Sena Businsimi Bwaamba Mesiya Businizya Kuti Jesu Ngowakali Mesiya?

AMULIZYE

Bwiinguzi bwamu Bbaibbele

Inzya. Ciindi naakali anyika, Jesu wakabuzuzikizya businsimi bunji bwakali kwaamba “Mesiya Musololi,” walo wakali kuyooba “Mufwutuli wanyika.” (Daniele 9:25; 1 Johane 4:14) Nociba ciindi nolwakainda lufwu lwakwe, Jesu wakazumanana kuzuzikizya businsimi bwakali kwaamba Mesiya.—Intembauzyo 110:1; Milimo 2:34-36.

Ino bbala lyakuti “Mesiya” lyaamba nzi?

Ibbala lya Chihebrayo lya Ma·shiʹach (Mesiya) alimwi abbala lya Chigiriki lya Khri·stos (Kristo) oonse aamba “Muntu Uunanikidwe.” Aboobo zina lyakuti “Jesu Kristo” lyaamba “Jesu Muntu Uunanikidwe,” naa “Jesu Mesiya.”

Kaindi, muntu kanji-kanji wakali kunanikwa kwiinda mukutilwa mafwuta amutwe katanapegwa cuuno caalubazu mubweendelezi. (Levitiko 8:12; 1 Samuele 16:13) Jesu wakananikwa a Leza kuba Mesiya, icuuno cabweendelezi. (Milimo 2:36) Nokuba boobo, muciindi cakumunanika amafwuta, Leza wakamunanika amuuya uusalala.—Matayo 3:16.

Sena businsimi bwaamba Mesiya bwakali kukonzya kuzuzikizyigwa abantu banji?

Peepe. Mbubwenya mbuli tweengo twamunwe wamuntu umwi mbotutakozyanyi atwamuntu uumbi, businsimi bwamu Bbaibbele bugamika buyo kuli Mesiya omwe naa Kristo. Nokuba boobo, Bbaibbele licenjezya kuti, “ba Kristo bakubeja abasinsimi bakubeja bayoobuka akucita zitondezyo zipati azintu zigambya ikutegwa, ikuti kacikonzyeka bakeene nobaba basale.”—Matayo 24:24.

Sena Mesiya wakali kuyoolibonya kumbele?

Peepe. Bbaibbele lyakaambila limwi kuti Mesiya wakali kuyooba walunyungu lwa Mwami Davida wa Israyeli. (Intembauzyo 89:3, 4) Nokuba boobo, malembe aamba zyamazyalani aaba Juda kusikila kuli Davida akasweeka, aboobo alangilwa kuti akanyonyooka ciindi bana Roma nobakazunda Jerusalemu mu 70 C.E. a Kuzwa ciindi eeco, calikukatazya kumuntu uuli woonse kusinizya kuti ngwaluzubo lwamwami Davida. Mukwiimpana, nokuba kuti malembe aayo aamba zyamazyalani akaliko mumazuba aa Jesu, kunyina naba omwe akati kabasinkondonyina iwakacikonzya kumukazya Jesu kuti ngwaluzubo lwa Davida.—Matayo 22:41-46.

Ino mu Bbaibbele kuli businsimi bongaye bwaamba Mesiya?

Tacikonzyeki kwaamba cacigaminina naa buli bongaye businsimi bwaamba Mesiya. Mucikozyanyo, nzila yakubala businsimi ilakonzya kwiindana nomuba muzibalo zyaamba Mesiya cacigaminina. Cibalo cili kulugwalo lwa Isaya 53:2-7 cilaamba zibeela zinji zyabusinsimi bujatikizya Mesiya. Ibamwi balakonzya kwaamba cibalo coonse eeci kuti mbusinsimi bomwe, pele bamwi balakonzya kwaamba cibeela cimwi acimwi kuti mbusinsimi nsini.

Businsimi bumwi bwaamba Mesiya ibwakazuzikizyigwa a Jesu

Businsimi	Bujanika ku	Kuzuzikizyigwa
Uyoozwa kulunyungu lwa Abrahamu	Matalikilo 22:17, 18	Matayo 1:1
Uyoozwa kuluzubo lwa Izaka mwana wa Abrahamu	Matalikilo 17:19	Matayo 1:2
Uyoozyalilwa mumukowa wa Juda wa Israyeli	Matalikilo 49:10	Matayo 1:1, 3
Uyoozwa mumulongo wabami wa Mwami Davida	Isaya 9:7	Matayo 1:1
Uyoozyalwa kuli nakalindu	Isaya 7:14	Matayo 1:18, 22, 23
Uyoozyalilwa ku Betelehemu	Mika 5:2	Matayo 2:1, 5, 6
Uyakwiitwa kuti Imanueli b	Isaya 7:14	Matayo 1:21-23
Uyakulibombya kuzwa kumatalikilo	Isaya 53:2	Luka 2:7
Bana bataanzi bayoojaigwa aakuzyalwa	Jeremiya 31:15	Matayo 2:16-18
Uyakwiitwa kuzwa mu Egepita	Hosea 11:1	Matayo 2:13-15
Uyootegwa muna Nazareta c	Isaya 11:1	Matayo 2:23
Uyoosaanguninwa amutumwa	Malaki 3:1	Matayo 11:7-10
Uyakunanikwa kuba Mesiya mu 29 C.E. d	Daniele 9:25	Matayo 3:13-17
Uyakwaambwa kuti mwana wa Leza	Intembauzyo 2:7	Milimo 13:33, 34
Busungu bwakuŋanda ya Leza	Intembauzyo 69:9	Johane 2:13-17
Mwaambilizi wamakani mabotu	Isaya 61:1	Luka 4:16-21
Kukambauka mu Galilaya kuyoopa bantu kubona mumuni mupati	Isaya 9:1, 2	Matayo 4:13-16
Sikucita maleele mbuli Musa	Deuteronomo 18:15	Milimo 2:22
Mbubwenya mbuli Musa wakaamba mizeezo ya Leza	Deuteronomo 18:18, 19	Johane 12:49
Wakali kuyooponya bantu banji malwazi	Isaya 53:4	Matayo 8:16, 17
Tanaakalibikkila buyo maano lwakwe mwini	Isaya 42:2	Matayo 12:17, 19
Wakatondezya lweetelelo kuli baabo bakakatede akulemenwa	Isaya 42:3	Matayo 12:9-20; Marko 6:34
Wakayubununa bululami bwa Leza	Isaya 42:1, 4	Matayo 12:17-20
Sikulaya Uugambya	Isaya 9:6, 7	Johane 6:68
Wakaambilizya zina lya Jehova	Intembauzyo 22:22	Johane 17:6
Wakabelesya zikozyanyo	Intembauzyo 78:2	Matayo 13:34, 35
Musololi	Daniele 9:25	Matayo 23:10
Banji kunyina nobakamusyoma	Isaya 53:1	Johane 12:37, 38
Ibbwe lilebya	Isaya 8:14, 15	Matayo 21:42-44
Wakakakwa abantu	Intembauzyo 118:22, 23	Milimo 4:10, 11
Wakasulwa kakunyina kaambo	Intembauzyo 69:4	Johane 15:24, 25
Wakanjila mu Jerusalemu kali mwami katantide ambongolo	Zekariya 9:9	Matayo 21:4-9
Wakatembaulwa abana baniini	Intembauzyo 8:2	Matayo 21:15, 16
Wakaboola muzina lya Jehova	Intembauzyo 118:26	Johane 12:12, 13
Wakabukilwa angobakali kulya limwi cinkwa	Intembauzyo 41:9	Johane 13:18
Wakaabwa amali aansiliva aali 30 e	Zekariya 11:12, 13	Matayo 26:14-16; 27:3-10
Balongwe bakwe bakamutija	Zekariya 13:7	Matayo 26:31, 56
Bakamboni bakubeja bakamubejekezya	Intembauzyo 35:11	Matayo 26:59-61
Kunyina naakabaingula basikumutamikizya	Isaya 53:7	Matayo 27:12-14
Wakaswidwa mate	Isaya 50:6	Matayo 26:67; 27:27, 30
Wakaumwa amutwe	Mika 5:1	Marko 15:19
Wakakwibbaulwa	Isaya 50:6	Johane 19:1
Tanaakapilusya ciindi naakali kuumwa	Isaya 50:6	Johane 18:22, 23
Beendelezi bamfwulumende bakapangana kuti ajaigwe	Intembauzyo 2:2	Luka 23:10-12
Wakagagailwa maanza amaulu acisamu	Intembauzyo 22:16	Matayo 27:35; Johane 20:25
Bakaabana cisani cakwe kwiinda mukuuma cisolo	Intembauzyo 22:18	Johane 19:23, 24
Wakabalilwa akati kabasizibi	Isaya 53:12	Matayo 27:38
Wakasampaulwa, wakatukilwa	Intembauzyo 22:7, 8	Matayo 27:39-43
Wakapengela basizibi	Isaya 53:5, 6	1 Petro 2:23-25
Wakalibonya kulekelezyegwa a Leza	Intembauzyo 22:1	Marko 15:34
Wakapegwa waini uuvwelene amululwe kuti anywe	Intembauzyo 69:21	Matayo 27:34
Wakafwa nyota kalaafwaafwi kufwa	Intembauzyo 22:15	Johane 19:28, 29
Wakabikka muuya wakwe mumaanza aa Leza	Intembauzyo 31:5	Luka 23:46
Wakaaba buumi bwakwe	Isaya 53:12	Marko 15:37
Wakapa cinunuzyo cakumanya cibi	Isaya 53:12	Matayo 20:28
Mafwuwa aakwe kunyina naakatyolwa	Intembauzyo 34:20	Johane 19:31-33, 36
Wakayaswa	Zekariya 12:10	Johane 19:33-35, 37
Wakazikkwa amuvwubi	Isaya 53:9	Matayo 27:57-60
Wakabusyigwa kuzwa kubafwu	Intembauzyo 16:10	Milimo 2:29-31
Sikumwaaba wakanjililwa busena	Intembauzyo 109:8	Milimo 1:15-20
Wakakkala kujanza lyalulyo lya Leza	Intembauzyo 110:1	Milimo 2:34-36

a Ibbuku litegwa McClintock and Strong’s Cyclopedia lyaamba kuti: “Tacidoonekwi kuti malembe aamba misyobo yaba Juda alimwi amikwasyi yabo akaloba ciindi calunyonyooko lwa Jerusalemu, kutali ciindi kalutanacitika.”

b Izina lya Chihebrayo lyakuti Imanueli, ilyaamba kuti “Leza Ulaandiswe,” lilapandulula cakusalazya lubazu ndwajisi Jesu kali Mesiya. Kubako kwakwe anyika alimwi amilimo yakwe zyakasinizya kuti Leza ulaabaabo bamukomba.—Luka 2:27-32; 7:12-16.

c Ibbala lyakuti “Nazareta” lizwa kubbala lya Chihebrayo lyakuti neʹtser, lyaamba “cisyuukila.”

d Kutegwa muzyibe mbozyali kutobelana kucitika zintu zyakasinizya kuti mwaka wa 29 C.E. ngomwaka Mesiya naakalibonya, amubone cibalo cakuti, “Ibusinsimi bwa Daniele Mbobusinsima Kusika kwa Mesiya.”

e Majwi aali mubusinsimi oobu ali mubbuku lya Zekariya, nokuba boobo mulembi wa Bbaibbele Matayo waamba kuti “akaambwa kwiinda muli Jeremiya musinsimi.” (Matayo 27:9) Kulibonya kuti bbuku lya Jeremiya zimwi ziindi lyakali kubikkwa mubusena bwakusaanguna mucibeela ca Magwalo ciitwa kuti “Basinsimi.” (Luka 24:44) Matayo wakabelesya “Jeremiya” kwaamba cibeela eeci camabbuku oonse, kubikkilizya abbuku lya Zekariya.

Andiza Inga Mwaakkomanina Ayaaya

SINSIMUKA!

https://cms-imgp.jw-cdn.org/img/p/502018132/univ/art/502018132_univ_sqr_xl.jpg

ijwbq cibalo 146

Bakamboni ba Jehova

Sena Businsimi Bwaamba Mesiya Businizya Kuti Jesu Ngowakali Mesiya?

Bwiinguzi bwamu Bbaibbele

Ino bbala lyakuti “Mesiya” lyaamba nzi?

Sena businsimi bwaamba Mesiya bwakali kukonzya kuzuzikizyigwa abantu banji?

Sena Mesiya wakali kuyoolibonya kumbele?

Ino mu Bbaibbele kuli businsimi bongaye bwaamba Mesiya?

Businsimi bumwi bwaamba Mesiya ibwakazuzikizyigwa a Jesu

Andiza Inga Mwaakkomanina Ayaaya

Bbaibbele Ncolyaamba Kujatikizya Mesiya

Mukaintu Mu Juda Ulapandulula Cakamupa Kusyoma Bbaibbele

Amulembe Foomu Kuti Kamuyanda Kwiiya