“Yebo omuntu, wakwaambila kale cintu cibotu. Ino ncinzi Jehova ncayanda kulinduwe? Uyanda buyo kuti kocita bululami, koyandisya kusyomeka, alimwi akweenda cakulibombya a Leza wako!”—Mika 6:8, Bbaibbele lya Busanduluzi Bwanyika Mpya.

 “Wakutondezya, O muntu, cintu cibotu mbucibede. Taakwe cintu cimbi Jehova ncanyanda kulinduwe, pele kucita bululami akuyanda luzyalo akweenda cakulibombya a-Leza wako.”—Mika 6:8, The Bible in Tonga Lyamu 1963.

 Musinsimi Mika wakaamba kuti tacili ciyumu pe kukkomanisya Jehova a Leza. (1 Johane 5:3) Aboobo zintu Leza nzyayanda kulindiswe zilaambidwe mukapango aaka munzila zyotatwe. Nzila zyobilo zyakusaanguna zijatikizya muntu mbwabeendelezya bamwi, mpoonya yatatu ibikkilizya cilongwe muntu ncajisi a Leza.

 “Kocita bululami.” Leza uyanda kuti bakombi bakwe kabacita zintu cabululami. Eeci cibikkilizya mbotuyeeya alimwi akucita zintu munzila yeendelana azyeelelo zyakwe zijatikizya ciluzi acitaluzi. (Deuteronomo 32:4) Mucikozyanyo, aabo batobela zyeelelo zya Leza balasolekesya kweendelezya bantu boonse cakusyomeka alimwi acakutasalulula, tacikwe makani ambobakakomezyegwa, cisi nkobazwa, naa bukkale bwabo.—Levitiko 19:15; Isaya 1:17; Bahebrayo 13:18.

 “Koyandisya kusyomeka.” Majwi aaya alakonzya kwaambwa kuti “ikuyanda luyando lutamani.” (Mika 6:8, bupanduluzi buyungizidwe) Mu Chihebrayo, ibbala lyakuti “kusyomeka” talyaambi buyo kusyomeka kubalongwe pele alimwi lyaamba kutondezya luzyalo alimwi alweetelelo kubantu bamwi, akubacitila zintu zinji kwiinda aali zyeezyo nzyotukonzya kubacitila. Leza waambila baabo bayanda kumukkomanisya kuti tabeelede kutondezya buyo luzyalo alimwi alweetelelo, pele beelede kubuyanda bube oobu. Eeci caamba kuti bakombi bakwe beelede kukukkomanina kugwasya bamwi, kwaambisya aabo bayandika lugwasyo. Kupa kulatukkomanisya.—Milimo 20:35.

 “Akweenda cakulibombya a Leza wako.” Mu Bbaibbele, ibbala lyakuti “kweenda” lilakonzya kwaamba “kubweza ntaamu imwi iiyandika.” Kutegwa muntu ayende a Leza, weelede kupona buumi mbwakkomanina. Nowa ncikozyanyo cibotu. Nowa “wakali kweenda a Leza mwini-mwini” nkaambo wakali muntu uululeme mumeso aa Leza alimwi “wakanyina kampenda alimwi wakaliindene abantu mbaakali kupona limwi.” (Matalikilo 6:9) Mazuba aano, ‘tuleenda a Leza’ kwiinda mukutobela nzyolituyiisya Jwi lyakwe Bbaibbele. Kutegwa tucite oobo tweelede kulibombya, nkokuti kuzyiba mpotulezya alimwi akusyoma Leza muzintu zyoonse nzyotucita.—Johane 17:3; Milimo 17:28; Ciyubunuzyo 4:11.

 Mika wakali musinsimi muciindi cabana Israyeli kuzwa mu 777 B.C.E kusikila mu 717 B.C.E. Aciindi eeco, kwakali mituni minji, bumpelenge, alimwi akudyaamininwa. (Mika 1:7; 3:1-3, 9-11; 6:10-12) Bunji bwabana Israyeli tiibakali kubikkila maano kuzintu nzyakali kuyanda Leza, izyakali mu Mulawo ngwaakapedwe Musa, walo wiitwa kuti Mulawo wa Musa. Aciindi nciconya, bantu banji bakali kuyeeya kuti balakonzya kumukkomanisya Leza kwiinda mukucita zilengwa zyabukombi alimwi akupa zituuzyo.—Tusimpi 21:3; Hosea 6:6; Mika 6:6, 7.

 Kakwiindide myaka minji naakali kupona Mika, Jesu wakainduluka kwaamba kuti Bausyi balabakkomanina aabo batondezya luyando, bululami, alimwi alweetelelo, pele tababakkomanini aabo balicengeezya kuti balilyaabide kuli Leza. (Matayo 9:13; 22:37-39; 23:23) Majwi aa Jesu atugwasya kumvwisya zintu Leza nzyayanda kubabelesi bakwe bamazuba aano.

 Amweebelele kavidiyo aaka mubone zijatikizyidwe mubbuku lya Mika.