Ino Ncinzi Bbaibbele Ncolyaamba Kujatikizya Kujolela Cibi?
Bwiinguzi bwamu Bbaibbele
Nokuba kuti muntu ulakonzya kulimvwa kuti ulijisi nguzu zyakujolela cibi, kulimvwa boobo nkucita cintu ciimpene alulayo lwamu Bbaibbele lwakuti: “Utaambi kuti: “Ndilamucitila mbubonya mbwaandicitila; Ndilamujolela kweelana ancaakacita.” (Tusimpi 24:29) Bbaibbele lijisi lulayo lwakagwasya bantu banji kuzunda muuya wakuyanda kujolela cibi.
Mucibalo eeci tulalanga-langa makani aatobela:
Mbubi nzi buliko bwakuyanda kujolela cibi?
Ikuti umwi wakamubisizya naa kumulubizyila, ncizyalwa buya kunyema alimwi akuyanda kuti muntu ooyo asubulwe akaambo kacintu ncaamucitila. Nokuba boobo, Bbaibbele lilakasya kujolela cibi. Nkaambo nzi?
Ciindi bantu nobajolela cibi, tacimukkomanisyi Leza pe. Mu Bbaibbele Jehova a Leza waamba kuti: “Ndime ndisubula; ndime nendiyoopilusya cibi.” (Baroma 12:19) Aboobo Bbaibbele likulwaizya baabo ibakacitilwa cintu cibi kujana nzila mbotu yakubamba twaambo ikuti kacikonzyeka muciindi cakujolela cibi. (Baroma 12:18) Pele ino ncinzi muntu ncakonzya kucita ikuti kakunyina nzila mbotu yakubamba twaambo naa kuti wasoleka nzila zyoonse pele caala? Magwalo atwaambila kusyoma Jehova kuti ulakonzya kululamika zintu zyoonse zinyongene.—Intembauzyo 42:10, 11.
Ino mbuti Leza mbwasubula bantu?
Kwalino, Leza ulazumizya mfwulumende zyabantu kusubula baabo ibatyola mulawo. (Baroma 13:1-4) Mukuya kwaciindi, uyooleta bululami kuli baabo boonse ibateendelezyegwi kabotu, alimwi uyoobona masimpe kuti taakwe uyoopenga kabili.—Isaya 11:4.
Mbuti mbondikonzya kuzunda muuya wakuyanda kujolela cibi?
Amweelebe kucita zintu nomunyemede. (Tusimpi 17:27) Bantu ibacita zintu nobanyemede kanji-kanji kumbele cibapa kuusa. Pele aabo ibakkala ansi kuyeeya kabatanacita cintu cili coonse balalangilwa kusala kabotu.—Tusimpi 29:11.
Amutuzyibe twaambo toonse tujatikizyidwe. (Tusimpi 18:13) Muntu iwakacitilwa cintu cibi inga wacita kabotu kulibuzya kuti, ‘Sena kuli makani aamwi ngonditazyi kabotu aakapa kuti acite boobo? Sena ulikopene mumizeezo? Naa wakacita oobo kakunyina kuzyiba?’ Zimwi ziindi inga twayeeya kuti muntu wakacita caali kutubisizya, kakuli tiicakali caali.
Makani aakubeja kujatikizya kujolela cibi
Makani aakubeja: Bbaibbele lilazumizya kujolela cibi ciindi nolyaamba kuti “liso kuliso.”—Levitiko 24:20.
Makani aamasimpe: Mulawo wakuti “liso kuliso” mu Israyeli yansiku wakali kukasya kujolela cibi. Kanji-kanji, mulawo ooyu wakali kugwasya babetesi kusubula sizibi kweelana ancaacita. b—Deuteronomo 19:15-21.
Makani aakubeja: Mbwaanga Bbaibbele talizumizyi kujolela, tatweelede kulikwabilila ciindi nobatulwana bamwi.
Makani aamasimpe: Ikuti muntu walwanwa, ulijisi nguzu zyakulikwabilila naa kulomba lugwasyo kuli basimilawo. Nokuba boobo, Bbaibbele lyaamba kuti tweelede kweeleba bukkale bukonzya kupa kuti kube nkondo, ikuti kacikonzyeka.—Tusimpi 17:14.
a Jehova ndezina lya Leza kweelana ambokutondezyedwe mu Bbaibbele.
b Kutegwa muzyibe zinji kujatikizya mulawo ooyu, amubone cibalo cakuti “Ino Mulawo Wakuti ‘Liso Kuliso’ Waamba Nzi?”
Andiza Inga Mwaakkomanina Ayaaya
NGAZI YAMULINDIZI
Mbotukonzya Kumana Penzi Lyakusulaikana—Mutapilusyi Cibi Kucibi
Amuleke kuyanda kupilusya cibi kucibi kwiinda mukuba alusyomo lwakuti ino-ino Leza uyoozibambulula zintu zyoonse zilubide.
MIBUZYO YAMU BBAIBBELE YAINGULWA
Ino Mulawo Wakuti “Liso Kuliso” Waamba Nzi?
Sena mulawo wakuti “liso kuliso” wakali kukulwaizya muntu kupilusya cibi?
BAKUBUSI BALABUZYA
Ino Inga Mwacita Buti Kuti Muntu Umwi Kamucitila Luta?
Bantu banji ibacitilwa luta balimvwa kuti kunyina ukonzya kubagwasya. Cibalo eeci cipandulula ceelede kucitwa kutegwa bukkale buli boobu butazumanani.
NJIISYO ZYAMU BBAIBBELE
Amulembe Foomu Kuti Kamuyanda Kwiiya
Amwiiye Bbaibbele amwiiyi kakunyina kubbadela.