Bangelo nzilenge zijisi nguzu kapati kwiinda bantu. (2 Petro 2:​11) Bakkala kujulu, kwalo kuli buumi busumpukide kwiinda bujanika anyika. (1 Bami 8:​27; Johane 6:​38) Aboobo, baambwa kuti myuuya.​—1 Bami 22:21; Intembauzyo 18:10.

Ino bangelo bakazwa kuli?

 Leza nguwakalenga bangelo kwiinda muli Jesu, walo Bbaibbele ngoliita kuti “mutaanzi kuzyalwa kuzilenge zyoonse.” Ikupandulula Leza mbwaakamubelesya Jesu kulenga zintu, Bbaibbele lyaamba kuti: “Nkaambo kwiinda mulinguwe [Jesu] zintu zimbi zyoonse zyakalengwa kujulu alimwi aanyika, izintu zilibonya azitalibonyi,” kubikkilizya abangelo. (Bakolose 1:​13-​17) Bangelo tabakwati alimwi tababi abana. (Marko 12:25) Muciindi caboobo, aaba “bana ba Leza mwini-mwini,” aumwi wakalengwa buya cakaanzambwene.​—Jobu 1:6.

 Bangelo bakalengwa kaindi kapati, inyika kaitanaba. Ciindi Leza naakalenga nyika, bangelo bakatalika “koompolola cakubotelgwa.”​—Jobu 38:​4-7.

Ino kuli bangelo bongaye?

 Bbaibbele talyaambi mweelwe uugaminide, pele lyaamba kuti mbanji kapati. Mucikozyanyo, mucilengaano ncaakabona mwaapostolo Johane, wakabona azyuulu zili mamiliyoni zyabangelo.​—Ciyubunuzyo 5:​11.

Sena bangelo balijisi mazina aabageme abube?

 Inzya. Bbaibbele lilaamba mazina aabangelo bobilo: Mikayeli a Gabriyeli. (Daniele 12:1; Luka 1:​26) a Bangelo bamwi bakaamba kuti balijisi mazina pele tiibakaayubununa pe.​—Matalikilo 32:29; Babetesi 13:17, 18.

 Bangelo bajisi bube bwiindene-indene. Balabandika. (1 Bakorinto 13:1) Balijisi maano alimwi balakonzya kumutembaula Leza. (Luka 2:​13, 14) Alimwi balijisi lwaanguluko lwakusala akati kacibi acibotu, mbubwenya bamwi mbobakamusangana Saatani Diabolosi mukuzangila Leza.​—Matayo 25:41; 2 Petro 2:4.

Sena bangelo bajisi milimo iindene-indene?

 Inzya. Mungelo uubainda nguzu boonse ngu Mikayeli, silutwe wabangelo. (Juda 9; Ciyubunuzyo 12:7) Baserafi mbangelo balaanguzu ibakkala afwaafwi acuuno ca Jehova. (Isaya 6:​2, 6) Bakerubi abalo bali mucibeela cimwi cabangelo ibacita milimo yaalubazu. Mucikozyanyo, bakerubi bakaulinda mulyango wamumuunda wa Edeni ciindi Adamu a Eva nobakatandwa.​—Matalikilo 3:​23, 24.

Sena bangelo balabagwasya bantu?

 Inzya, Leza ubelesya bangelo basyomeka kugwasya bantu mazuba aano.

•   Leza ulababelesya bangelo kusololela babelesi bakwe mumulimo wakukambauka makani mabotu aa Bwami bwa Leza. (Ciyubunuzyo 14:​6, 7) Kucita boobu kulabagwasya aabo bakambauka alimwi abaabo baaswiilila makani mabotu.​—Milimo 8:​26, 27.

•   Bangelo balagwasya kukwabilila mbungano ya Bunakristo kukusofwaazyigwa abantu babi.​—Matayo 13:49.

•   Bangelo balabasololela akubakwabilila bantu basyomeka kuli Leza.​—Intembauzyo 34:7; 91:10, 11; Bahebrayo 1:​7, 14.

•   Lino-lino, bangelo antoomwe a Jesu bayoogusya bubi anyika akupa kuti bantu bakatalukwe.​—2 Batesalonika 1:​6-8.

Sena tujisi mungelo uutulinda?

 Nokuba kuti bangelo balabakwabilila kumuuya babelesi ba Leza, eeci tacaambi kuti Leza utuma mungelo ku Munakristo umwi aumwi kutegwa amulinde. b (Matayo 18:10) Bangelo tababakwabilili babelesi ba Leza kusunko limwi alimwi. Bbaibbele lyaamba kuti Leza ulapa “nzila yamatijilo” kwiinda mukumupa busongo anguzu zyakuliyunya Munakristo ooyo.​—1 Bakorinto 10:12, 13; Jakobo 1:​2-5.

Makani aakubeja kujatikizya bangelo

 Makani aakubeja: Tulakonzya kupaila kubangelo kutegwa batugasye.

 Makani aamasimpe: Kupaila kuli Leza ncibeela cabukombi bwesu, alimwi tupaila kuli Jehova Leza. (Ciyubunuzyo 19:10) Tweelede kupaila buyo kuli Leza kwiinda muli Jesu.​—Johane 14:6.