Bbaibbele kunyina mpolyaamba zinyama eezyi cacigaminina. Nokuba boobo, Bbaibbele lyaamba kuti Leza ‘nguwakalenga zintu zyoonse,’ aboobo cilasalala kuti zinyama eezyi zyakali akati kazintu Leza nzyaakalenga. a (Ciyubunuzyo 4:​11) Kakunyina kwaamba zinyama eezyi cacigaminina, Bbaibbele lilaamba misyobo yazilenge iiboneka kuti ilabikkilizya azinyama eezyi:

•   “Zilenge zipati zyamulwizi.”​—Matalikilo 1:​21.

•   “Banyama boonse bakalaba ansi.”​—Matalikilo 1:​25.

•   “Banyama bamusyokwe.”​—Matalikilo 1:​25.

Sena zinyama eezyi zyakasanduka buya kuzwa kubanyama bambi?

 Kweelana alipooti yakapegwa abasikuvwukkula zintu zyakaindi, zinyama eezyi tiizyakali kucinca-cinca mbuli kuti zyakasanduka buya, muciindi caboobo zyakalibonya buyo mbubwenya mbozibede. Eeci cilendeelana amajwi aamu Bbaibbele aatondezya kuti Leza wakalenga banyama boonse. Mucikozyanyo, lugwalo lwa Intembauzyo 146:6 lwaamba Leza kuti “Mulengi wajulu anyika, lwizi, azyoonse zili mumo.”

Ino ndilili zinyama eezyi nozyakali kupona?

 Bbaibbele lyaamba banyama bamulwizi abaanyika kuti bakalengwa buya mubuzuba bwasanu abwacisambomwe bwakulenga. b (Matalikilo 1:​20-​25, 31) Aboobo, Bbaibbele litondezya kuti zinyama eezyi zyakaliko kwaciindi cilamfwu.

Sena Behemoti a Leviyatani mbebanyama bakali kwiitwa kuti dinosaurs?

 Peepe. Nokuba kuti banyama aaba baambidwe mubbuku lya Jobu tabazyibidwe kabotu, Behemoti kanji-kanji uzyibidwe kuti ngucivwubwe mpoonya Leviyatani kuti nguciwena. Mazina aaya aleendelana abupanduluzi mbobapedwe mu Magwalo. (Jobu 40:15-​23; 41:​1, 14-​17, 31) Kufwumbwa mbocibede, mazina aakuti “Behemoti” a “Leviyatani” taakonzyi kwaamba zinyama zitegwa dinosaurs. Leza wakaambila Jobu kuti azilangisisye zinyama eezyi, alimwi Jobu wakapona kakwiindide ciindi cilamfwu kuzwa zinyama zitegwa dinosaurs kazifwide kale.​—Jobu 40:16; 41:8.

Ino zinyama eezyi zyakaya kuli?

 Bbaibbele talyaambi ciindi zinyama eezyi nozyakaleka kupona. Pele lyaamba kuti zintu zyoonse zyakalengwa ‘akaambo kakuyanda kwa Leza,’ aboobo Leza wakali amakanze ciindi naakalenga zinyama eezyi. (Ciyubunuzyo 4:​11) Makanze aayo naakazuzikizyigwa, Leza wakapa kuti zinyama eezyi zifwe.