TUPANGO TWAMU BBAIBBELE TWAPANDULULWA

Matalikilo 1:1—“Kumatalikilo, Leza Wakalenga Julu Anyika”

AMULIZYE

“Kumatalikilo, Leza wakalenga julu anyika.”—Matalikilo 1:1, Bbaibbele lya Busanduluzi Bwanyika Mpya.

“Kumatalikilo Leza wakalenga ijulu anyika.”—Matalikilo 1:1, The Bible in Tonga Lyamu 1963.

Bupanduluzi bwa Matalikilo 1:1

Cibalo eeci cili kumatalikilo aa Bbaibbele caamba twaambo tobilo twamasimpe tuyandika kapati. Kaambo kakusaanguna nkakuti, “julu anyika,” zyakajisi matalikilo. Kaambo kabili nkakuti, zyakalengwa a Leza.—Ciyubunuzyo 4:11.

Bbaibbele talyaambi ciindi ncaakatola Leza kutegwa alenge bubumbo, alimwi talipandululi mbwaakabulenga. Pele lilapandulula kuti wakalenga bubumbo kwiinda mukubelesya “nguzu zyakwe zinji kapati alimwi zigambya.”—Isaya 40:26.

Ibbala lyakuti “wakalenga” lisanduludwe kuzwa kubbala lya Chihebrayo lyalo libelesyegwa buyo kupandulula mulimo ngwacita Leza. a Mu Bbaibbele, Jehova b Leza alikke nguambwa kuti Mulengi.—Isaya 42:5; 45:18.

Makani aayengelede lugwalo lwa Matalikilo 1:1

Mukapango aaka kakusaanguna kabbuku lya Matalikilo motusaanguna kujana makani aakulenga aajanika kucaandaano 1 a 2 cabbuku lya Matalikilo. Kuzwa ku Matalikilo 1:1 kusikila ku 2:4, mubufwaafwi Bbaibbele lilapandulula nzyaakacita Leza kutegwa alenge nyika azintu zyoonse zipona zili mumo, kubikkilizya amwaalumi wakusaanguna alimwi amukaintu. Mpoonya kuzwa mu 2:7 kuya kumbele, Bbaibbele lilatwaambila makani manji kujatikizya mbwaakalenga mwaalumi alimwi amukaintu.—Matalikilo 2:7-25.

Bbuku lyamatalikilo litondezya kuti Leza wakalenga zintu “mumazuba” aali 6. Aaya tanaakali mazuba aajisi mawoola aali 24 pe, pele akali mazuba manji kapati. Masimpe, bbala lyakuti “buzuba” lilakonzya kwaamba ciindi cilamfwu kutali buyo mawoola aali 24. Eeci cilaambidwe kulugwalo lwa Matalikilo 2:4, lyalo libelesya bbala lyakuti “mubuzuba” munzila iikozyenye abbala lyakuti “ciindi,” mpoonya akwaamba mulimo ngwaakacita Leza wakulenga iwakacitwa mumazuba aali 6 kuti wakacitwa “mubuzuba” bomwe.

Twaambo Tutaluzi Kujatikizya Matalikilo 1:1

Kaambo kataluzi: Leza wakalenga bubumbo myaka yazyuulu zisyoonto zyainda.

Kaambo kamasimpe: Bbaibbele kunyina nolyaamba ciindi bubumbo nobwakalengwa. Majwi aajanika ku Matalikilo 1:1 taakazyanyi ambobaamba basayaansi kuti bubumbo bwakalengwa mabbiliyoni aamyaka yainda. c

Kaambo kataluzi: Lugwalo lwa Matalikilo 1:1 lwaamba kuti Leza Mbutatu akaambo kakuti bbala lya Chihebrayo lyakasandululwa kuti “Leza” lyaamba zintu zinji.

Kaambo kamasimpe: Izina lyakuti “Leza” ilyakasandululwa kuzwa kubbala lya Chihebrayo lyakuti ’Elo·himʹ, lyaamba bulemu, kutali mweelwe wabantu. Bbuku litegwa The New Catholic Encyclopedia lilazuminizya kuti bbala lyakuti ’Elo·himʹ ilibelesyedwe ku Matalikilo 1:1 “lyoonse lyaamba zintu zinji, kutondezya bulemu kutali mweelwe.”—Second Edition, Volume 6, peeji 272.

Amubale Matalikilo caandaano 1 kubikkilizya abupanduluzi buyungizyidwe alimwi amakani aakozyenye.

a Kujatikizya bbala eeli, Bbaibbele Lyakwiiya litegwa HCSB lyaamba kuti: “Mbolibelesyedwe bbala eeli lyamu Chihebrayo lyakuti bara’, ilyaamba ‘kulenga,’ talyaambi mulimo ngwacita muntu. Aboobo bbala lyakuti bara’ lipandulula mulimo uulibedelede ngwacita Leza.”—Peeji 7.

b Jehova ndizina lya Leza limugeme.—Intembauzyo 83:18.

c Kujatikizya mbocili cilamfwu ciindi cakasandululwa kuti “kumatalikilo,” Bbaibbele litegwa,” The Expositor’s Bible Commentary lyaamba kuti: “Ciindi cini tacaambidwe cacigaminina pe.”—Revised Edition, Volume I, peeji 51.