“Amuboole kulindime nyoonse nomukatede akulemenwa, eelyo ndilamukatalusya. Amulikulike joko lyangu, mwiiye kulindime, nkaambo ndili mubombe moyo, alimwi ndilalicesya, eelyo mulakatalusyigwa. Nkaambo joko lyangu talikatazyi kunyamuna, alimwi mukuli wangu muuba.”—Matayo 11:28-30, Bbaibbele lya Busanduluzi Bwanyika Mpya.

 “Amuboole kulindime nyoonse nomukatede nomulemenwa, ndime enti kamulemunune. Amulikulike ijokwe lyangu, mwiiye kwangu, nkaambo ndilibombede, ndi mutete moyo, lino mulakatulukwa mumyoyo yanu, nkaambo ijokwe lyangu lilibulungusene, awalo mukuli wangu muuba.”—Matayo 11:28-30, The Bible in Tonga Lyamu 1963.

 Jesu wakatamba baswiilizi bakwe kuboola kulinguwe. Aboobo wakabasyomezya kuti kwiinda mukwiiya kulinguwe, bakali kuyookatalusyigwa alimwi akulemununwa.

 “Amuboole kulindime nyoonse nomukatede akulemenwa.” Bantu aabo Jesu mbaakatamba kwiinda mukubelesya majwi aaya, bakali ‘kulemenwa’ amilawo alimwi azilengwa zyabasololi bazikombelo. (Matayo 23:4; Marko 7:7) Kuyungizya waawo, bantu bakali kulibilika kapati alimwi akukatala akaambo kakuti bakali kubeleka milimo miyumu kwamawoola manji kutegwa bacikonzye kujana nzyobakali kuyandika mubuumi.

 “Ndilamukatalusya.” Jesu wakasyomezya kubakatalusya naa kubapa kulyookezya aabo ibakakuzumina kutamba kwakwe. Wakacita oobo kwiinda mukubagwasya kumvwisya cini Leza ncaakali kulangila kulimbabo. (Matayo 7:24, 25) Luzyibo oolu lwakabaangulula kubuzike bwanjiisyo zyakubeja alimwi akukudyaamininwa azilengwa zyabukombi. (Johane 8:31, 32) Nokuba kuti bakali kuyandika kubeleka canguzu kutegwa baiye akubelesya njiisyo zya Jesu, kucita boobo kwakabakatalusya kapati.

 “Amulikulike joko lyangu, mwiiye kulindime.” Kaindi, kanji-kanji babelesi bakali kubelesya joko, nkokuti cisamu icakali kubikkwa amagwezyo, kunyamuna zintu zilema. Aboobo, bbala lyakuti “joko” lyakali kupa muzeezo wakutobela malailile abusolozi bwamuntu umbi. (Levitiko 26:13; Isaya 14:25; Jeremiya 28:⁠4) Mabala aakuti “mwiiye kulindime” alakonzya kusandululwa kuti “amube basikwiiya bangu.” Aboobo, Jesu wakali kukulwaizya baswiilizi bakwe kuti babe basikwiiya kwiinda mukumutobela alimwi akwiiya cikozyanyo cakwe.—Johane 13:13-15; 1 Petro 2:21.

 “Mulakatalusyigwa.” Jesu tanaakasyomezya kuti mapenzi oonse akali kuyoomana mpoonya-mpoonya. Pele, wakagwasya baswiilizi bakwe kujana luumbulizyo alimwi abulangizi. (Matayo 6:25-32; 10:29-31) Aabo ibakazooba basikwiiya bakwe akuzumina njiisyo zyakwe bakajana kuti kubelekela Leza tiikwakali kuminya pe, muciindi caboobo, kwakali kupa kukkutila kwini-kwini.—1 Johane 5:3.

 “Nkaambo joko lyangu talikatazyi kunyamuna, alimwi mukuli wangu muuba.” Mukwiimpana abasololi bazikombelo bamumazuba aakwe, walo Jesu wakali kulicesya alimwi wakali mubombe moyo. (Johane 7:47-49) Tanaakali mukali alimwi tanaakali kubadyaaminina bantu. Muciindi caboobo, wakali aluzyalo alimwi wakali kusikilika. Kuyungizya waawo, wakali kunyoneka kujatikizya nzyaakali kulangila kuli basikumutobela. (Matayo 7:12; Marko 6:34; Luka 9:11) Wakabatondezya mbobakali kukonzya kugwasyigwa aluse lwa Leza alimwi akuba alukkomano luboola akaambo kakuba amanjezyeezya aasalala. (Matayo 5:23, 24; 6:14) Bube bubotu bwa Jesu tiibwakapa buyo kuti bantu bakwelwe kulinguwe, pele bwakapa kuti baizumine joko lyakwe litakatazyi kunyamuna kumane akuba basikwiiya bakwe.

 Jesu wakaamba majwi aalembedwe ku Matayo 11:28-30 ciindi naakali kukambauka mu Galilaya mumwaka wa 31 C.E. Akati kabalembi ba Makani Mabotu, alikke mwaapostolo Matayo ngowakalemba majwi aaya aa Jesu. Mbwaanga musyule Matayo wakali simutelo alimwi amu Juda, wakalizyi kabotu-kabotu bantu mbobakali kudyaamininwa kutali buyo amitelo yabana Roma pele alimwi azilengwa zyabukombi zyakuupa-upa ameso zyaba Juda. Aboobo, tacidoonekwi buya kuti wakakulwaizyigwa ciindi naakabona Jesu kabelesya nguzu nzyaakapegwa a Bausyi, Jehova, a kutamba bantu balicesya alimwi ibakaminidwe kuti baboole kulinguwe.—Matayo 11:25-27.

 Makani Mabotu aa Matayo atondezya bube bubotu kapati Jesu mbwaakatondezya kali Mesiya iwakasyomezyedwe alimwi kumbele iwakali kuyooba mwami wa Bwami bwa Leza.—Matayo 1:20-23; Isaya 11:1-5.

 Amweebelele kavidiyo aaka kutegwa mubone twaambo tupati-pati ituli mubbuku lya Matayo.