“Utayoowi pe, nkaambo ndilaanduwe. Utalibiliki pe, nkaambo ndime Leza wako. Ndilakuyumya, inzya ndilakugwasya, ncobeni ndinookujatilide ajanza lyangu lyalulyo lyabululami.”—Isaya 41:10, Busanduluzi Bwanyika Mpya.

 “Utayoowi, nkaambo ndili ayebo. Utakankami, nkaambo ndime Leza wako. Njookuyumya, njookugwasya, ncobeni njookutabilila ajanza lyalulyo lyabululami bwangu.”—Isaya 41:10, The Bible in Tonga Lyamu 1963.

 Jehova a Leza usyomezya bakombi bakwe basyomeka kuti ulabagwasyilizya, tacikwe makani amapenzi ngobajisi.

 “Ndilaanduwe.” Jehova waambila bakombi bakwe ikaambo ncobateelede kuyoowa, waamba kuti tabali balikke. Akaambo kakuti ulabona zintu zibacitikila alimwi ulaiswiilila mipailo yabo, cili mbuli kuti uli aambabo.—Intembauzyo 34:15; 1 Petro 3:12.

 “Ndime Leza wako.” Tacikwe makani abukkale mobabede, Jehova ulabakkazika moyo bakombi bakwe kwiinda mukubayeezya kuti ucili Leza wabo akuti bukombi bwabo ulabutambula. Balakonzya kusyoma kuti kunyina bukkale bukonzya kulesya Leza kucita cintu cimwi kuti abagwasye.—Intembauzyo 118:6; Baroma 8:32; Bahebrayo 13:6.

 “Ndilakuyumya, inzya ndilakugwasya, ncobeni ndinookujatilide ajanza lyangu lyalulyo lyabululami.” Kwiinda mukuwiinduluka ziindi zyotatwe muzeezo omwe, Jehova ukankaizya kuti uyoobagwasyilizya ncobeni. Mane buya waamba kuti uyootujatilila ajanza lyakwe lyalulyo ciindi notwayandika lugwasyo. Ikuti umwi wawa, Leza ulakonzya kubelesya janza lyakwe lyalulyo kumubusya.—Isaya 41:13.

 Nzila Leza njabelesya kapati kugwasya bakombi bakwe nkwiinda mu Jwi lyakwe, Bbaibbele. (Joshua 1:8; Bahebrayo 4:12) Mucikozyanyo, Ijwi lya Leza lilapa lulayo lugwasya kulibaabo ibali mumasunko, mbuli bucete, malwazi naa kufwidwa muyandwa. (Tusimpi 2:6, 7) Alimwi Leza ulakonzya kubelesya muuya wakwe uusalala, naa nguzu zyakwe, kugwasya bakombi bakwe kuti kabayeeya kabotu alimwi akuti kabataciindizyi kulibilika kumapenzi aabo.—Isaya 40:29; Luka 11:13.

 Majwi aaya akabawumbulizya ba Juda ibasyomeka balo ibakatolwa mubuzike ku Babuloni. Jehova wakasinsima kuti munsi-munsi aakumamanino aabuzike bwaba Juda, kwakali kuyooba malipooti aamba zyasinkondo wakali kuyooboola kunyonyoona minzi yakazingulukide akukonga bana Babuloni. (Isaya 41:2-4; 44:1-4) Nokuba kuti bana Babuloni alimwi abamuminzi yakazingulukide bakali kuya kuyoowa amalipooti amusyobo ooyu, ba Juba tiibakalibilikide pe, nkaambo Jehova wakali kuyoobakwabilila. Ziindi zyotatwe wakabasyomezya amajwi aakuti ‘mutayoowi pe.’—Isaya 41:5, 6, 10, 13, 14

 Nokuba kuti kumatalikilo majwi aali ku Isaya 41:10 akagaminide ba Juda basyomeka ibakali mubuzike ku Babuloni, Jehova Leza wakabona kuti ayobolwa kutegwa abawumbulizye bakombi bakwe boonse. (Isaya 40:8; Baroma 15:4) Mbubonya buyo mbwaakali kubagwasya babelesi bakwe kaindi, amazuba aano ulacita oobo.