Ino Jesu Wakali Kulibonya Buti?

AMULIZYE

Bwiinguzi bwamu Bbaibbele

Kunyina muntu uuzyi bwini Jesu mbwaakali kulibonya, akaambo kakuti ciimo cakwe mbocakali kulibonya taakwe mpocipanduludwe mu Bbaibbele. Eeci citondezya kuti mbwaakali kulibonya Jesu taali makani mapati pe. Nokuba boobo, Bbaibbele lilatupa muzeezo wa mbwaakali kulibonya Jesu.

Mbwaakali kulibonya: Jesu wakali mu Juda alimwi kulangilwa kuti wakakona bupange bumwi kuzwa kuli banyina. (Bahebrayo 7:14) Kulibonya kuti tanaakaindene kapati abantu boonse. Ciindi cimwi wakeenda cakuyubaila kuzwa ku Galilaya kuya ku Jerusalemu kakunyina kuzyibwa. (Johane 7:10, 11) Kunze lyaboobo, tanaakaindene abasikwiiya bakwe. Amuyeeye kuti Judasi Isikariote wakabatondezya buya bantu bakali kuyanda kumwaanga Jesu kuti nguuli.—Matayo 26:47-49.
Kulampa kwamasusu: Kulangilwa kuti masusu aa Jesu tanaakali malamfwu, nkaambo Bbaibbele lyaamba kuti “masampu kumwaalumi kuti kajisi masusu malamfwu.”—1 Bakorinto 11:14.
Cilezu: Jesu wakalijisi cilezu. Wakali kutobela mulawo waba Juda, walo iwakali kukasya baalumi “kugela cilezu mocili mumabali.” (Levitiko 19:27; Bagalatiya 4:4) Kuyungizya waawo, Bbaibbele lilaamba cilezu ca Jesu mubusinsimi bujatikizya kupenga kwakwe.—Isaya 50:6.
Mubili: Zintu zyoonse izyaambwa kujatikizya Jesu zitondezya kuti wakali mwaalumi uuzyandamene. Mumulimo wakwe, wakali kweenda misinzo milamfwu. (Matayo 9:35) Wakalisalazya tempele lyaba Juda ziindi zyobilo, wakatingamuna matebulu aabasikucinca mali alimwi wakatanda zivwubwa kubelesya nswepu. (Luka 19:45, 46; Johane 2:14, 15) Bbuku litegwa McClintock and Strong’s Cyclopedia lyaamba kuti: “Bupanduluzi boonse bwamu Bbaibbele butondezya [Jesu] kuti wakajisi buumi bubotu amubili uuzyandamene.”—Volume IV, peeji 884.
Mbwaakali kulibonya kubusyu: Jesu wakali kusangalizya alimwi wakali silubomba, wakali kulibonya kubusyu. (Matayo 11:28, 29) Bantu bamisyobo yoonse bakali kumuyandaula kutegwa abaumbulizye akubagwasya. (Luka 5:12, 13; 7:37, 38) Nobaba bana bakali kwaanguluka kuba anguwe.—Matayo 19:13-15; Marko 9:35-37.

Twaambo tutaluzi tujatikizya mbwaakali kulibonya Jesu

Kaambo kataluzi: Bamwi baamba kuti kweelede kuti Jesu wakali kuzwa mu Africa nkaambo bbuku lya Ciyubunuzyo lyeezyanisya masusu aakwe kuboya bwambelele mpoonya maulu aakwe ‘kumukuba mubotu.’—Ciyubunuzyo 1:14, 15.

Kaambo kamasimpe: Bbuku lya Ciyubunuzyo lilembedwe “muzitondezyo.” (Ciyubunuzyo 1:1) Bupanduluzi bwamasusu aa Jesu alimwi amaulu mbwamaambilambali kutondezya bube bwa Jesu naakabusyigwa, kutali kupandulula mbwaakali kulibonya naakali anyika. Lugwalo lwa Ciyubunuzyo 1:14 lwakaamba masusu aakwe kwiinda mukubelesya mubala, kutali mbwaakapangidwe noluti, ‘mutwe wa Jesu alimwi amasusu aakwe zyakali kutuba buu mbuli boya bwambelele butuba, mbuli caanda.’ Eeci ciiminina busongo bwakwe akaambo kamyaka njaapona. (Ciyubunuzyo 3:14) Kapango aaka takeezyanisyi limbi bupange bwamasusu aa Jesu kuboya bwambelele mbubwenya mbokateezyanisyi masusu aakwe kucaanda.

Maulu aa Jesu akali kulibonya “mbuli mukuba mubotu nouŋaima mubbibi lyamulilo.” (Ciyubunuzyo 1:15) Kunze lyaboobo, busyu bwakwe “bwakali mbuli zuba mbolimweka nolibala kapati.” (Ciyubunuzyo 1:16) Mbwaanga kunyina musyobo uujisi mubala weendelana abupanduluzi oobu, cilengaano eeci ceelede kuti kuli ncociiminina, kutondezya Jesu kabusyidwe kale kuba yooyo “uukkala mumumuni uutaswenwi afwaafwi.”—1 Timoteyo 6:16.

Kaambo kataluzi: Jesu wakanyina nguzu.

Kaambo kamasimpe: Jesu wakali kucita zintu mbuli mwaalumi mubukkale bwakwe. Mucikozyanyo, cabusicamba wakalizyibya kunkamu yabantu ibakajisi zilwanyo iyakasikide kumujata. (Johane 18:4-8) Kweelede kuti Jesu alimwi wakalizyandamene nkaambo wakali kubeleka mulimo wakubeza mapulanga kubelesya zibelesyo iziyanda nguzu.—Marko 6:3.

Aboobo, nkaambo nzi Jesu ncaakali kuyandika lugwasyo kunyamuna cisamu cakwe cakupenzyezya? Alimwi nkaambo nzi ncaakasaanguna nguwe kufwa kabatanafwa mbaakali limwi? (Luka 23:26; Johane 19:31-33) Jesu katanajaigwa, mubili wakwe wakabula nguzu kapati. Wakali kulanga busiku boonse, akaambo kakupengana mumizeezo. (Luka 22:42-44) Masiku ba Juda bakamupenzya, mpoonya mafwumofwumo aakatobela bana Roma bakamupenzya, (Matayo 26:67, 68; Johane 19:1-3) Twaambo ituli boobo twakapa kuti afwambaane kufwa.

Makani aakubeja: Jesu lyoonse wakali kulibonya kuusa, kuumbaalilwa.

Makani aamasimpe: Jesu wakatondezya bube bwa Jehova bulondokede, bwalo Bbaibbele mbolyaamba kuti “Leza uukkomene .” (1 Timoteyo 1:11; Johane 14:9) Alimwi buya, Jesu wakayiisya bamwi mbolujanwa lukkomano. (Matayo 5:3-9; Luka 11:28) Makani aamasimpe aaya atondezya kuti Jesu lyoonse wakali kulutondezya lukkomano oolo kubusyu bwakwe.