Jehova wakali kwaambila ba Juda ibakali kupona mumazuba aamusinsimi Jeremiya. Akaambo kakuti bantu bakakaka kutobela milawo ya Jehova a alimwi abusolozi bwakwe bwaluyando kwiinda mubasinsimi bakwe, kunyina naakali kuyoobakwabilila kuzintu zibyaabi izyakali kuyoobacitikila akaambo kabukkale bwabo bubyaabi.​—Tusimpi 1:24-32.

 “Aboobo mboobu mbwaamba Jehova.” Bbala lyakuti “aboobo” liswaanganya tupango twainda kuli tooto tutobela. Kulugwalo lwa Jeremiya 11:1-10, Jehova wakaambila bantu bakwe kuti bakatyola cizuminano ncaakapangana abamausyi. (Kulonga 24:7) Muciindi cakukomba Mulengi wabo, ba Juda bakatalika kukomba mituni. Akaambo kaluleyo oolu, ba Juda bakacita zintu zinji zibyaabi kubikkilizya akutuula bana babo.​—Jeremiya 7:31.

 “Ndilabaletela mapenzi.” Bunji bwaziindi, ciindi Bbaibbele nolyaamba kuti Leza ulacita cintu cimwi, inga uzumizya buyo kuti cicitike. Mbuti eeci mbocakalibonya mubukkale oobu? Kwiinda mukutalika kukomba baleza bakubeja akucileka kutobela zyeelelo zya Jehova zisumpukide, bantu bakwe bakaliletela mapenzi aataambiki. Kunze lyaboobo, Leza wakaleka kubakwabilila. Akaambo kaceeci, mwami wa Babuloni iwakali sinkondonyina wakaunyonyoona munzi wa Jerusalemu, akutola bantu bamumunzi ooyu mubuzike. Alimwi baleza bakubeja mbobakali kusyoma bantu aaba, kunyina nobakabavwuna.​—Jeremiya 11:12; 25:8, 9.

 “Baakundikwiilila kuti ndibagwasye, tandikabavwiili pe.” Jehova kunyina naswiilila mipailo yabaabo bali ‘amaanza aazwide bulowa bwabantu’ naa aabo basyoma baleza bakubeja. (Isaya 1:15; 42:17) Nokuba boobo, ulayiingula mipailo yabaabo ibeempwa kuzwa ansi aamoyo akuleka zibi zyabo, mpoonya akupiluka kulinguwe.​—Isaya 1:16-19; 55:6, 7.

 Mu 647 B.C.E., Jehova wakasala Jeremiya kuba musinsimi wakwe. Kwamyaka iili 40, Jeremiya wakali kubacenjezya bantu bamu Juda kujatikizya lubeta lwa Leza ilwakali kulangilwa. Pele balo tiibakaswiilila. Aciindi eeci, musinsimi wakalemba majwi aali ku Jeremiya 11:11. Mpoonya mu 607 B.C.E., majwi aabusinsimi aajatikizya lubeta akazuzikizyigwa ciindi bana Babuloni nobakanyonyoona munzi wa Jerusalemu.​—Jeremiya 6:6-8; 39:1, 2, 8, 9.

 Kunze lyaboobo, bbuku lya Jeremiya lijisi mulumbe uupa bulangizi. Jehova wakaamba kuti: “Yaakukkwana myaka iili 70 kamuli ku Babuloni, . . . ndiyoozuzikizya cisyomezyo cangu kwiinda mukumupilusya kubusena obuno [nkokuti munzi waba Juda].” (Jeremiya 29:10) Mpoonya mu 537 B.C.E., Jehova ‘wakacizuzikizya’ cisyomezyo eeco. Eeci cakacitika ciindi munzi wa Babuloni nowakazundwa abana Mediya a Persia. Jehova wakabazumizya bantu bakwe ibakamwaikide mubwami boonse kuti bapiluke kunyika yokwabo akuyoobukulusya bukombi bwakasimpe.​—2 Makani 36:22, 23; Jeremiya 29:14.

 Amweebelele vidiyo eeyi kutegwa mubone twaambo tupati-pati ituli mubbuku lya Jeremiya.