“Ndamusiila luumuno; ndamupa luumuno lwangu. Tandimupi luumuno oolu kweelana amboipa nyika. Myoyo yanu itapengi alimwi itayoowi pe.”—Johane 14:27, Bbaibbele lya Busanduluzi Bwanyika Mpya.

 “Ndamusiila luumuno, ndamupa luumuno lwangu, nsimupi mbuli mbwiipa nyika. Myoyo yanu itapengi nokuba kuyoowa.”—Johane 14:27, The Bible in Tonga Lyamu 1963.

 Kwiinda mumajwi aaya, Jesu wakakulwaizya baapostolo bakwe kuti tibakali kuyandika kuciindizya kulibilika muziindi zyamapenzi. Mbubonya mbuli nguwe, bakali kukonzya kuzumanana kuba aluumuno lwamumizeezo kwiinda mukugwasyigwa a Leza.

 Ino nduumuno luli buti Jesu ndwaakasiila baapostolo bakwe? Jesu wakapa basikwiiya bakwe luumuno, nkokuti luumuno awalo ndwaakajisi. Luumuno oolu tiilwakali kwaamba kuti tabanoojisi mapenzi. (Johane 15:20; 16:33) Nokuba kuti Jesu tanaakeendelezyegwa kabotu alimwi kumbele wakajaigwa, wakalijisi luumuno lwamumizeezo alimwi alwamumoyo. (Luka 23:27, 28, 32-34; 1 Petro 2:23) Wakajisi luumuno lwamumizeezo nkaambo wakalizyi kuti wakali kukkomaninwa a Bausyi, Jehova. a—Matayo 3:16, 17.

 Jesu wakapa baapostolo bakwe luumuno kwiinda mukubaambila kuti walo alimwi a Bausyi bakali kubayanda alimwi akubakkomanina. (Johane 14:23; 15:9, 10; Baroma 5:1) Luumuno oolu, lwakayeeme alusyomo lwabo lwakuti Jesu wakali Mwana wa Leza, aboobo eeci cakabagwasya kutaciindizya kuyoowa alimwi akulibilika. (Johane 14:1) Nokuba kuti Jesu tanaakacili kuyooba ambabo cacigaminina, wakabasyomezya kuti muuya wa Leza wakali kuyoobagwasya kuba alusyomo alimwi aluumuno lwamumizeezo. (Johane 14:25-27) Cabusicamba basikutobela Jesu bakali kukonzya kulijana mubukkale bukatazya, kabazyi kuti Jehova wakali kubakkomanina alimwi akubagwasyilizya.—Bahebrayo 13:6.

 Ciindi Jesu naakali anyika, cakali cilengwa buya kubantu kwaambilana kuti amube luumuno ciindi nobakali kujuzyanya. (Matayo 10:12, 13) Jesu tanaakabaambila buyo kuti babe aluumuno baapostolo bakwe; pele wakabapa. Kuyungizya waawo, luumuno Jesu ngwaakabapa luliindene kapati aluumuno nyika b njoikonzya kupa. Nyika ilakonzya kupa bantu bamwi luumuno kwiinda muzilongwe, mali naa cuuno ncobajisi kumulimo. Pele luumuno lwa Jesu taluyeeme azintu eezyi pe. Nduumuno lwamumizeezo lukkalilila.

 Jesu wakaamba majwi aaya kubaapostolo bakwe basyomeka busiku katanafwa. Busiku obuya, wakabaambila kuti ino-ino wakali kuyoobasiya. (Johane 13:33, 36) Eeci cakapa kuti balimvwe bubi baapostolo bakwe. (Johane 16:6) Aboobo Jesu wakabakulwaizya, akubaambila kaambo ncobatakeelede kulimvwa bubi ciindi naakali kuyoobasiya.

 Majwi aa Jesu alakonzya kubakulwaizya Banakristo mazuba aano. Andiswe tulakonzya kuba aluumuno. (2 Batesalonika 3:16) Ciindi notuba basikwiiya ba Jesu, tulaiya kuti tulayandwa alimwi akukkomaninwa a Bausyi, Jehova. (Bakolose 3:15; 1 Johane 4:16) Aboobo, tatweelede kuciindizya kulibilika. Nkaambo nzi? Nkaambo Leza uli kulubazu lwesu.—Intembauzyo 118:6; Bafilipi 4:6, 7; 2 Petro 1:2.

 Amweebelele kavidiyo aaka mubone zijatikizyidwe kubbuku lya Johane.