“Kunyina uujisi luyando lwiinda loolu, lwakuti muntu umwi atuulile beenzinyina buumi bwakwe.”—Johane 15:13, Bbaibbele lya Busanduluzi Bwanyika Mpya.

 “Taakwe uuli aluyando ulwiinda olu, kuti muntu atulile beenzinyina buumi bwakwe.”—Johane 15:13, The Bible in Tonga Lyamu 1963.

 Jesu wakali kugwasya basikumutobela kumvwisya kuti, luyando lwabo lwakeelede kuba luyumu kapati cakuti bakali kuyandika kulisungula kufwida umwi amweenzyinyina.

 Mumajwi aakwe aali mukapango 12, Jesu wakaambila baapostolo bakwe kuti: “Ndamupa mulawo ooyu, wakuti muyandane mbubonya mbondali kumuyanda nywebo.” (Johane 15:12) Ino nduyando luli buti ndwaakajisi kuli mbabo? Lwakali luyando lwini-lwini, luzwa ansi aamoyo. Naakali aanyika, wakali kubikka zintu nzyobakali kuyandika basikumutobela mubusena bwakusaanguna, kwiinda zintu nzyaakali kuyanda walo. Wakali kuponya bantu alimwi akubayiisya kujatikizya Bwami bwa Leza. a Kumane buya, wakali kubeleka milimo yaansi kapati kugwasya bamwi. (Matayo 9:35; Luka 22:27; Johane 13:3-5) Pele kulugwalo lwa Johane 15:13, Jesu wakali kwaamba luyando lwiinda aali loolu. Alimwi buya, nokwakainda ciindi cisyoonto kuzwa naakaamba majwi aaya, wakalutondezya luyando oolu ciindi naakapa “buumi bwakwe kuti bube cinunuzyo cakununuzya banji.” (Matayo 20:28; 22:39) Aboobo wakalutondezya luyando oolu munzila iigambya, kuti wakali kubayanda bantu banji kwiinda mbwaakali kuliyanda lwakwe mwini.

 Jesu ulabayanda bantu. Pele kwaambisya aabo batobela zintu nzyayiisya. Wakali kubona basikwiiya bakwe kuti bakali balongwe beni-beni, nkaambo bakali kumvwida malailile aakwe alimwi bakakatila kulinguwe nomuba muziindi zyamapenzi. (Luka 22:28; Johane 15:14, 15) Aboobo wakalijisi kaambo kabotu kakwaaba buumi bwakwe akaambo kambabo.

 Banakristo bakusaanguna bakaabikkila maano majwi aa Jesu, alimwi bakalilyaabide kufwida beenzyinyina. (1 Johane 3:16) Masimpe, lwakali luyando lwakutaupa-upa ameso. Aboobo luyando Jesu ndwaakatondezya lwakali kuyooba citondezya ca Banakristo bakasimpe.—Johane 13:34, 35

 Zyaandaano 13 kusikila ku 17 zyabbuku lya Makani Mabotu aa Johane, zyaamba zintu Jesu nzyaakaambila basikwiya bakwe basyomeka bali 11 kali aafwaafwi akufwa alimwi amupailo wakwe wamamanino kali ambabo. Mpoonya wakafwa mumawoola buyo masyoonto aakatobela. Mu caandaano 15, kutegwa atondezye baskwiiya bakwe mbobakeelede kuzumanana kukamantana anguwe akuti bakali basikumutobela beni-beni, Jesu wakabakozyanisya kumitabi iikomena kuzwa kumisaansa. Wakabakulwaizya kuti ‘bazumanane kuzyala micelo minji.’ (Johane 15:1-5, 8) Nzila imwi mbobacita oobo nkwiinda mukuba aluyando lwakulyaaba kulibamwi, calo cibikkilizya akukambauka mulumbe Jesu ngwaakali kukambauka, nkokuti “kwaambilizya makani mabotu aa Bwami bwa Leza.”—Luka 4:43; Johane 15:10, 17.

 Amweebelele kavidiyo aaka mubone mufwaafwi izili mubbuku lya Johane.