Bbaibbele lyakasinsima kuti kumazuba aamamanino kunooli zilwazi (zilwazi zyanyika yoonse, kubikkilizya azibbuka buya). (Luka 21:11) Malwazi aali boobu tacili cisubulo kuzwa kuli Leza. Bwini mbwakuti, kwiinda mu Bwami bwakwe, ino-ino Leza uyoomana malwazi oonse, kubikkilizya ayaayo aabbuka buya.

•  Sena Bbaibbele lyakasinsima kujatikizya malwazi aabbuka?

•  Sena kuli ciindi Leza naakasubula bantu kwiinda mukubelesya malwazi?

•  Sena malwazi aabbuka mazuba aano ncisubulo kuzwa kuli Leza?

•  Sena malwazi aabbuka kuli nayoomana?

•  Tupango twamu Bbaibbele twaamba kujatikizya malwazi

 Bbaibbele kunyina nolyakaamba kujatikizya malwazi aagaminide, mbuli bulwazi bwa COVID-19, AIDS, TB, malaria, naa Spanish flu. Nokuba boobo, lyakasinsima kujatikizya “zilwazi” alimwi “azilwazi zijaya” buya. (Luka 21:11; Ciyubunuzyo 6:8) Zilwazi eezyi ncibeela ‘camazuba aamamanino,’ naa kuti “mamanino aabweende bwazintu.”—2 Timoteyo 3:1; Matayo 24:3.

 Bbaibbele lilaamba ziindi zimwi Leza naakabelesya malwazi kusubula bantu. Mucikozyanyo, bantu bamwi wakabasubula acinsenda. (Myeelwe 12:1-16; 2 Bami 5:20-27; 2 Makani 26:16-21) Nokuba boobo, malwazi aaya tanaakabayambukila bantu banyina mulandu. Muciindi caboobo, malwazi aayo lwakali lubeta lwakagaminide kubantu ibakazangila Leza.

 Peepe. Bantu bamwi baamba kuti Leza ubelesya malwazi aabbuka amalwazi aamwi kusubula bantu mazuba aano. Pele, Bbaibbele talyaazumini makani aaya. Nkaambo nzi?

 Kaambo kamwi nkakuti, bakombi ba Leza—bakaindi abamazuba aano—bapenga akaambo kakuciswa. Mucikozyanyo, mwaalumi uusyomeka Timoteyo, wakali “kuciswa-ciswa.” (1 Timoteyo 5:23) Pele Bbaibbele talyaambi kuti eeci cakali cisubulo kuzwa kuli Leza. Ncimwi buyo amazuba aano, babelesi ba Leza basyomeka balaciswa alimwi akuyambukilwa malwazi. Kanji-kanji, inga cili boobu akaambo kakuti toonse tulacitikilwa zintu zitalangilwi.—Mukambausi 9:11.

 Kumane, Bbaibbele liyiisya kuti ciindi Leza nayoosubula basizibi tacinasika. Pele, tupona ‘mubuzuba bwalufwutuko,’ nkokuti, muciindi Leza natamba bantu boonse kuti baswene kulinguwe kutegwa bakafwutulwe. (2 Bakorinto 6:2) Nzila imwi mwabatamba bantu nkwiinda mumulimo wakukambauka wanyika yoonse, imulumbe mubotu nkokuti “makani mabotu aa Bwami.”​—Matayo 24:14.

 Inzya. Bbaibbele lilaamba kuti lino-lino kunoocinyina bacisidwe. Mubweendelezi bwa Bwami bwakwe, Leza uyooponya malwazi oonse. (Isaya 33:24; 35:5, 6) Kupenga, kucisa alimwi alufwu ziyoomana. (Ciyubunuzyo 21:4) Mpoonya uyoobabusya bafwide kutegwa bakapone buumi bubotu, ibukkale nobunoolondokede.—Intembauzyo 37:29; Milimo 24:15.

 Ciyubunuzyo 6:8: ‘Amubone bbiza lituba-tuba, alimwi ooyo wakatantide alindilyo wakajisi zina lyakuti Lufwu. Alimwi Cuumbwe cakali kumutobela munsi-munsi. Eelyo eezyi zyakapegwa nguzu . . . zyakujaya . . . azilwazi zijaya.’

 Bupanduluzi: Businsimi bwabasimabbiza bone ibuli ku Ciyubunuzyo butondezya kuti kwakali kuyooba zilwazi mumazuba eesu.