakatazya, wakalemba kuti: “Muzintu zyoonse ndilijisi nguzu kwiinda muli yooyo uundipa nguzu.”—Bafilipi 4:13.

 Leza wakasololela musinsimi Isaya ikulemba majwi aaya myaka iitandila ku 2,700 yainda. Nokuba kuti lugwalo oolu lulabeleka kubabelesi ba Leza boonse ibasyomeka, kweelede kuti kwiinda mumajwi aaya, Jehova wakakulwaizya ba Juda ibakali kuyootolwa ku Babuloni kwamyaka iili 70. Ciindi ba Juda nobakapiluka kumunzi wabo kuzwa mubuzike, bakalibonena majwi aa Leza kaazuzikizyigwa. (Isaya 40:1-3) Leza wakabapa nguzu zyakucikonzya kweenda musinzo mulamfwu alimwi uukatazya b kuzwa ku Babuloni kuya ku Jerusalemu mu 537 B.C.E.—Isaya 40:29.