Babuloni Mupati waambidwe mubbuku lya Ciyubunuzyo, nzikombelo zyoonse zyakubeja zyamunyika Leza nzyatayandi. a (Ciyubunuzyo 14:8; 17:5; 18:21) Nokuba kuti zikombelo eezyi ziliindene muzintu zinji, munzila imwi zyoonse buyo zitantamuna bantu kukukomba Leza wakasimpe, Jehova.​—Deuteronomo 4:​35.

Mbomukonzya Kumuzyiba Babuloni Mupati

1.   Babuloni Mupati ncitondezyo. Bbaibbele limwaamba kuti “mukaintu” alimwi “muvwuule imupati,” uujisi “zina lyamaseseke lyakuti: ‘Babuloni Mupati.’” (Ciyubunuzyo 17:​1, 3, 5) Bbuku lya Ciyubunuzyo lilembedwe “muzitondezyo,” aboobo cileelela kwaamba kuti Babuloni Mupati ncitondezyo buyo, kutali mukaintu wini. (Ciyubunuzyo 1:1) Kuyungizya waawo, “ukkala atala aamaanzi manji,” alo aayiminina “mikowa yabantu, makamu aabantu, masi alimwi amilaka.” (Ciyubunuzyo 17:​1, 15) Mukaintu wini takonzyi kucita oobo pe.

2.   Babuloni Mupati wiiminina mbunga yamunyika yoonse. Wiitwa kuti “munzi mupati ooyo uujisi bwami bweendelezya bami bamunyika.” (Ciyubunuzyo 17:18) Aboobo ulijisi nguzu zyakweendelezya zintu zicitika munyika yoonse.

3.   Babuloni Mupati nimbunga yazikombelo, kutali mbunga yamapolitikisi naa yamakwebo. Mu Babuloni yansiku bantu bakali kukomba alimwi munzi ooyu wakalizyibidwe kapati akaambo kakubelesya “ziposo” alimwi “abulozi.” (Isaya 47:​1, 12, 13; Jeremiya 50:​1, 2, 38) Alimwi bukombi bwakubeja ibukazya Leza wakasimpe Jehova, bwakali kucitwa ooko. (Matalikilo 10:​8, 9; 11:​2-4, 8) Beendelezi baku Babuloni bakali kulibikka atala kwiinda Jehova abukombi bwakwe. (Isaya 14:​4, 13, 14; Daniele 5:​2-4, 23) Mbubwenya buyo, Babuloni Mupati awalo ulizyibidwe akaambo ‘kamicito yakwe yakusyoma mizimo.’ Eeci citondezya kuti nimbunga yacikombelo.​—Ciyubunuzyo 18:23.

    Babuloni Mupati takonzyi kuba mbunga yamapolitikisi nkaambo “bami bamunyika” bayoomulila aakunyonyoonwa. (Ciyubunuzyo 17:​1, 2; 18:9) Alimwi takonzyi kuba mbunga yamakwebo akaambo kakuti Bbaibbele lilamwaandaanya ‘kubasambazi bamunyika.’​—Ciyubunuzyo 18:11, 15.

4.   Babuloni Mupati uleelela kuba bukombi bwakubeja. Muciindi cakuyiisya bantu mbobakonzya kuba acilongwe a Leza wakasimpe Jehova, bukombi bwakubeja mubwini bubasololela kukukomba baleza bambi. Bbaibbele lyaamba kuti kucita boobo ‘nkuvwuula kwakumuuya.” (Levitiko 20:6; Kulonga 34:15, 16) Njiisyo mbuli ya Butatu alimwi akuti kuli cibeela cizumanana kupona muntu afwa, kubelesya zitondezyo mubukombi zyakatalikila ku Babuloni wansiku alimwi zyazumanana mubukombi bwakubeja. Alimwi zikombelo eezyi zilasanganya bukombi bwanzizyo akutola lubazu muzintu zyanyika. Bbaibbele lyaamba kutasyomeka kuli boobu kuti mbumambe bwakumuuya.​—Jakobo 4:4.

    Lubono alimwi amambonwa aabukombi bwakubeja zileendelana ancolyaamba Bbaibbele kujatikizya Babuloni Mupati, walo ‘wakasamide zisani zyacisombo alimwi zisalala pyu’ alimwi “wakalisakatizya angolida, mabwe mayandisi alimwi angale.” (Ciyubunuzyo 17:4) Kuli Babuloni Mupati nkokuzwa “zintu zisesemya zyamunyika,” naa njiisyo amicito iitamulemeki Leza. (Ciyubunuzyo 17:5) Bantu bamubukombi bwakubeja “mikowa yabantu, makamu aabantu, masi alimwi amilaka” ibamukkomanina Babuloni Mupati.​—Ciyubunuzyo 17:15.

 Babuloni Mupati ulijisi mulandu akaambo ‘kabantu boonse ibakajaigwa anyika.’ (Ciyubunuzyo 18:24) Kuzwa kaindi, bukombi bwakubeja mbobwali kutalisya nkondo akusosela micito yabugwebenga pele alimwi bwaalilwa kuyiisya bantu kasimpe kujatikizya Jehova, Leza waluyando. (1 Johane 4:8) Eeci capa kuti bantu banji bajaigwe. Aboobo aabo ibayanda kumukkomanisya Leza beelede ‘kuzwa mulinguwe,’ akulyaandaanya kubukombi bwakubeja.​—Ciyubunuzyo 18:4; 2 Bakorinto 6:​14-​17.