Jehova Leza Singuzuzyoonse ngonguwe waambwa kuti “Alefa a Omega.” Mabala aaya ajanika buyo ziindi zyotatwe mu Bbaibbele.​—Ciyubunuzyo 1:8; 21:6; 22:13. a

 Alefa a Omega mabala aakusaanguna alimwi aamamanino mualufabbeti ya Chigiriki, mwaambo wakabelesyegwa kulemba cibeela ca Bbaibbele ciitwa kuti Cizuminano Cipya cibikkilizya abbuku lya Ciyubunuzyo. Kuba kumatalikilo alimwi akumamanino kwamabala aaya citondezya buyo kuti Jehova alikke ngomatalikilo alimwi amamanino. (Ciyubunuzyo 21:6) Wali Leza Singuzuzyoonse kuzwa kaindi, alimwi unooli Leza Singuzuzyoonse kukabe kutamani. Walo alikke waliko “kuzwa lili alili mane kukabe kutamani.”​—Intembauzyo 90:2.

 Bbaibbele lilaabelesya mabala aaya kwaamba Jehova Leza alimwi a Mwanaakwe, Jesu, pele kaajisi bupanduluzi bwiindene. Amulange-lange zikozyanyo zyobilo.

•   Kulugwalo lwa Isaya 44:6, Jehova wakaamba kuti: “Ndime wakusaanguna alimwi ndime wamamanino. Kunyina Leza uumbi kunze lyandime.” Aawa Jehova utondezya kuti walo ngo Leza mwini-mwini kukabe kutamani; kunze lyakwe taakwe uumbi pe. (Deuteronomo 4:​35, 39) Mukaambo aaka, nkokuti mabala aakuti “ndime wakusaanguna alimwi ndime wamamanino” ajisi bupanduluzi bukozyenye abwamabala aakuti “Alefa a Omega.”

•   Kuyungizya waawo, bbala lyakuti “Mutaanzi [pro’tos, kutali alefa] alyakuti Musyaalizi [e’skha·tos, kutali omega]” alajanika ku Ciyubunuzyo 1:​17, 18 a 2:8. Mutupango ootu, makani aayengelede atondezya kuti iwaambwa wakafwa mpoonya wakabuka. Aboobo, tupango ootu tatukonzyi kwaamba Leza nkaambo kunyina naakafwide. (Habakuku 1:​12) Pele Jesu wakafwa mpoonya wakabusyigwa. (Milimo 3:​13-​15) Ngomuntu wakali mutaanzi kubusyigwa akuba abuumi butafwi kali cilenge camuuya kujulu, nkwakkala lino “lyoonse mane kukabe kutamani.” (Ciyubunuzyo 1:​18; Bakolose 1:​18) Kuzwa naakabusyigwa, Jesu lino nguubusya bantu boonse. (Johane 6:​40, 44) Aboobo, ngowakali musyaalizi kubusyigwa cacigaminina a Jehova. (Milimo 10:40) Munzila eeyi, cakweelela Jesu ulakonzya kwiitwa kuti “Mutaanzi alimwi Musyaalizi.”

 Peepe. Iwaambaula ku Ciyubunuzyo 22:13 tazyibidwe kabotu, alimwi baliindene-indene baambi mucaandaano eeci. Naakali kwaamba cibeela eeci calugwalo lwa Ciyubunuzyo, Professor William Barclay wakalemba kuti: “Zintu tazilembedwe mbozitobelana; . . . Alimwi kanji-kanji cilakatazya kapati kuzyiba kuti wini waambaula nguni.” (The Revelation of John, Volume 2, Revised Edition, peeji 223) Aboobo, “Alefa a Omega” waambidwe ku Ciyubunuzyo 22:13 inga waambwa kuti ngonguwe uupedwe zina eeli amuzibeela zimbi zyabbuku lyabbuku lya Ciyubunuzyo nkokuti Jehova Leza.