TUPANGO TWAMU BBAIBBELE TWAPANDULULWA

Johane 3:16—“Nkaambo Leza Wakaiyanda Kapati Nyika”

AMULIZYE

“Nkaambo Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atanyonyoonwi, pele abe abuumi butamani.”—Johane 3:16, Bbaibbele lya Busanduluzi Bwanyika Mpya.

“Nkaambo obuya Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.”—Johane 3:16, The Bible in Tonga Lyamu 1963.

Bupanduluzi bwa Johane 3:16

Leza ulatuyanda alimwi uyanda kuti katupona kukabe kutamani. Akaambo kaceeci, wakatuma Mwanaakwe, Jesu Kristo anyika. Naakali anyika, Jesu wakacita zintu zinji. Cimwi ncaakacita, nkuyiisya basikumutobela kujatikizya Bausyi alimwi a Leza wakwe. (1 Petro 1:3) Icimbi, wakaaba buumi bwakwe kunununa bantu. Kutegwa tukabe abuumi butamani, tweelede kuba alusyomo muli Jesu.

Mboluli lupati luyando lwa Leza lulalibonya mumajwi aakuti, “wakapa Mwanaakwe simuzyalwaalikke.” a Jesu Mwana wa Leza uulibedelede. Munzila nzi? Alikke Jesu nguwakalengwa cakaanzambwene a Leza. (Bakolose 1:17) “Mutaanzi kuzyalwa kuzilenge zyoonse.” (Bakolose 1:15) Zilenge zimbi zyoonse, kubikkilizya abangelo bambi, zyakalengwa kwiinda muli Jesu. Nokuba boobo, Jehova b Leza wakasala kutuma Mwanaakwe ngwayandisya “kuzoobeleka akupa buumi bwakwe kuti bube cinunuzyo cakununuzya banji.” (Matayo 20:28) Jesu wakapenga akufwa kutegwa atununune kucibi alufwu, nzyotwakakona kumuntu wakusaanguna, Adamu.—Baroma 5:8, 12.

Kuba alusyomo muli Jesu tacaambi buyo kumusyoma naa kuzyiba zintu nzyaakatucitila. Tweelede kulutondezya lusyomo lwesu mu Mwana wa Leza ooyu kwiinda mukumumvwida akutobela mikondo yakwe. (Matayo 7:24-27; 1 Petro 2:21) Bbaibbele lyaamba kuti: “Ooyo uumusyoma Mwana ulaabuumi butamani; ooyo uutamuswiilili Mwana takabuboni buumi pe.”—Johane 3:36.

Makani aayengelede lugwalo lwa Johane 3:16

Jesu wakaamba majwi aaya ciindi naakali kubandika amusololi wacikombelo caba Juda, Nikodemo. (Johane 3:1, 2) Mumubandi ooyo, Jesu wakaamba twaambo tujatikizya Bwami bwa Leza c alimwi ‘akuzyalwa alimwi.’ (Johane 3:3) Alimwi wakasinsima kujatikizya mbwaakali kuyoofwa. “Mwanaamuntu weelede kusumpulwa [kwaanzikwa acisamu], kutegwa muntu uuli woonse uumusyoma abe abuumi butamani.” (Johane 3:14, 15) Kumane wakakankaizya kuti coolwe eeci cakuyooba abuumi nkocili akaambo kaluyando lupati lwa Leza. Mpoonya Jesu wakamanizya kwiinda mukupandulula kuti, kutegwa tukajane buumi, tweelede kuba alusyomo akucita milimo iimukkomanisya Leza.—Johane 3:17-21.

a Bbala lya Chigiriki ilyakasandululwa kuti “simuzyalwaalikke,” ndyakuti monogenes alimwi lyaamba kuti “cintu cili comwe buyo, . . . musyobo ulikke buyo, kunyina uumbi, cilibedelede.”—Kuzwa mubbuku litegwa A Greek-English Lexicon of the New Testament and Other Early Christian Literature, p. 658.

b Jehova ndezina lya Leza limugeme.—Intembauzyo 83:18.

c Bwami bwa Leza, alimwi ibwiitwa kuti “Bwami bwakujulu,” nimfwulumende yakujulu. (Matayo 10:7; Ciyubunuzyo 11:15) Leza wakasala Kristo kuba Mwami wa Bwami oobu. Bwami bwa Leza buyoozuzikizya makanze aa Leza kujatikizya nyika. (Daniele 2:44; Matayo 6:10) Kutegwa muzyibe zinji, amubone cibalo cakuti “Ino Bwami bwa Leza Ninzi?”