TUPANGO TWAMU BBAIBBELE TWAPANDULULWA

Jeremiya 29:11—“Ndiliizyi Mizeezo Njendiyeeya Kujatikizya Ndinywe”

AMULIZYE

“‘Ndiliizyi kabotu mizeezo njendiyeeya kujatikizya ndinywe,’ mbwaamba Jehova, a ‘mizeezo yakumuletela luumuno, kutali mapenzi pe, kumupa buumi bwakumbele bubotu alimwi abulangizi.’”—Jeremiya 29:11, Busanduluzi Bwanyika Mpya.

“‘Ndizi miyeeyo yangu njinjeeya aandinywe, mbwaamba Jehova. Njemiyeeyo yakuleta coolwe, teensi miyeeyo yamapenzi pe. Njanda kumupa bubotu mbumukonzya kulangila kumamanino.’”—Jeremiya 29:11, The Bible in Tonga Lyamu 1963.

Bupanduluzi bwa Jeremiya 29:11

Jehova Leza wakasyomezya bakombi bakwe kuti uyoobapa buumi bwaluumuno kumbele. Nokuba kuti majwi aaya akalembwa kaindi, acitondezya mizeezo ya Leza naaba mazuba aano. Ngu “Leza uupa bulangizi.” (Baroma 15:13) Alimwi buya, wakazilemba zisyomezyo zili boobu mu Bbaibbele kutegwa “tube abulangizi” bwabuumi bubotu kumbele.—Baroma 15:4.

Makani aayengelede lugwalo lwa Jeremiya 29:11

Majwi aaya akali cibeela calugwalo lwakatumwa kubana Israyeli ibakatolwa mubuzike ku Babuloni kuzwa ku Jerusalemu. b (Jeremiya 29:1) Leza wakaambila baange aaba kuti banooli mubuzike kwaciindi cilamfwu aboobo bakeelede kuyaka maanda, kulima myuunda alimwi akuba amikwasyi. (Jeremiya 29:4-9) Nokuba boobo, Leza wakayungizya kuti “Yaakukkwana myaka iili 70 kamuli ku Babuloni, ndiyoomuyeeya nywebo, eelyo ndiyoozuzikizya cisyomezyo cangu kwiinda mukumupilusya ku [Jerusalemu].” (Jeremiya 29:10) Aboobo Leza wakabasyomezya kuti takabalubi akuti bulangizi bwabo bwakupiluka ku Jerusalemu bwakali kuyoozuzikizyigwa.—Jeremiya 31:16, 17.

Leza wakacizuzikizya cisyomezyo cakwe kubana Israyeli. Mbubwenya mbwaakaambide, munzi wa Babuloni wakazundwa a Mwami Koresi waku Persia. (Isaya 45:1, 2; Jeremiya 51:30-32) Kumane, Koresi wakabazumizya ba Juda kupiluka kumunzi wabo. Aboobo, bakapiluka ku Jerusalemu nokwakainda myaka iili 70 kabali mubuzike.—2 Makani 36:20-23; Ezara 3:1.

Kuzuzikizyigwa kwalugwalo lwa Jeremiya 29:11 kubapa bulangizi aabo ibasyoma zisyomezyo zya Leza mazuba aano. Zisyomezyo eezyi zibikkilizya luumuno lwanyika yoonse iluyooba akaambo ka Bwami bwa Leza mubweendelezi bwa Kristo Jesu.—Intembauzyo 37:10, 11, 29; Isaya 55:11; Matayo 6:10.

Twaambo Tutaluzi Kujatikizya Jeremiya 29:11

Kaambo kataluzi: Leza ulijisi “muzeezo” uugaminide kumuntu umwi aumwi.

Kaambo kamasimpe: Leza ulibapede lwaanguluko bantu lwakulisalila ncobayanda kucita abuumi bwabo. Majwi ngaakaamba ku Jeremiya 29:11 akali aabana Israyeli ibakali ku Babuloni mbuli nkamu, alimwi wakajisi muzeezo kujatikizya nkamu yoonse, nkokuti kubaletela buumi bwaluumuno kumbele. (Jeremiya 29:4) Pele, Leza wakazumizya bantu kusala naa bakali kuyanda kugwasyigwa acisyomezyo cakwe naa pe. (Deuteronomo 30:19, 20; Jeremiya 29:32) Aabo ibakasala kumuyandaula Leza bakacita oobo kwiinda mukupaila kulinguwe kuzwa ansi aamoyo.—Jeremiya 29:12, 13.

Kaambo kataluzi: Leza uyoobapa kuvwuba bakombi bakwe.

Kaambo kamasimpe: Ibbala lyakuti “kuzwidilila” ilijanwa kulugwalo lwa Jeremiya 29:11 muma Bbaibbele aamwi, lyakasandululwa kuzwa kubbala lyamuci Hebrayo lyaamba “luumuno, buzumi alimwi abuumi buli kabotu.” Kweelana amakani aayengelede, Leza wakasyomezya kubapa luumuno abuumi bubotu bana Israyeli kutali lubono pe. Bakali kuyoozumanana kupona mbuli cisi alimwi buya akupiluka ku Jerusalemu buzuba bumwi.—Jeremiya 29:4-10.

Amubale Jeremiya caandaano 29 kubikkilizya abupanduluzi buyungizyidwe amakani aakozyenye.

a Jehova ndezina lya Leza limugeme.—Intembauzyo 83:18.

b Kujatikizya lugwalo lwa Jeremiya 29:11, Bbaibbele litegwa The Expositor’s Bible Commentary lyaamba kuti: “Cisyomezyo eeci cilaakati kazisyomezyo zibotu kapati zijanika mu Magwalo izitondezya luzyalo lwa Jehova kubaange aaba alimwi icibapa kuba abulangizi.”—Volume 7, peeji 360.