“Kosyoma Jehova amoyo wako woonse, utasyomi maano aako omwini pe. Munzila zyako zyoonse kolanga kulinguwe, eelyo walo ulalulamika nzila zyako.”—Tusimpi 3:5, 6, Bbaibbele lya Busanduluzi Bwanyika Mpya.

 “Syoma Jehova amoyo wako woonse; utalifunkizyi kumaanu aako omwini. Umuzibye munzila zyako zyoonse, nkabela uyooenzya myeendelo yako.”—Tusimpi 3:5, 6, The Bible in Tonga Lyamu 1963.

 Tweelede kulomba busolozi bwa Jehova a Leza ciindi notusala zintu ziyandika mubuumi, kwiinda kulisyoma tobeni.

 “Kosyoma Jehova amoyo wako woonse.” Tulatondezya kuti tulamusyoma Leza kwiinda mukucita zintu munzila njayanda. Tweelede kumusyoma cakumaninina, amoyo wesu woonse. Mu Bbaibbele, kanji-kanji moyo waamba mbwalimvwa muntu, nzyayeeya alimwi ambwazilanga zintu. Aboobo, kusyoma Leza amoyo wesu woonse cibikkilizya zintu zinji. Nkusala nkotucita akaambo kakuti tulisinizyide kuti Mulengi wesu ulizyi zintu zikonzya kutugwasya.—Baroma 12:1.

 “Utasyomi maano aako omwini pe.” Tweelede kumusyoma Leza akaambo kakuti tatukonzyi kusyoma mizeezo yesu iitalondokede. Ikuti twalisyoma tobeni naa kulekela mbotulimvwa kutupa kusala zyakucita, tulakonzya kusala zintu zikonzya kulibonya kuba kabotu kumatalikilo pele kumamanino zyaakutunjizya mumapenzi. (Tusimpi 14:12; Jeremiya 17:9) Busongo bwa Leza bulisumpukide kapati kwiinda bwesu. (Isaya 55:8, 9) Ikuti naa twasololelwa anguwe, tulakonzya kuzwidilila muzintu nzyotucita.—Intembauzyo 1:1-3; Tusimpi 2:6-9; 16:20.

 “Munzila zyako zyoonse kolanga kulinguwe.” Tweelede kubona zintu mbubwenya mbwazibona Leza mumbazu zyoonse izyabuumi bwesu alimwi aleelyo notuyanda kupanga zyakusala zipati. Tulacita oobo kwiinda mukulomba busolozi kulinguwe mumupailo alimwi akutobela ncatwaambila kwiinda mu Jwi lyakwe, Bbaibbele.—Intembauzyo 25:4; 2 Timoteyo 3:16, 17.

 “Walo ulalulamika nzila zyako.” Leza ulalulamika nzila zyesu kwiinda mukutugwasya kupona kweelana azyeelelo zyakwe ziluleme. (Tusimpi 11:5) Aboobo, tulacikonzya kweeleba mapenzi alimwi akupona buumi bukkomanisya.—Intembauzyo 19:7, 8; Isaya 48:17, 18.

 Bbuku lyamu Bbaibbele lya Tusimpi lijisi njiisyo zipa kuzwidilila alimwi akuba abuumi bukkomanisya, ibuumi mbwakkomanina awalo Leza. Zyaandaano zyakusaanguna izili 9 zijisi lulayo luli mbuli lwamuzyali uulaya mwanaakwe musankwa ngwayandisya. Caandaano 3 citondezya mpindu nzyobajana aabo babikkila maano alimwi akububelesya busongo bwa Mulengi wesu.—Tusimpi 3:13-26.