“Ncencico eeci ncendimwaambila kuti, zintu zyoonse nzyomupailila akulomba, amube alusyomo lwakuti mwapegwa kale, eelyo muyooba aanzizyo.”—Marko 11:24, Bbaibbele lya Busanduluzi Bwanyika Mpya.

 “Boobo ncindamwaambila kuti, coonse ncimukomba akukumbila, amusyome kuti mulatambula nciconya, elyo mulacipegwa ncobeni.”—Marko 11:24, The Bible in Tonga Lyamu 1963.

 Kwiinda mumajwi aaya, Jesu wakatondezya basikwiiya bakwe mbociyandika kuba alusyomo luyumu munguzu nzyoujisi mupailo. Wakabasyomezya kuti Leza taiswiilili buyo mipailo yabo, pele ulaingula. Muntu uupaila kuzwa ansi aamoyo kweelana amakanze aa Leza ulakonzya kusinizya kuti zintu nzyapailila zilakonzya kucitika. Cili mbuli kuti mupailo wakwe waingulwa kale.

 Jesu wakakankaizya mbociyandika kupaila kumwi katujisi lusyomo. Wakapandulula kuti ciindi muntu napaila weelede kuti “katadooneki mumoyo wakwe” pele kajisi “lusyomo lwakuti ncaamba cilacitika.” (Marko 11:23) Nkaambo nzi? Akaambo kakuti aabo badooneka tabakonzyi “kulangila kutambula cintu cili coonse kuzwa kuli Jehova.” a—Jakobo 1:5-8.

 Muntu ujisi lusyomo ulapaila mubukkale busiyene-siyene. (Luka 11:9, 10; Baroma 12:12) Munzila eeyi, ulatondezya kuti ulaziyanda ncobeni zintu nzyalomba alimwi ulasyoma kuti Leza ulakonzya kwiingula mipailo yakwe. Alimwi ulizyi kuti Leza ulakonzya kwiingula mupailo wakwe ikutali munzila njaali kuyeeyela akuti ulakonzya kucita oobo aciindi ncatali kuyeeyela.—Baefeso 3:20; Bahebrayo 11:6.

 Nokuba boobo, majwi aa Jesu taambi kuti kufwumbwa muntu ulakonzya kulangila kutambula zintu zyoonse nzyalomba mumupailo wakwe kuli Leza. Jesu wakali kwaambila basikumutobela, baalumi bakajisi lusyomo balo ibakali kusolekesya kukomba Leza munzila njakkomanina. Bbaibbele lyaamba kuti Jehova uswiilila mipailo yalo yeendelana akuyanda kwakwe. (1 Johane 5:14) Taswiilili mipailo yabaabo baunduluzya zyeelelo zyakwe alimwi ibacita zintu zibi kakunyina kweempwa. (Isaya 1:15; Mika 3:⁠4; Johane 9:31) Kutegwa mwiiye zinji kujatikizya mipailo Leza njaingula, amweebelele kavidiyo aaka kafwaafwi.

 Kakuceede ciindi cisyoonto kuti amanizye mulimo wakwe waanyika, Jesu wakabandika abasikwiiya bakwe mbociyandika kutondezya lusyomo luyumu muli Leza. Wakatondezya eeci mbociyandika kwiinda mukubelesya cikozyanyo. Ciindi nobakali kuunka ku Jerusalemu, wakabona mukuyu wakajisi matuvwu. Pele cisamu eeci tiicakajisi micelo, aboobo Jesu wakacisinganya. (Marko 11:12-14) Nokuba kuti cisamu eeci cakali kulibonya kabotu mubwini tiicakali kuzyala. Ncimwi buyo ambobakabede bana Israyeli basinku, bakali kulibonya kuti bakomba Leza, pele bakanyina lusyomo. (Matayo 21:43) Kalitanalampa, cisamu eeci calo cakali kutondezya zintu zyakali kuyoocitika ino-ino kuba Israyeli batajisi lusyomo.—Marko 11:19-21.

 Mukwiimpana, Jesu wakalisinizyide kuti basikumutobela bakali kuyooba alusyomo luyandika kutegwa bazunde buyumu-yumu alimwi akucita milimo iigambya. (Marko 11:22, 23) Lulayo lwa Jesu kujatikizya makani aakupaila lwakasika aciindi ceelede nkaambo lusyomo lwabasikumutobela lwakali aafwaafwi akusunkwa. Bakeelede kuliyumya akaambo kalufwu lwa Jesu alimwi kukazyigwa mumulimo wabo kwakali kuyaabwiindilila. (Luka 24:17-20; Milimo 5:17, 18, 40) Mazuba aano, basikutobela Jesu balakonzya kuzunda bukkale bukatazya ciindi nobatondezya lusyomo lwabo muli Leza alimwi amunguzu zyamupailo.—Jakobo 2:26.

 Amweebelele kavidiyo aaka mubone zijatikizyidwe mubbuku lya Marko.