“Nkaambo kunyina cintu caambwa a Leza citakonzyi kucitika.”​—Luka 1:37, Bbaibbele lya Busanduluzi Bwanyika Mpya.

 “Nkaambo taakwe ijwi ilizwa kuli-Leza ilibula nguzu.”​—Luka 1:37, The Bible in Tonga Lyamu 1963.

 Leza Singuzuzyoonse ulakonzya kucita zintu bantu nzyobabona kuti tazikonzyeki. Kunyina cikonzya kumulesya kucita zintu nzyaamba naa kusyomezya.

 Mumwaambo wakusaanguna, mabala aakuti “cintu caambwa” alakonzya kwaamba “ijwi” naa “majwi” aazwa kuli Leza. Alimwi alakonzya kwaamba zintu zyakacitika, Jehova a Leza nzyaakaamba. Akaambo kakuti ncaamba Leza lyoonse cilacitika, lugwalo lwa Luka 1:37 alimwi lulakonzya kwaamba kuti: “Zisyomezyo zya Leza zilacitika lyoonse” naa “Kuli Leza, zyoonse zilakonzyeka.” Mabala oonse aaya aamu Chigiriki aamba kasimpe komwe kakuti: Kunyina cisyomezyo ca Leza citakazuzikizigwi, nkaambo kunyina cikonzya kumwaalila.​—Isaya 55:10, 11.

 Mabala aakozyenye aajatikizya zisyomezyo zya Leza alajanika mu Bbaibbele lyoonse. Mucikozyanyo, Jehova, kwiinda mumungelo, wakasinsima kujatikizya mukaintu wa Abrahamu watakali kuzyala, Sara, kuti wakali kuyoomita mubucembele bwakwe. Leza wakayungizya kuti: “Sena kuli cintu cikonzya kumwaalila kucita Jehova?” (Matalikilo 18:13, 14) Naakamanizya kuzinzibala kuyeeya kujatikizya zilenge zya Jehova, sikale Jobu wakaamba kuti: “Kunyina cintu ncokanza kucita icikonzya kukwaalila.” (Jobu 42:2) Alimwi ciindi basikutobela Jesu nobakadooneka kuti inga bacikonzya kusika azyeelelo zya Leza kutegwa bakafwutuke, Jesu wakabayeezya kuti, “kuli Leza zintu zyoonse zilakonzyeka.”​—Matayo 19:25, 26. b

 Mungelo wazina lya Gabriyeli wakaamba majwi aali ku Luka 1:37 kumu Juda nakalindu, Mariya. Gabriyeli wakazwide kumwaambila kuti wakali kuyoozyala “Mwana wa Mupatikampatila” alimwi wakeelede ‘kumuulika zina lyakuti Jesu.’ Wakali kuyooba Mwami wa Bwami bwa Leza, ibuyoolela lyoonse mane kukabe kutamani.​—Luka 1:26-33; Ciyubunuzyo 11:15.

 Mariya wakabuzya eeci mbocakali kuyookonzyeka nkaambo tanaakakwetwe alimwi ‘tanaakalinalede amusankwa.’ (Luka 1:34, 35) Gabriyeli wakaingula kuti Leza wakali kuyoobelesya muuya wakwe uusalala. Aciindi eeco, Jesu wakali mwana wa Leza wamuuya kujulu. Aboobo Jehova wakabelesya muuya wakwe uusalala kulonzya buumi bwamwanaakwe kuzwa kujulu kumuleta mwida lya Mariya. (Johane 1:14; Bafilipi 2:5-7) Eelyo wakamita munzila yamaleele. Kutegwa ayumye lusyomo lwakwe munguzu zya Leza, mungelo wakamwaambila kuti simukowanyina, Elizabeta wakamita mwana musankwa “kubucembele.” Elizabeta amulumi wakwe, Zekariya, tiibakajisi mwana nkaambo Elizabeta tanaakali kuzyala. (Luka 1:36) Mwanaabo wakali Johane mubbapatizyi. Alimwi Jehova wakasinsimide kale kujatikizya mulimo ngwaakali kuyoobeleka.​—Luka 1:10-16; 3:1-6.

 Mpoonya mungelo Gabriyeli wakaamba majwi aali ku Luka 1:37, andiza kayeeya kujatikizya Mariya alimwi a Elizabeta. Majwi aaya asyomezya bakombi ba Jehova mazuba aano kuti uyoozumanana kubamba zisyomezyo zyakwe. Eeci cibikkilizya kugusya mfwulumende zyabantu akubikka bulelo bululeme bwa Mwanaakwe Jesu Kristo, Mwami wa Bwami bwa Leza bwakujulu.​—Daniele 2:44; 7:13, 14.

 Amweebelele kavidiyo aaka kutegwa mubone twaambo tupati-pati ituli mubbuku lya Luka.