Iciindi Jesu naakafwa, mukaintu wazina lya Mariya Magadalene wakaliko. Wakeetezyegwa kapati ciindi naakalungumana mujulu, kumwi kapukuta misozi kumeso aakwe, akaambo kakuti Mwami wakwe ngwaakali kuyanda kapati wakali kulengelela acisamu. Lyakali syikati ciindi camupeyo, “pele kwakaba mudima mucisi coonse”! (Luka 23:44, 45) Wakalibamba-bamba cisani mpoonya akuswena munsi abamakaintu bamwi. Kubaya kwazuba, kwalo ikutola buyo maminiti masyoonto, inga tiikwatola mawoola otatwe. Aciindi eeco, Mariya abamwi ibakaimvwi munsi a Jesu ambweni bakatalikide kumvwa kulila kwabanyama ibeenda buyo masiku. Bantu bamwi ibakali kulangilila “bakayoowa kapati akwaamba kuti: ‘Ncobeni ooyu wali Mwana wa Leza.’” (Matayo 27:54) Basikutobela Jesu abamwi andiza bakatalika kuyeeya kuti Jehova wakali kuyanda kubatondezya kuti wausa alimwi ulinyemede akaambo kakumupenzya citaambiki Mwanaakwe.

Nokuba kuti cakamucisa kapati Mariya Magadalene kubona Jesu kali acisamu, tanaakali kuyanda kumusiya. (Johane 19:25, 26) Masimpe ngakuti Jesu wakalicimvwide. Abalo banyina bakali kuyandika luumbulizyo.

Kulanga zintu Jesu nzyaakamucitila Mariya, wakayanda kuti awalo amucitile kufwumbwa ncaakali kukonzya. Aciindi cimwi wakali mukaintu uupengede alimwi iwatakali kulemekwa, pele Jesu wakazicinca zyoonse eezyo. Wakapa kuti abe mukaintu uulemekwa alimwi iwakali kupona buumi bukkomanisya. Wakazyikuba mukaintu uujisi lusyomo luyumu. Mubuti? Alimwi ncinzi ncotukonzya kwiiya kulusyomo lwakwe?

Mu Bbaibbele, cibalo caamba zya Mariya Magadalene citalikila aciindi naakapegwa cipego. Jesu wakamwaangununa kubukkale bwakamupenzya citaambiki. Mumazuba aayo, madaimona akalidumide kapati, alimwi akali kubapenzya bantu kwiinda mukunjila mulimbabo akutalika kubeendelezya. Tatuzyi naa mucaangu akali kumupenzya munzila nzi madaimona; pele ncotuzyi ncakuti wakanjidwe madaimona makali aali ciloba. Pele akaambo ka Jesu Kristo, oonse akagusyigwa!—Luka 8:2.

Lino mbwaanga Mariya wakaangununwa kumyuuya eeyi mibyaabi, wakatalika kupona buumi bupya. Ino wakali kuyootondezya buti kulumba kuli Jesu? Wakaba sikumutobela uusyomeka. Kunze lyaboobo, wakatalika kugwasyilizya Jesu abaapostolo bakwe ibakabulide cakulya, zisani, abusena bwakoona. Tiibakavwubide pe, alimwi tiibakali kubeleka milimo yakumubili aciindi eeci. Aboobo kutegwa babikkile maano kumulimo wakukambauka akuyiisya, bakali kuyandika lugwasyo lwakumubili.

Mariya abamakaintu bamwi bali mbobabede bakatalika kugwasyilizya kulubazu oolu. Bamakaintu aaba bakali “kubakutaukila kwiinda mukubelesya lubono lwabo.” (Luka 8:1, 3) Kweelede kuti bamwi akati kabamakaintu aaba bakalivwubide. Bbaibbele talyaambi naa bakali kujika zyakulya, naa nkuwasya zisani, naa kubabambila kwakukkala muminzi mobakali kuyaabwiinda. Pele cakulisungula, bakabalanganya baapostolo alimwi a Jesu, ambweni ibakali 20 antoomwe. Cakutadooneka milimo njobakabeleka yakagwasya kuti Jesu abaapostolo bakwe babikkile maano kumulimo wakukambauka. Bwini mbwakuti Mariya wakalizyi kuti kunyina naakali kukonzya kumubbadela Jesu kucintu ncaakamucitila, pele wakalikkomene kapati kucita kufwumbwa ncaakali kukonzya!

Mazuba aano, bantu banji balibona kuba bantu loko cakuti tababalemeki aabo bacitila bamwi milimo yaansi. Pele oobo tabusyi Leza mbwalimvwa. Amweezyeezye buyo mbwaakakkomene kubona mbwaakalyaaba Mariya, kucita kufwumbwa ncaakali kukonzya kutegwa agwasye Jesu abaapostolo bakwe! Amazuba aano, nkobali Banakristo basyomeka ibabelekela bamwi milimo yaansi. Zimwi ziindi kulyaaba kugwasya kalimo kasyoonto naa kwaamba buyo majwi mabotu kulakonzya kugwasya kapati. Jehova ulalumba milimo iili boobu.—Tusimpi 19:17; Bahebrayo 13:16.

Mariya Magadalene wakali akati kabamakaintu ibakaunka a Jesu ku Jerusalemu ku Pobwe Lyakwiindilila lyamu 33 C.E. (Matayo 27:55, 56) Naakamvwa kuti Jesu waangwa akubetekwa masiku, cakutadooneka wakakopana kapati. Tiicakagolela waawo pe. Mweendelezi Ponto Pilato, iwakayungwa abasololi bacikombelo caci Juda ankamu yabantu, wakalailila kuti Jesu ajaigwe ilufwu lubyaabi kapati acisamu cakupenzyezya. Aciindi aawa, Mariya wakalimubwene kale Simalelaakwe kuti wakalikatede, kayaabulikwela kweenda mumigwagwa, kumwi kanyamwide cisamu cakupenzyezya.—Johane 19:6, 12, 15-17.

Nobakasika kubusena nkwaakajailwa Jesu, alimwi mudima nowakaba aciindi camasyikati, Mariya Magadalene abamakaintu bamwi bakaliimvwi “munsi aacisamu cakupenzyezya ca Jesu.” (Johane 19:25) Mariya, iwakaliko kusikila Jesu naakafwa, wakabona akumvwa Jesu naakali kwaambila mwaapostolo Johane ngwaakali kuyandisya kuti akabalanganye banyina. Wakamvwa Jesu naakalila ceetezya kuli Bausyi. Alimwi wakamvwa naakaamba majwi aamamanino katanafwa aakuti, “Zyazuzikizyigwa.” Cakamucisa kapati. Noliba leelyo naakamaninina Jesu, wakaciliko. Kumane wakaakukkala kucuumbwe cipya, imwaalumi muvwubi uutegwa Josefa waku Arimateya nkwaakabikkide mubili wa Jesu.—Johane 19:30; Matayo 27:45, 46, 57-61.

Cikozyanyo ca Mariya citugwasya kubona ncotweelede kucita ciindi bakombima nobasikilwa mapenzi. Masimpe kuti inga tiitwaalesya mapenzi aabo naa kumana buumba mbobajisi. Pele tulakonzya kubeetelela akubagwasya cakutayoowa. Kuba buyo ambabo muziindi zyamapenzi cilakonzya kugwasya kapati. Kugwasyilizya bantu bali mumapenzi citondezya kuti tulaalusyomo luyumu alimwi cilakonzya kubaumbulizya.—Tusimpi 17:17.

Nobakamana kubikka mubili wa Jesu mucuumbwe, Mariya wakali akati kabamakaintu ibakaula tununkilizyo tumbi kutegwa bakananike mubili wa Jesu. (Marko 16:1, 2; Luka 23:54-56) Aboobo wakafwuma kakucisiya-siya nobwakainda buzuba bwa Sabata. Amweezyeezye buyo keenda abamakaintu bamwi nokucisiya-siya kabaya kucuumbwe ca Jesu. Munzila, bakali kuyaabubandika mbobayoolikunkulisya bbwe lyakali amulyango wacuumbwe. (Matayo 28:1; Marko 16:1-3) Nokuba boobo, tiibakajokela pe. Bakajisi lusyomo lwakuti balacita kufwumbwa ncobakonzya mpoonya akumusiila Jehova kuti acite zyasyaala.

Andiza Mariya nguwakali kumbele nobakasika kucuumbwe. Naakasika amulyango, wakaima, wakaankamana. Kwakanyina bbwe amulyango, kumane amwalo mucuumbwe mwakanyina mubili! Kakunyina akuwayawaya, wakapiluka kuti akaambile Petro a Johane ncaakajana. Amweezyeezye buyo kapandulula cakuyoowa kuti: “Bamugusya Mwami mucuumbwe, pele tatuzyi nkobamulazika”! Petro a Johane bakazuza kuunka kucuumbwe, baakujana ncobeni mubili tauko, mpoonya bakapiluka kumaanda aabo. *—Johane 20:1-10.

Naakajokela kucuumbwe Mariya, wakali kwiile kwiingaila alikke. Kayoowede kapati acakacitika kucuumbwe, alimwi kulanga mbokwakaumwine, Mariya wakatalika kulila. Mpoonya kacilila, wakasondela alimwi mucuumbwe kuti andiza Mwami wakwe nkwali, pele cakacitika naakasondela cakamugambya kapati. Kwakali bangelo bobilo bakasamide zisani zituba! Bakamubuzya Mariya kuti: “Ino ulila nzi?” Kagambidwe, wakabaambila ncaakaambilide baapostolo kuti: “Bamugusya Mwami wangu, pele tandizyi nkobamuzikkila.”—Johane 20:11-13.

Kumane wakacenguluka akubona mwaalumi kaimvwi kusyule lyakwe. Tanaakamuzyiba, nkaambo wakali kuyeeya kuti wakali mubelesi wamumuunda. Mwaalumi ooyu wakamubuzya kuti: “Omukaintu, ino ulila nzi? Nguni ngoyandaula?” Mariya wakati, “Ikuti naa waubweza mubili wakwe, kondaambila nkowauzikka, nkaubweze.” (Johane 20:14, 15) Lino kamwaayeeya buyo majwi aaya ngaakaamba. Sena mukaintu ooyu alikke naakaunyamuna ncobeni mubili wa Jesu Kristo, imwaalumi wakazyandamene? Mariya tanaakaziyeeya zyoonse eezyi. Walo wakali kuyanda kucita buyo kufwumbwa ncaakali kukonzya.

Ciindi notwasikilwa mapenzi aalibonya kuti malemu kapati cakuti inga tatukonzyi kwaanyamuna, atumwiiye Mariya. Ikuti twabikkila maano kukulezya kwesu kulikke, tuyakuyoowa kapati cakuti tatukacikonzyi kucita cintu nociba comwe. Pele ikuti twacita kufwumbwa ncotukonzya akusiila Leza zyasyaala, tuyoocita zinji kwiinda mbotuyeeya. (2 Bakorinto 12:10; Bafilipi 4:13) Ciinda kubota, tuyoomukkomanisya Jehova. Oobo mbwaakacita Mariya, alimwi wakalumbulwa munzila njaatakali kuyeeyela.

Mwaalumi iwakaimvwi a Mariya tanaakali mubelesi wamumuunda pe. Aciindi cimwi wakali mubezi, mpoonya mwiiyi, kumane wakazyikuba Mwami wa Mariya ngwaakali kuyanda kapati. Pele tanaakamuzyiba, aboobo wakacenguluka. Lino naakazyiba cakali kucitika, Mariya wakakkomana kapati: Jesu wakabusyigwa kali cilenge camuuya canguzu. Alimwi lino wakasamide mubili wabuntu, pele kutali mubili ngwaakajisi katanafwa. Mumazuba aakatobela kuzwa naakabusyigwa, bantu banji, nobaba baabo ibakamuzyi kabotu tiibakali kumuzyiba.—Luka 24:13-16; Johane 21:4.

Ino Jesu wakalizyibya buti kuli Mariya? Ninzila mbwaakamwiita naakati: “Mariya!” Naakamwiita, Mariya wakacenguluka akutalika kwaamba bbala lya Chihebrayo ndyaakali kubelesya kwiita Jesu lyakuti—“Rabboni!” Wakali Mwiiyi wakwe ngwaakali kuyanda kapati! Wakakkomana citaambiki. Wakamujatilila alimwi tanaakali kuyanda kumulekezya naaceya.—Johane 20:16.

Jesu wakazyiba ncaakali kuyeeya Mariya. Aboobo wakamwaambila kuti: “Koleka kundijatilila.” Tulakonzya kweezyeezya kamwaambila oobo cabubombe, andiza kaseka-seka, kumwi kamulekezya asyoonto-syoonto akumwaambila kuti: “Tandinaunka kujulu kuli Taata.” Tiicakalinasika ciindi cakuti aunke kujulu. Wakacijisi mulimo anyika, alimwi wakali kuyanda kuti Mariya agwasyilizye. Cakutadooneka Mariya wakakkala kuswiilila. Wakamwaambila kuti: “Koya kubakwesu ukabaambile kuti, ‘Ndilaunka kujulu kuli Taata alimwi a Bauso, kuli Leza wangu a Leza wanu.’”—Johane 20:17.

Ooyu wakali mulimo mupati kuzwa kuli Simalelaakwe! Mariya wakali akati kabasikwiiya ba Jesu ibakasaanguna kumubona Jesu wakabusyigwa, mpoonya lino wakapegwa mulimo wakwaambila bamwi makani aaya mabotu. Amweezyeezye mbwaakakkomene, mbwaakasungwaala kuyandaula basikwiiya bamwi. Amweezyeezye kaambila bamwi cakutakkazikizya majwi ngatakalubi walo abasikwiiya bamwi aakuti: “Ndamubona Mwami!” Wakabaambila majwi oonse ngaakaamba Jesu, alimwi wakalikkomene cakuti akwaambaula cakali kuyanda kumwaalila. (Johane 20:18) Mulumbe ngwaakaamba wakeendelana anzyobakamvwa basikwiiya kubamakaintu bamwi ibakaunkide kucuumbwe akujana kuti kunyina uuliko.—Luka 24:1-3, 10.

Ino bamaalumi bakacita buti? Kusaanguna bwiinguzi bwabo tiibwakali kabotu. Tubala kuti: “Makani aaya akalibonya kuba aabufwubafwuba kulimbabo, eelyo tiibakabasyoma bamakaintu aabo.” (Luka 24:11) Bamaalumi aaba ibakajisi mizeezo iili kabotu bakakomenena mubusena bamakaintu mobatakali kusyomwa; kweelana acilengwa cakaliko, mukaintu tanaakeelede kucitila bumboni munkuta. Ambweni baapostolo bakali kuyungwa azilengwa zyabo balo kabatazyi. Pele Jesu a Bausyi tabasalululi pe. Eelo kaka cakali coolwe cilibedelede ncobakamupa mukaintu ooyu!

Bwiinguzi mbobakaingula bamaalumi tiibwakapa kuti Mariya anyeme pe. Ncaakazyi ncakuti Simalelaakwe wakali kumusyoma, eeci ncecakali cintu cipati. Ncimwi buyo amazuba aano, boonse ibamutobela Jesu bapegwa mulimo wakumwaya makani mabotu. Bbaibbele lyaamba mulumbe ooyo kuti “makani mabotu aa Bwami bwa Leza.” (Luka 8:1) Jesu tanaakaambila basikumutobela kuti bantu boonse bayakubasyoma naa kuti bayakubalumbaizya kumulimo ngobacita. Muciindi caboobo, wakaamba kuti bayoopenzyegwa. (Johane 15:20, 21) Aboobo Banakristo beelede kumuyeeya Mariya Magadalene. Nokuba kuti basikwiiya bamwi bakamudooneka kumatalikilo, tiicakamutyompya pe kwaambila bamwi makani mabotu aakuti Jesu wabusyigwa!

Mukuya kwaciindi, Jesu wakalibonya kubaapostolo bakwe, mpoonya akuli basikutobela bamwi. Aciindi cimwi wakalibonya kubantu bainda ku 500 aciindi comwe! (1 Bakorinto 15:3-8) Cakutadooneka lusyomo lwa Mariya lwakali kuyaabuyuma lyoonse Jesu alibonya. Ambweni Mariya wakali akati kabamakaintu baambidwe kuti bakaliko ku Jerusalemu ku Pobwe Lyakwiindilila ciindi muuya nowakatilwa amitwe yabasikutobela Jesu.—Milimo 1:14, 15; 2:1-4.

Kufwumbwa mbocibede, tulaalusyomo lwakuti Mariya Magadalene wakazumanana kusyomeka mane kulufwu. Toonse atube amakanze aaya! Tuyakumwiiya Mariya ikuti katulumba zyoonse nzyaakatucitila Jesu akugwasya bamwi kumwi katusyoma lugwasyo ndwapa Leza.