“Muyootambula nguzu muuya uusalala waakusika alindinywe, eelyo muyooba bakamboni bangu mu Jerusalemu, mu Judaya moonse amu Samariya, mane kusikila kumasena aakulamfwu kapati aanyika.”—Milimo 1:8, Bbaibbele lya Busanduluzi Bwanyika Mpya.

 “Muyootambula nguzu, wasika alindinywe Muuya Uusalala, muyooba bakamboni bangu muno mu-Jerusalemu, amu-Judaya moonse, amu-Samariya, mane kusikila kumamanino aanyika.”—Milimo 1:8, The Bible in Tonga Lyamu 1963.

 Jesu wakasyomezya basikumutobela kuti bakali kuyootambula nguzu kwiinda mumuuya uusalala wa Leza, kutegwa babeleke mulimo wabo wakukambauka kusikila kumasena aakulamfwu kapati aanyika.

 “Muyootambula nguzu muuya uusalala waakusika alindinywe.” Jesu wakacaamba alimwi cisyomezyo ncaakaambide kuli basikwiiya bakwe kuti bakali kuyootambula lugwasyo kwiinda mumuuya wa Leza a aakujoka kujulu. (Johane 14:16, 26) Nikwakainda mazuba aali kkumi kuzwa ciindi Jesu naakaunka kujulu mumwaka wa 33 C.E., basikwiiya bakwe bakatambula muuya uusalala ngwaakabasyomezyede. (Milimo 2:1-4) Muuya wa Leza tiiwakali buyo kubapa kwaambaula mumyaambo iisiyene-siyene alimwi akucita maleele pele alimwi wakabapa nguzu zyakukambauka cabusicamba kujatikizya lusyomo lwabo muli Jesu.—Milimo 3:1-8; 4:33; 6:8-10; 14:3, 8-10.

 “Muyooba bakamboni bangu.” Bbala lyakasandululwa kuti “bakamboni” lyaamba “muntu waamba cintu cimwi ncaakabona kacicitika.” Mbwaanga bakalibonena naakali kupona Jesu, baapostolo bakali kukonzya kwaamba zintu zyakacitika mumulimo wakwe, naakafwa alimwi anaakabusyigwa. (Milimo 2:32; 3:15; 5:32; 10:39) Bumboni bwabo busalede bwakakulwaizya bantu banji kuzyiba kuti Jesu wakali Kristo, Mesiya wakasyomezyedwe. (Milimo 2:32-36, 41) Aabo ibakasyoma baapostolo bakaba bakamboni ba Jesu, mpoonya abalo bakatalika kukambaukila bamwi kujatikizya ncobwakali kwaamba buumi bwa Jesu, lufwu lwakwe alimwi abubuke.—Milimo 17:2, 3; 18:5.

 “Kusikila kumasena aakulamfwu kapati aanyika.” Majwi aaya alimwi alakonzya kwaambwa kuti “kusikila kumagolelo aanyika” naa “kuzisi zimwi.” Majwi aa Jesu atondezya nkobakali kuyoosika basikwiiya bakwe kukambauka kujatikizya nguwe. Bakali kuyakwiindilila mucisi ca Judaya alimwi a Samariya kabayaabukambauka kujatikizya nzyobakali kusyoma. Alimwi buya, bakali kuyoobeleka cilawo cipati kapati akusikila bantu banji kapati kwiinda mbaakasikila Jesu. (Matayo 28:19; Johane 14:12) Kakutanainda myaka iili 30 kuzwa ciindi Jesu naakaamba majwi aaya, mwaapostolo Paulo wakalemba kuti makani mabotu aa Jesu “akakambaukwa kuzilenge zyoonse zili ansi aajulu,” nokuba kumasena aakulamfwu mbuli ku Roma, Parthia (lwizi lwa Caspian nkoluli kumusanza lwaajwe), alimwi aku North Africa.—Bakolose 1:23; Milimo 2:5, 9-11.

 Bbuku lya Milimo lilatalika kwiinda mukwaamba zintu zyakacitika izilembedwe kumamanino aabbuku lya Makani Mabotu aa Luka. (Luka 24:44-49; Milimo 1:4, 5) Mulembi wandilyo, sikwiiya Luka, wakatalika cibalo cakwe kwiinda mukupandulula mbwaakalibonya Jesu kuli basikumutobela bakwe ciindi naakabusyigwa. (Milimo 1:1-3) Mpoonya ulaamba mbungano ya Bunakristo mboyakatalika alimwi amboyakakomena kuzwa mu 33 C.E. kusikila cakuma 61 C.E.—Milimo 11:26.

 Majwi aaengelede lugwalo lwa Milimo 1:8 atondezya kuti basikutobela Jesu bakali kulibilika naa kuti Jesu wakali kuyootalika kulela kali Mwami wa Bwami bwa Leza ciindi nobakali kupona. (Milimo 1:6) Mukwiingula, Jesu wakabaambila kutalibilika kujatikizya ciindi Bwami nobwakali kuyootalika kulela. (Milimo 1:7) Muciindi caboobo, basikumutobela bakeelede kubikkila maano kukupa bumboni kujatikizya Jesu “kumasena aakulamfwu kapati aanyika.” (Milimo 1:8) Munzila njiyonya, Banakristo mazuba aano balakambauka cabusungu makani mabotu aajatikizya Bwami bwa Leza.—Matayo 24:14.

 Amweebelele kavidiyo aaka kutegwa mubone twaambo tupati-pati ituli mubbuku lya Milimo.