Kusekelela Isita takuyeeme anjiisyo zyamu Bbaibbele. Kuti mwalanga mumakani aakaindi, inga mwazyiba bupanduluzi bwamasimpe kujatikizya Isita. Isita nciyanza ciyeeme azilengwa zyakaindi zyabuzyazi. Amulange-lange twaambo tutobela.

1.   Izyina: Ibbuku lya Encyclopædia Britannica lyaamba kuti: “Izyina lya Cingisi lyakuti Easter talizyibidwe nkolyakazwa; mupaizi muna Anglo-Saxon, Venerable Bede wamumwaanda wamyaka wa 8 wakaligusya kuzwa kuzyina lyakuti Eostre lyaleza mukaintu muna Anglo-Saxon.” Bamwi baliyaamika kuli Astarte, leza mukaintu wabuzyazyi muna Kanana wakakozyenye a Ishtar waku Babuloni.

2.   Tusulwe: Ootu twiiminina buzyazi. Bbuku lyakuti Encyclopædia Britannica lyaamba kuti buzyazi oobu “bwakazwa kuzilengwa zyakaindi alimwi akumapobwe aabukombi bwakubeja aacitwa mupeyo nowamana ku Europe alimwi aku Middle East.”

3.   Mayi: Kweelana ambolyaamba bbuku lyakuti Funk & Wagnalls Standard Dictionary of Folklore, Mythology and Legend, kuyandaula mayi aa Isita, alo aayeeyelwa kuti alaletwa akasulwe ka Isita, “tacili cisobano mbuli cabana, pele nzilengwa zyabuzyazi.” Muzilengwa zimbi basyoma kuti iji lya Isita lisakatizyidwe “munzila yamasalamuzi lilakonzya kuleta lukkomano, buvwubi, buumi bubotu, alimwi abukwabilizi.”​—Traditional Festivals.

4.   Cisani cipya ca Isita: “Cakali kutondezya kubula bulemu alimwi akulibuzya coolwe kwaanzya leza mukaintu wa Spring naa Isita, waku Scandinavia, kuti kosamide zisani zyakaindi.”​—The Giant Book of Superstitions.

5.   Milimo iicitwa nolyapola zuba: Eeci ceezyanisyigwa azilengwa zyakali kucitwa abantu bakali kukomba zuba kaindi “kutambula zuba alimwi anguzu zyandilyo mukuleta buumi bupya kuzyintu zyoonse zikomena.”​—Celebrations​—The Complete Book of American Holidays.

 Bbuku lyakuti The American Book of Days lilapandulula kabotu mboyakatalika Isita, noliti: “Tacidoonekwi kuti kumatalikilo Cikombelo cakatobela zilengwa zyabantu batakombi Leza alimwi akuzipa bupanduluzi bwa Bunakristo.”

 Bbaibbele lilakasya kukomba Leza kwiinda mukucita tunsiya-nsiya naa zilengwa zitamukkomanisyi. (Maako 7:​6-8) Lugwalo lwa 2 Bakolinto 6:17 lwaamba kuti, “‘Amulyaandaanye,’ mbwaamba Jehova, ‘alimwi amuleke kuguma cintu cisofweede.’” Bantu bayanda kukkomanisya Leza tabasekeleli Isita nkaambo pobwe eeli ndyabantu batakombi Leza.